Presiza hatene no bolu Maromak nia naran

Ita-Boot iha belun diʼak neʼebé Ita-Boot la hatene ninia naran ka lae? Laiha, loos ka lae? Hanesan feto ida husi rai-Bulgária dehan: “Ema neʼebé la hatene Maromak nia naran, nunka mais bele hakbesik ba nia.” Liután neʼe, buat furak ida mak Maromak hakarak ita hakbesik ba nia. Tan neʼe, liuhusi Bíblia, Maromak fó-koñese ona ninia an ba ita. Nia dehan: “Haʼu mak Jeová. Neʼe mak haʼu-nia naran.”—Isaías (Yesaya) 42:8.

Ita hatene no bolu Maromak nia naran, neʼe importante tebes ba Maromak ka lae? Sin, importante. Hanoin toʼok: Maromak nia naran Jeová mosu maizumenus dala 7.000 iha Bíblia orijinál neʼebé hakerek ho lia-ebraiku. Iha lia-ebraiku, naran neʼe hakerek ho letra haat neʼebé bolu Tetragrama. Maromak nia naran mosu dala barak liu fali naran seluk iha Bíblia laran. Neʼe hatudu katak Maromak Jeová hakarak ita atu hatene no bolu ninia naran.a

Maibé ema balu hanoin katak bolu Maromak nia naran, neʼe la hatudu respeitu tanba Maromak mak santu no aas liu. Loos duni, ita ema keta temi leet deʼit Maromak nia naran. Hanesan ita lakohi estraga ka hafoʼer belun diʼak ida nia naran, satán ho Maromak nia naran. Maibé Maromak hakarak ema neʼebé hadomi nia tenke hafolin Ninia naran no haklaken kona-ba naran neʼe atu ema hotu bele hatene. (Salmo [Mazmur] 69:30, 31; 96:2, 8) Jesus mós hanorin ninia dixípulu sira harohan nuneʼe: “Ami Aman iha lalehan, halo Ita naran sai santu.” Atubele halo Maromak nia naran sai santu ita presiza haklaken kona-ba naran neʼe. Hodi halo nuneʼe mak ita bele hakbesik liután ba Maromak.—Mateus 6:9, Liafuan diak ba imi—segunda edisaun.

Bíblia dehan, Maromak hafolin tebes ema neʼebé “hanoin kona-ba nia naran”. (Malaquias [Maleakhi] 3:16) Kona-ba ema hanesan neʼe, Maromak Jeová promete ona: “Haʼu sei proteje nia tanba nia hatene haʼu-nia naran. Nia sei bolu haʼu no haʼu sei hatán ba nia. Haʼu sei hamutuk ho nia iha terus laran.” (Salmo [Mazmur] 91:14, 15) Se ita hakarak habelun ho Maromak, ita tenkesér hatene no bolu ninia naran.