Tansá ita komemora Naʼi nia Han Kalan
“Kontinua halo ida-neʼe hodi hanoin haʼu.”—1 KORINTO 11:24.
1, 2. Jesus halo saida iha kalan 14 Nisan tinan 33? (Haree dezeñu iha leten.)
FULAN nakonu iha kalan 14 Nisan tinan 33 iha Jeruzalein. Jesus ho ninia apóstolu sira foin selebra Festa Salvasaun nian atu hanoin-hetan tempu neʼebé Jeová salva ema Izraél husi rai-Ejitu iha tinan 1.500 antes neʼe. Agora, Jesus hahú selebrasaun foun ho ninia apóstolu naʼin-11 neʼebé laran-metin ba nia. Selebrasaun neʼe atu komemora buat neʼebé sei akontese ba Jesus antes loron neʼe ramata.a (Haree nota iha kraik.) Neʼe mak Jesus nia mate.—Mateus 26:1, 2.
2 Halo orasaun tiha, Jesus pasa paun ba ninia apóstolu sira hodi dehan: “Simu no han bá.” Depois, nia foti kopu tua-uvas, halo orasaun ida tan, no dehan: “Imi hotu, hemu bá.” (Mateus 26:26, 27) Paun no tua-uvas neʼe reprezenta buat espesiál. Jesus nia apóstolu sira aprende buat barak iha kalan importante ida-neʼe.
3. Ita sei koʼalia kona-ba pergunta saida deʼit iha lisaun neʼe?
3 Jesus hakarak ninia dixípulu sira atu komemora ninia mate tinan-tinan. Ohin loron ita bolu tempu neʼe Memoriál, ka “Naʼi nia Han Kalan”. (1 Korinto 11:20) Kona-ba ida-neʼe, karik ema balu husu: Tanbasá ita presiza hanoin-hetan Jesus nia mate? Paun no tua-uvas mak reprezenta saida? Oinsá mak ita bele prepara ba Memoriál? Sé mak bele han paun no hemu tua-uvas neʼe? No oinsá mak ema kristaun sira hatudu katak sira hafolin sira-nia esperansa?
TANBASÁ ITA KOMEMORA JESUS NIA MATE
4. Jesus nia mate loke dalan saida ba ita?
4 Tanba ita mak Adão nia bei-oan sira, ita simu sala no mate husi nia. (Roma 5:12) Tanba ita hotu sala-naʼin, ita la bele fó buat ida atu salva ita-nia moris ka ema seluk nia moris. (Salmo [Mazmur] 49:6-9) Maibé Jesus mate ba ita, no folin husi ninia moris perfeitu neʼe nia fó ba Maromak. Hodi halo nuneʼe, Jesus loke dalan ba ita atu sai livre husi sala no mate hodi moris ba nafatin.—Roma 6:23; 1 Korinto 15:21, 22.
5. (a) Oinsá ita hatene katak Jeová no Jesus hadomi ita? (b) Tanbasá mak ita presiza tuir Memoriál?
5 Liuhusi Jesus nia sakrifísiu mak Maromak hatudu katak nia hadomi duni ita. (João 3:16) Jesus mós hatudu ninia domin hodi fó ninia moris ba ita. Antes Jesus mai toʼo rai, ‘buat neʼebé fó ksolok ba nia mak ema nia oan-mane sira’. (Provérbios [Amsal] 8:30, 31) Ita agradese tebes ba buat neʼebé Jeová no Jesus halo ona mai ita! Tan neʼe mak ita tuir Memoriál hodi halo tuir Jesus nia mandamentu atu “kontinua halo ida-neʼe hodi hanoin haʼu”.—1 Korinto 11:23-25.
PAUN NO TUA-UVAS REPREZENTA SAIDA?
6. Saida mak ita hanoin kona-ba paun no tua-uvas neʼebé uza iha Memoriál?
6 Iha Jesus nia kalan ikus ho ninia apóstolu sira, nia la halo milagre ida hodi halo paun no tua-uvas nakfila sai fali ninia isin no raan. Kona-ba paun, nia hatete: “Neʼe reprezenta haʼu-nia isin.” No kona-ba tua nia hatete: “Neʼe reprezenta haʼu-nia ‘raan aliansa nian’, neʼebé sei fakar tanba ema barak.” (Marcos 14:22-24) Husi ida-neʼe, ita hatene katak paun no tua-uvas mak hanesan símbolu deʼit.
7. Paun neʼebé la iha fermentu reprezenta saida?
7 Iha kalan importante neʼe, Jesus uza paun restu husi Festa Salvasaun nian neʼebé la iha fermentu. (Êxodo [Keluaran] 12:8) Dala ruma, Bíblia koʼalia kona-ba fermentu hodi reprezenta sala. (Mateus 16:6, 11, 12; Lucas 12:1) Nuneʼe, paun neʼebé la iha fermentu reprezenta Jesus nia isin neʼebé la iha sala. (Ebreu 7:26) Tan neʼe iha Memoriál ita uza paun neʼebé la iha fermentu.
8. Tua-uvas reprezenta saida?
8 Tua-uvas neʼebé Jesus uza reprezenta ninia raan, ka moris, hanesan mós ho tua-uvas neʼebé ita uza iha Memoriál. Iha fatin naran Gólgota, besik Jeruzalein, Jesus fakar ninia raan “atu ema barak hetan perdua husi sala”. (Mateus 26:28; 27:33) Se Ita sente agradese ba buat neʼebé Jeová no Jesus halo ba Ita, tinan-tinan Ita sei prepara ba tempu espesiál neʼe. Maibé oinsá mak ita bele prepara an?
DALAN BALU ATU PREPARA
9. (a) Tanbasá diʼak atu tuir programa lee Bíblia nian ba tempu Memoriál? (b) Ita rasik sente oinsá kona-ba Jesus nia sakrifísiu?
9 Dalan ida ita bele prepara ba Memoriál mak hodi uza programa lee Bíblia nian ba tempu Memoriál. Programa neʼe bele hetan iha livru Buka-hatene Didiʼak Eskritura Loron-loron. Hodi lee ida-neʼe ita bele hanoin kleʼan kona-ba buat neʼebé Jesus halo antes nia mate. Irmán ida hakerek dehan: “Ami sempre hein namanas ba Memoriál. Tinan-tinan tempu neʼe sai espesiál liu ba ami.” Irmán neʼe hanoin-hetan tempu neʼebé ninia aman mate. Nia hatete: “Haʼu hateke ba haʼu-nia aman doben nia mate-isin no haʼu foin hafolin duni Jesus nia sakrifísiu. . . . Maski haʼu hatene oinsá atu esplika eskritura sira, maibé bainhira haʼu rasik nia família mate mak haʼu-nia laran foin sente agradese tebes ba sakrifísiu neʼe.” Hodi hanoin kleʼan kona-ba oinsá Jesus nia sakrifísiu ajuda ita rasik, mak dalan importante ida hodi prepara ba Memoriál.
Ita bele prepara ita-nia an hodi tuir programa lee Bíblia nian ba Memoriál (Haree parágrafu 9)
10. Saida tan mak ita bele halo hodi prepara ba Memoriál?
10 Dalan ida tan ita bele prepara mak hodi aumenta ita-nia serbisu haklaken no konvida ema barak atu asiste Memoriál. Karik ita bele foti pioneiru estra durante tempu neʼe. Bainhira ita koʼalia ho ema seluk kona-ba Maromak, ninia Oan-Mane no kona-ba esperansa atu moris ba nafatin, ita sei sente kontente tanba ita halo buat neʼebé Maromak hakarak ita atu halo.—Salmo (Mazmur) 148:12, 13.
11. Oinsá mak ema Korinto han paun ka hemu tua-uvas la ho respeitu durante tempu Memoriál?
11 Hodi prepara ba Memoriál, hanoin didiʼak kona-ba buat neʼebé apóstolu Paulo hakerek ba ema kristaun sira iha Korinto. (Lee 1 Korinto 11:27-34.) Nia hatete katak “ema naran deʼit neʼebé han paun ka hemu tua-uvas Naʼi nian la ho respeitu, nia halo sala hasoru Naʼi nia isin no raan”. Nuneʼe, se ema kose-mina ida halo sala boot maibé han paun no hemu tua-uvas, nia “lori kastigu ba nia an”. Iha apóstolu Paulo nia tempu, ema Korinto barak halo hahalok sala no neʼe halo sira “fraku no moras” iha dalan espirituál. Karik sira han no hemu barak demais antes ka durante Memoriál, no halo sira matan-dukur hodi sira la bele tau atensaun tomak. Sira-nia kondisaun espirituál la hatudu respeitu ba tempu espesiál neʼe. Tan neʼe bainhira sira han paun no hemu tua-uvas, Maromak la simu.
12. (a) Apóstolu Paulo kompara Memoriál hanesan saida? No avizu saida mak nia fó? (b) Se ema neʼebé han paun no hemu tua-uvas iha Memoriál monu ba sala boot, saida mak nia presiza halo?
12 Apóstolu Paulo kompara Memoriál hanesan han hamutuk. Nia fó avizu neʼe: “Imi labele hemu husi Jeová nia kopu no anju aat nia kopu; imi labele han husi ‘Jeová nia meza’ no anju aat nia meza.” (1 Korinto 10:16-21) Se ema neʼebé han paun no hemu tua-uvas iha Memoriál monu ba sala boot, nia tenke bá katuas sira hodi husu ajuda. (Lee Tiago 5:14-16.) Se ninia hahalok hatudu katak nia arrepende an ona, no se nia han paun no hemu tua-uvas nafatin iha Memoriál, neʼe la dehan katak nia la hatudu respeitu ba Jesus nia sakrifísiu.—Lucas 3:8.
13. Tanbasá mak ita tenke halo orasaun kona-ba esperansa neʼebé Maromak fó ba ita?
13 Ita mós bele prepara ba Memoriál hodi halo orasaun no hanoin didiʼak kona-ba esperansa neʼebé Maromak fó ba ita ida-idak. Ita hakarak hatudu respeitu ba Jesus nia sakrifísiu. Tan neʼe, ita sei la han paun no hemu tua-uvas iha Memoriál se ita la iha prova katak ita-nia esperansa mak atu moris iha lalehan. Se nuneʼe, oinsá mak ema ida bele hatene se nia bele han paun no hemu tua-uvas iha Memoriál?
SÉ MAK BELE HAN PAUN NO HEMU TUA-UVAS IHA MEMORIÁL?
14. Tanba ema kose-mina sira mak parte husi aliansa foun, saida mak sira halo iha Memoriál?
14 Kona-ba tua-uvas, Jesus hatete: “Kopu neʼe reprezenta aliansa foun liuhusi haʼu-nia raan.” (1 Korinto 11:25) Sira neʼebé han no hemu iha Memoriál, sira hatene duni no la iha duvida katak sira mak parte husi aliansa foun neʼe. Jeová halo aliansa Ukun-Fuan nian ho ema Izraél maibé ikusmai fó sai katak nia sei troka ho aliansa foun ida. (Lee Jeremias [Yeremia] 31:31, 33.b) Maromak halo aliansa foun neʼe ho Izraél espirituál, ka ema kose-mina sira. (Galásia 6:15, 16) Jesus nia mate halo legál aliansa neʼe. (Lucas 22:20) Maromak halo aliansa foun neʼe liuhusi Jesus, no ema kose-mina sira neʼebé laran-metin sei simu sira-nia liman-rohan hodi bá lalehan.—Ebreu 8:6; 9:15.
15. Sé mak parte husi aliansa Ukun nian? Se sira laran-metin nafatin, priviléjiu saida mak sira sei simu iha futuru?
15 Ema kose-mina sira hatene katak sira mós parte husi aliansa Ukun nian. (Lee Lucas 12:32.) Aliansa neʼe Jesus halo ho ninia dixípulu sira neʼebé hetan kose-mina no “terus hanesan nia”. (Filipe 3:10) Ema kose-mina sira neʼebé laran-metin ohin loron mós parte husi aliansa neʼe. Sira sei ukun nuʼudar liurai hamutuk ho Kristu iha lalehan ba nafatin. (Apokalipse 22:5) Sira mak bele han paun no hemu tua-uvas iha Memoriál.
16. Esplika toʼok Roma 8:15-17 katak sá?
16 Só deʼit sira neʼebé hatene duni katak sira mak Maromak nia oan mak bele han paun no hemu tua-uvas iha Memoriál. (Lee Roma 8:15-17.) Apóstolu Paulo hatete katak sira bolu: “Abba, Aman!” Liafuan aramaiku “Abba” mak hatudu relasaun neʼebé besik liu, hanesan bainhira oan ida bolu: “Apá”. Maibé liafuan neʼe mós hatudu respeitu, hanesan liafuan “aman”. Neʼe hatudu relasaun espesiál neʼebé ema kose-mina sira iha ho Jeová bainhira ‘espíritu lori sira atu sai nuʼudar oan-hakiak’. Maromak nia ‘espíritu fó sasin iha sira-nia laran’ hodi sira bele hatene ho laran tomak katak sira mak Maromak nia oan kose-mina. Neʼe, Maromak mak hili, laʼós tanba sira mak lakohi esperansa moris iha rai. Sira hatene katak, se sira laran-metin toʼo mate, sira sei sai liurai hamutuk ho Jesus iha lalehan. Ohin loron, husi ema naʼin-144.000, neʼebé Maromak santu Jeová mak hili, hela uitoan deʼit ona iha rai. (1 João 2:20; Apokalipse 14:1) Sira-nia relasaun ho Jeová besik liu toʼo sira bele bolu nia nuʼudar “Abba, Aman!”
HAFOLIN ITA-NIA ESPERANSA
17. Ema kose-mina sira iha esperansa saida? Oinsá mak sira hatene katak Maromak hili sira?
17 Se Ita-Boot mak ema kose-mina ida, karik Ita temi beibeik kona-ba Ita-nia esperansa lalehan nian iha orasaun. No eskritura sira mós iha arti espesiál ba Ita. Porezemplu, eskritura neʼebé koʼalia kona-ba Jesus kaben ho ninia “noiva”, Ita hatene ida-neʼe koʼalia kona-ba Ita, no Ita hein namanas ba tempu neʼe. (João 3:27-29; 2 Korinto 11:2; Apokalipse 21:2, 9-14) Ka bainhira Bíblia esplika Maromak nia domin ba ema kose-mina sira, Ita hatene katak nia koʼalia ba Ita rasik. No bainhira Ita lee matadalan iha Bíblia neʼebé hakerek liuliu ba ema kose-mina sira, espíritu santu book Ita atu halo tuir. Maromak nia espíritu santu “fó sasin” katak Ita-nia esperansa mak atu bá lalehan.
18. “Bibi seluk” iha esperansa saida? Oinsá mak Ita sente kona-ba esperansa neʼe?
18 Se Ita-Boot mak “bibi seluk” husi “ema-lubun boot”, Maromak fó ba Ita oportunidade atu moris ba nafatin iha mundu paraízu iha rai. (Apokalipse 7:9; João 10:16) Oinsá mak Ita sente kona-ba Ita-nia futuru? Ita sente kontente bainhira hanoin kleʼan kona-ba buat neʼebé Bíblia hatete kona-ba mundu foun, loos ka lae? Ita hakarak tebes atu moris iha mundu neʼebé nakonu ho dame hamutuk ho família no belun sira. Ita hein ba tempu neʼebé moras, hamlaha, terus, kiak no mate sei la iha tan. (Salmo [Mazmur] 37:10, 11, 29; 67:6; 72:7, 16; Isaías [Yesaya] 33:24) Ita mós hein namanas atu haree ema mate neʼebé Ita hadomi moris fila fali. (João 5:28, 29) Ita agradese tebes ba Jeová tanba esperansa furak neʼe! Maski Ita la han paun no hemu tua-uvas, maibé Ita nafatin tuir Memoriál tanba Ita hafolin tebes Jesus nia sakrifísiu.
ITA MÓS SEI TUIR KA LAE?
19, 20. (a) Saida mak ita presiza halo atu bele moris ba nafatin? (b) Tanbasá mak Ita hakarak tuir Memoriál?
19 Maski Ita-nia esperansa mak atu moris iha lalehan ka iha rai, Ita bele moris ba nafatin só deʼit se Ita hatudu fiar ba Maromak Jeová, Jesus Kristu no ninia sakrifísiu. Iha loron-sesta 3 Abríl tinan 2015, ema rihun ba rihun iha mundu tomak sei tuir Memoriál iha Reuniaun-Fatin, no mós fatin seluk tan neʼebé Testemuña ba Jeová mak halaʼo. Bainhira Ita tuir Memoriál, hanoin kleʼan kona-ba Ita-nia esperansa no kona-ba tansá Jesus nia sakrifísiu mak importante tebes.
20 Hodi tuir Memoriál, ita sei hafolin liután Jesus nia sakrifísiu. Bainhira ita rona didiʼak ba diskursu Memoriál nian, neʼe sei book ita-nia laran hodi hatudu domin ba ema seluk no fó-hatene sira kona-ba Jeová nia domin no ninia hakarak ba ema. (Mateus 22:34-40) Tan neʼe, mai ita hotu hanoin didiʼak no hakaʼas an hodi la bele falta atu tuir Memoriál neʼe.
a Ema ebreu nia loron foun komesa no ramata iha tempu loro-matan monu.
b Jeremias 31:31, 33: “31 Jeová hatete: ‘Haree! Sei toʼo tempu sira-neʼe, tempu neʼebé haʼu sei halo aliansa foun ida ho Izraél nia umakain no Judá nia umakain.” “33 Neʼe mak aliansa neʼebé haʼu atu halo ho Izraél nia umakain iha tempu neʼebá, haʼu sei tau haʼu-nia ukun-fuan iha sira-nia laran, no iha sira-nia fuan mak haʼu sei hakerek ukun-fuan neʼe. No haʼu sei sai sira-nia Maromak, no sira sei sai haʼu-nia povu.”