Banati-tuir Jesus nia haraik-an no laran-sadiʼa
“Kristu rasik terus ba imi, no nia husik hela ezemplu atu imi laʼo tuir ninia ain-fatin ho didiʼak.”—1 PEDRO 2:21.
1. Tanbasá mak banati-tuir Jesus ajuda ita hakbesik ba Jeová?
BAIBAIN ita ema koko halo tuir ema neʼebé ita gosta. Jesus Kristu mak ezemplu neʼebé diʼak liu hotu ba ita atu banati-tuir. Tanbasá? Tanba Jesus hatete: “Ema neʼebé haree ona haʼu, haree ona mós Aman.” (João 14:9) Jesus hatete hanesan neʼe tanba nia banati-tuir ninia Aman nia hahalok iha buat hotu. Tan neʼe, bainhira ita aprende kona-ba Jesus, ita mós aprende kona-ba Jeová nia hahalok sira. No se ita banati-tuir Jesus ita bele hakbesik liután ba Jeová, Ida neʼebé boot liu hotu. Neʼe mak buat neʼebé kapás tebes!
2, 3. (a) Tanbasá mak Jeová hakarak ita atu hatene buat barak kona-ba Jesus nia moris? Nia hakarak ita atu halo saida? (b) Iha lisaun neʼe no ida tuirmai, ita sei koʼalia kona-ba saida?
2 Liuhusi Bíblia, Jeová fó-hatene buat barak kona-ba Jesus nia moris. Jeová halo nuneʼe tanba nia hakarak ita koñese didiʼak ninia Oan hodi ita bele banati-tuir nia. (Lee 1 Pedro 2:21.) Jesus nia ezemplu neʼebé nia fó ba ita, Bíblia kompara ida-neʼe hanesan ain-fatin. Neʼe katak sá? Jeová hakarak ita atu tuir Jesus nia ain-fatin, atu banati-tuir nia iha buat hotu neʼebé nia halo. Maibé tanba Jesus mak perfeitu, neʼe dehan katak ita presiza banati-tuir nia iha dalan perfeitu ka lae? Lae. Jeová hakarak ita hakaʼas an hodi banati-tuir Jesus tuir ita-nia kbiit.
3 Agora mai ita estuda kona-ba Jesus nia hahalok furak balu. Iha lisaun neʼe, ita sei koʼalia kona-ba Jesus nia haraik-an no laran-sadiʼa. Iha lisaun tuirmai, ita sei haree kona-ba ninia aten-brani no matenek. Ho hahalok ida-idak, ita sei buka resposta ba pergunta tolu: Hahalok neʼe mak saida? Oinsá mak Jesus hatudu hahalok neʼe? No oinsá mak ita bele banati-tuir nia?
JESUS HATUDU HARAIK-AN
4. Hahalok haraik-an envolve saida?
4 Haraik-an mak saida? Ema barak neʼebé foti-an hanoin se ita hatudu haraik-an, ita ema neʼebé fraku ka la fiar an. Maibé ida-neʼe la loos tanba atu sai ema haraik-an, ita presiza hatudu aten-brani. Ita mós presiza iha hanoin neʼebé loos kona-ba ita-nia an. Porezemplu, disionáriu ida kona-ba Bíblia hatete: “Haraik-an mak hatene katak ita kiʼik deʼit se kompara ho Maromak.” Se ita haraik an, ita sei la sente katak ita mak diʼak liu fali ema seluk. (Roma 12:3) Maski la fasil atu ita ema sala-naʼin hatudu hahalok neʼe, maibé ita bele aprende hatudu haraik-an hodi hanoin didiʼak kona-ba oinsá Jeová mak boot liu fali ita, no mós hodi banati-tuir Jesus nia ezemplu.
5, 6. (a) Sé mak arkanju Miguel? (b) Oinsá mak Miguel hatudu haraik-an?
5 Iha dalan saida deʼit mak Jesus hatudu haraik-an? Maromak nia Oan sempre hatudu haraik-an bainhira nia iha lalehan nuʼudar anju ho forsa boot, no mós nuʼudar ema sala-laek iha rai. Mai ita koʼalia kona-ba ezemplu balu.
6 Jesus hatudu haraik-an liuhusi dalan neʼebé nia hanoin kona-ba ninia an. Iha livru Judas ita bele lee kona-ba Jesus nia moris antes nia mai toʼo rai. (Lee Judas 9.) Jesus mak arkanju Miguel, neʼe katak ulun-naʼin ba anju sira hotu. Jesus “haksesuk malu ho Diabu kona-ba Moisés nia mate-isin”. Uluk, bainhira Moisés mate, Jeová hakoi ninia mate-isin iha fatin neʼebé ema ida la bele hetan. (Deuteronômio [Ulangan] 34:5, 6) Karik Diabu hakarak intenta ema Izraél hodi sira uza Moisés nia isin iha adorasaun falsu. Maibé ho brani Jesus hanetik Satanás atu halo nuneʼe. Livru ida kona-ba Bíblia hatete katak liafuan “haksesuk malu” mós iha arti kona-ba kazu iha tribunál. Neʼe bele fó ideia katak Miguel diskute kona-ba Satanás nia direitu atu foti Moisés nia mate-isin. Maibé Jesus hatene katak Jeová seidauk fó direitu tomak ba nia. Tan neʼe, nia entrega kazu neʼe ba Jeová, Tesi-Lia Naʼin Boot Liu Hotu, tanba nia deʼit mak iha direitu atu tesi lia ba Satanás. Ho ida-neʼe, Jesus hatudu haraik-an duni!
7. Oinsá mak Jesus hatudu nia ema haraik-an liuhusi ninia koʼalia no dalan nia halaʼo ninia moris?
7 Bainhira Jesus moris iha rai, dalan neʼebé nia koʼalia mós hatudu ninia haraik-an. Jesus lakohi atu ema fó glória ba nia, maibé nia hakarak ema hotu atu hahiʼi no fó glória ba ninia Aman. (Marcos 10:17, 18; João 7:16) Jesus nunka koʼalia ba ninia dixípulu sira iha dalan neʼebé hatún sira, maibé nia hatudu respeitu no gaba sira-nia hahalok diʼak. (Lucas 22:31, 32; João 1:47) Dalan neʼebé Jesus halaʼo ninia moris iha rai mós hatudu nia haraik an. Nia moris simples deʼit hodi la buka sasán barak. (Mateus 8:20) Nia kontente atu halo serbisu kiʼik neʼebé ema seluk lakohi halo. (João 13:3-15) Nia mós hatudu ezemplu diʼak kona-ba haraik-an tanba nia halo tuir Maromak. (Lee Filipe 2:5-8.) Ema foti-an sira la gosta halo tuir ema seluk, maibé Jesus ho haraik-an, maski atu mate mós nia hakarak nafatin halo tuir buat hotu neʼebé Jeová haruka nia. Ita fiar duni katak Jesus mak ema haraik an, loos ka lae?—Mateus 11:29.
BANATI-TUIR JESUS NIA HARAIK-AN
8, 9. Oinsá mak ita bele hatudu haraik-an?
8 Oinsá mak ita bele banati-tuir Jesus nia haraik-an? Dalan ida mak liuhusi ita-nia hanoin kona-ba ita-nia an. Se ita mak ema haraik-an, ita hatene ita la iha direitu hotu. Tan neʼe, ita sei la tesi lia ba ema seluk no la kritika sira ka deskonfia buat neʼebé sira halo. (Lucas 6:37; Tiago 4:12) Haraik-an sei ajuda ita hodi ita la sai “ema neʼebé loos liu”. Neʼe dehan katak ita sei la haree ita-nia an hanesan diʼak liu fali ema seluk. (Eclesiastes [Pengkhotbah] 7:16) Katuas kongregasaun sira mós la haree sira-nia an importante liu fali sira-nia maluk sira. Maibé bibi-atan sira-neʼe ‘haree ema seluk boot liu sira’.—Filipe 2:3; Lucas 9:48.
9 Hanoin toʼok kona-ba irmaun Walter Thorn neʼebé komesa serbí nuʼudar katuas área nian iha tinan 1894. Serbí tiha ba tinan barak nuʼudar katuas área nian, nia simu fali knaar atu tau matan ba manu sira iha Betel iha Novaiorke. Iha tempu neʼebé irmaun Thorn sente nia serve atu halo serbisu neʼebé importante liu ida-neʼe, nia dehan ba ninia an: “Hei, ó rai-rahun musan oan neʼe, ó foti-an kona-ba saida?” (Lee Isaías [Yesaya] 40:12-15.a) Nia hatudu haraik-an tebes!
10. Oinsá mak ita bele hatudu haraik-an liuhusi ita-nia koʼalia no dalan neʼebé ita halaʼo moris?
10 Ita hatudu haraik-an neʼebé loos liuhusi dalan neʼebé ita koʼalia ba ema seluk. (Lucas 6:45) Bainhira ita koʼalia ho ema seluk, ita lakohi gaba an hodi koʼalia kona-ba ita rasik nia priviléjiu sira ka buat sira neʼebé ita halo. (Provérbios [Amsal] 27:2) Maibé ita hakarak gaba ita-nia irmaun-irmán sira kona-ba sira-nia hahalok diʼak no buat diʼak neʼebé sira halo. (Provérbios [Amsal] 15:23) Ita mós bele hatudu haraik-an liuhusi dalan neʼebé ita halaʼo ita-nia moris. Ema kristaun neʼebé haraik an hili atu moris simples deʼit hodi la hetan naran-boot ka buka atu sai ema importante. Ita kontente halo serbisu neʼebé simples hodi bele iha tempu barak liu atu serbí Jeová. (1 Timóteo 6:6, 8) Liután neʼe, ita hatudu haraik-an hodi halo tuir ‘sira neʼebé dirije ita’ iha kongregasaun no simu matadalan neʼebé Jeová nia organizasaun fó ba ita.—Ebreu 13:17.
JESUS HATUDU LARAN-SADIʼA
11. Laran-sadiʼa envolve saida?
11 Laran-sadiʼa mak parte ida husi domin. Eskritura sira hatudu katak Jeová no Jesus sempre hatudu laran-sadiʼa no domin. (Lucas 1:78; 2 Korinto 1:3; Filipe 1:8) Livru ida kona-ba Bíblia hatete katak hahalok neʼe laʼós deʼit sente koitadu ba susar neʼebé ema hasoru, maibé ita hanoin tebes sira toʼo ita-nia laran book ita atu halo buat ruma hodi ajuda sira. Ho hahalok laran-sadiʼa, ita bele ajuda ema sai husi sira-nia situasaun susar.
12. Oinsá ita hatene Jesus sente laran-sadiʼa ba ema, no hahalok neʼe book nia atu halo saida?
12 Jesus hatudu laran-sadiʼa liuhusi ninia sentimentu no buat neʼebé nia halo. Porezemplu, bainhira nia haree Maria no sira seluk tanis tanba Lázaro mate, Jesus mós tanis ho sira. (Lee João 11:32-35.) Domin neʼe book nia atu fó moris-hiʼas ba Lázaro, hanesan uluk nia halo feto-faluk ida nia oan-mane moris-hiʼas. (Lucas 7:11-15; João 11:38-44) Tanba Jesus nia domin no laran-sadiʼa neʼe, Jesus fó oportunidade ba Lázaro atu hetan esperansa atu bá lalehan. Iha tempu seluk, Jesus “hanoin tebetebes” ema lubun-boot neʼebé mai buka nia. Ninia domin no laran-sadiʼa book nia atu “hanorin sira buat barak”. (Marcos 6:34) Ba ema neʼebé halo tuir Jesus nia hanorin, neʼe ajuda duni sira-nia moris. Loos duni, Jesus nia laran-sadiʼa laʼós deʼit sentimentu ida, maibé ninia hahalok neʼe mós book nia atu fó ajuda ba ema neʼebé presiza ajuda.—Mateus 15:32-38; 20:29-34; Marcos 1:40-42.
13. Oinsá mak Jesus hatudu laran-sadiʼa iha dalan neʼebé nia koʼalia ba ema seluk? (Haree dezeñu iha pájina 5.)
13 Jesus mós hatudu ninia laran-sadiʼa liuhusi dalan neʼebé nia koʼalia ba ema seluk, liuliu sira neʼebé terus. Apóstolu Mateus koʼalia kona-ba Jesus hodi temi fali Isaías nia liafuan. Isaías dehan: “Nia sei la halo tohar duʼut-kain neʼebé kleʼuk ona, no nia sei la hamate ahi-oan neʼebé besik atu mate.” (Isaías [Yesaya] 42:3; Mateus 12:20) Ninia liafuan sira-neʼe kona-ba saida? Jesus koʼalia iha dalan neʼebé halo ema sente kmaan. Nia haklaken mensajen kona-ba esperansa ba ema neʼebé laran-kanek. (Isaías [Yesaya] 61:1) Ema neʼebé ‘kole tan serbisu makaʼas no lori naha todan’, nia konvida sira atu hakbesik ba nia hodi hetan kmaan. (Mateus 11:28-30) Nia fó fiar ba ninia dixípulu sira katak Maromak hanoin tebes sira ida-idak, inklui mós sira neʼebé ema seluk ladún respeitu ka hafolin.—Mateus 18:12-14; Lucas 12:6, 7.
BANATI-TUIR JESUS NIA LARAN-SADIʼA
14. Oinsá mak ita bele hatudu katak ita sente laran-sadiʼa ba ema?
14 Oinsá mak ita bele banati-tuir Jesus nia laran-sadiʼa? Sentimentu laran-sadiʼa, hanesan Jesus nian, tenkesér mai husi ita-nia laran. Karik ba ita balu, ita moris mai la hatene oinsá atu hatudu sentimentu neʼe ba ema, maibé Bíblia hakarak ita atu haburas hahalok neʼe. Nó mós Jeová hakarak ita ema kristaun atu hatudu “domin ho laran-sadiʼa” tanba hahalok neʼe mak parte husi hahalok foun neʼebé Bíblia temi. (Lee Koloso 3:9, 10, 12.) Atu bele iha laran-sadiʼa ba ema, Bíblia dehan ba ita atu ‘loke luan ita-nia laran bá’. (2 Korinto 6:11-13) Rona didiʼak bainhira ema fó sai sira-nia sentimentu no hanoin. (Tiago 1:19) Husu ba ita-nia an: ‘Se haʼu mak iha ninia situasaun, haʼu sente oinsá? Haʼu presiza saida?’—1 Pedro 3:8.
15. Saida mak ita bele halo atu ajuda sira neʼebé terus ka laran-susar?
15 Dalan ida tan ita hatudu laran-sadiʼa mak liuhusi buat neʼebé ita halo. Laran-sadiʼa sei book ita atu ajuda ema seluk, liuliu sira neʼebé terus ka laran-susar. Oinsá mak ita bele ajuda sira? Eskritura iha Roma 12:15 hatete: “Tanis ho sira neʼebé tanis.” Dala barak, ema hakarak deʼit ema seluk fó konsola ba sira, duké buka lalais solusaun. Sira presiza belun ida neʼebé bele komprende sira no hakarak rona sira. Bainhira irmán ida nia oan-feto mate, ninia maluk kristaun sira ajuda fó kmaan ba nia. Nia hatete: “Dala ruma haʼu-nia belun sira vizita haʼu no tuur hodi tanis hamutuk ho haʼu. Haʼu hafolin tebes ida-neʼe.” Iha mós buat seluk neʼebé ita bele halo hodi hatudu ita-nia laran-sadiʼa. Porezemplu, karik ita bele ajuda feto-faluk ida hadiʼa buat ruma iha ninia uma. Ka, ita-nia maluk neʼebé idade ona, ita bele ajuda lori nia ba reuniaun, haklaken, ka ba fatin seluk hanesan ba konsulta. Buat kiʼik deʼit neʼebé ita halo ba ema mós bele halo sira kontente. (1 João 3:17, 18) Maibé liután neʼe, ita hatudu laran-sadiʼa hodi hola parte atu haklaken liafuan diʼak. Ida-neʼe mak dalan diʼak liu ita bele ajuda ema nia moris.
Ita hatudu katak ita hanoin tebes ita-nia maluk sira ka lae? (Haree parágrafu 15)
16. Saida mak ita bele hatete atu anima ema neʼebé laran-tun?
16 Tanba ita hanoin tebes ema seluk, ida-neʼe sei kona dalan neʼebé ita koʼalia. Ita-nia laran sei book ita atu “fó laran-manas ba sira neʼebé laran-tun”. (1 Tesalónika 5:14) Saida mak ita bele hatete atu anima sira? Ita bele dehan katak ita hadomi tebes sira. Ita bele gaba sira hodi ajuda sira haree katak sira mós iha hahalok furak. Ita bele fó-hanoin katak sira folin-boot iha Jeová nia matan, tanba nia mak dada sira. (João 6:44) Ita mós bele fó fiar ba sira katak Jeová hadomi tebes ninia atan sira neʼebé ‘laran-triste no laran-kraik’. (Salmo [Mazmur] 34:18) Ita-nia liafuan bele ajuda duni ema neʼebé laran-tun.—Provérbios (Amsal) 16:24.
17, 18. (a) Oinsá mak Jeová hakarak katuas kongregasaun sira atu trata ninia bibi sira? (b) Ita sei koʼalia kona-ba saida iha lisaun tuirmai?
17 Katuas kongregasaun sira, Jeová hakarak imi hatudu laran-sadiʼa ba ninia bibi sira. (Apóstolu 20:28, 29) La bele haluha katak responsabilidade atu hanorin, anima no fó kmaan ba irmaun-irmán sira mak imi-nian. (Isaías [Yesaya] 32:1, 2; 1 Pedro 5:2-4) Nuneʼe, katuas sira neʼebé hatudu domin no laran-sadiʼa sei la buka atu kontrola ninia maluk sira hodi halo lei oioin ka obriga sira halo buat neʼebé sira la bele. Katuas kongregasaun sira sei hakaʼas an halo sira-nia maluk hotu kontente, no sira fiar katak irmaun-irmán sira-nia domin ba Jeová sei book sira atu fó ba Jeová buat hotu neʼebé sira bele.—Mateus 22:37.
18 Se ita hanoin didiʼak kona-ba Jesus nia haraik-an no laran-sadiʼa, neʼe tenkesér book ita atu laʼo tuir nafatin ninia ain-fatin. Iha lisaun tuirmai, ita sei koʼalia kona-ba oinsá mak ita bele banati-tuir Jesus nia aten-brani no matenek.
[Nota–rodapé]
a Isaías 40:12-15: “12 Sé mak sukat bee iha ninia liman-tanen, no sukat lalehan ho nia liman no sukat mundu nia rai-rahun, ka tetu foho aas no foho-oan sira iha dasin? 13 Sé mak sukat ona Jeová nia espíritu, no sé mak bele sai ninia konsellu-naʼin hodi hanorin nia? 14 Nia husu ba sé atu hetan komprensaun, ka sé mak hanorin nia dalan justisa nian, ka hanorin koñesimentu ba nia, ka hatudu ba nia oinsá atu hetan komprensaun neʼebé loos? 15 Haree! Nasaun hotu hanesan bee turuk ida husi balde, no hanesan rai-rahun mihis iha dasin leten. Haree! Nia hiʼit illa sira hanesan sira rai-rahun deʼit.”