Presiza koʼalia ba Maromak no rona ba nia

Belun neʼebé besik loos ba malu gosta ransu malu beibeik hanesan tuur hamutuk, ka koʼalia ba malu liuhusi telefone, e-mail, vídeo, ka hakerek karta ba malu. Nuneʼe mós se ita hakarak hakbesik ba Maromak, ita presiza koʼalia ba Maromak no rona ba nia. Maibé oinsá mak ita bele halo ida-neʼe?

Se ita hakarak koʼalia ba Maromak Jeová ita tenke halo orasaun. Orasaun ba Maromak, neʼe la hanesan baibain ema koʼalia ba kolega ida. Ita presiza komprende katak orasaun neʼe ita hatoʼo ba Kriadór, Maromak neʼebé Aas Liu Hotu iha mundu tomak. Tan neʼe ita-nia orasaun presiza hatoʼo ho respeitu neʼebé kleʼan no laran hamtaʼuk ba nia. Atu Maromak simu no rona ita-nia orasaun, presiza mós halo tuir buat balu tuirmai neʼe.

Primeiru, ita tenkesér halo orasaun ba Maromak Jeová mesak deʼit, laʼós ba Jesus, “santu-santa” sira ka imajen. (Êxodo [Keluaran] 20:4, 5) Bíblia fó-hatene klaru tebes: “Iha buat hotu hatoʼo imi-nia laran-susar ba Maromak liuhusi orasaun no harohan no mós fó-agradese.” (Filipe 4:6) Segundu, tenkesér hatoʼo orasaun liuhusi Jesus Kristu, Maromak nia Oan-Mane nia naran. Jesus rasik dehan: “Ema ida la bele hakbesik Aman se nia la liu husi haʼu.” (João 14:6) Terseiru, buat neʼebé ita husu iha orasaun tenkesér tuir Maromak nia hakarak. Bíblia dehan: “Buat naran deʼit neʼebé ita husu hodi tuir ninia hakarak, nia rona ita.”a—1 João 5:14.

Ita hotu hatene, se ema naʼin-rua hakarak sai belun neʼebé besik loos ba nafatin, laʼós ema ida deʼit mak koʼalia. Maibé nuʼudar belun diʼak, sira rua-rua gosta koʼalia ba malu. Hanesan neʼe mós, ita hakarak Maromak koʼalia ba ita no ita tenke rona didiʼak ba nia. Hatene ka lae, oinsá mak Maromak koʼalia ba ita?

Ohin loron, Maromak Jeová “koʼalia” ba ita liuhusi Bíblia, Maromak nia Liafuan. (2 Timóteo 3:16, 17) Tanbasá? Hanoin toʼok ezemplu neʼe: Ita-Boot simu karta husi kolega diʼak ida. Lee hotu tiha karta neʼe, Ita-Boot kontente tebes no koʼalia ba ema seluk: “Haʼu foin mak rona husi haʼu-nia kolega!” Maibé tuir loloos neʼe mak karta deʼit neʼebé hakerek kolega nia liafuan sira. Nuneʼe mós, bainhira Ita-Boot lee Bíblia, neʼe hanesan Maromak koʼalia ba Ita-Boot. Gina (neʼebé temi ona iha pájina 3) dehan: “Haʼu hanoin se haʼu hakarak Maromak haree haʼu nuʼudar ninia belun, haʼu tenke lee no aprende didiʼak ninia ‘karta’. Neʼe mak Bíblia. Lee Bíblia loron-loron halo haʼu hakbesik liután ba Maromak.” Ita-Boot lee Bíblia loron-loron ka lae? Se Ita-Boot lee Bíblia, neʼe hatudu katak Ita-Boot mós hakarak Maromak koʼalia ba ita. Nuneʼe Ita-Boot bele hakbesik liután ba Maromak.