Banati-tuir Ida neʼebé promete moris rohan-laek

1. Kbiit saida mak bele ajuda ita atu banati-tuir Jeová?

JEOVÁ kria ita ema ho kbiit atu bele komprende ema seluk nia situasaun maski ita rasik seidauk koko situasaun neʼe iha moris. (Lee Éfeso 5:1, 2.) Oinsá mak kbiit ida-neʼe bele ajuda ita atu banati-tuir Jeová? No mós tanbasá mak ita tenke kuidadu atu uza didiʼak kbiit neʼe?

2. Jeová sente oinsá bainhira ita hasoru susar ruma?

² Jeová halo promete furak ida ba futuru. Nia promete katak ema kose-mina sira sei simu bensaun atu moris la bele mate tan iha lalehan, no “bibi seluk” sei moris ba nafatin iha rai. (João 10:16; 17:3; 1 Korinto 15:53) Maski nuneʼe, Jeová komprende nafatin kona-ba ita-nia sentimentu bainhira ita hasoru susar ruma iha ita-nia moris ohin loron. Hanesan iha tempu uluk, bainhira Jeová haree ema Izraél moris terus iha rai-Ejitu, “ninia laran susar tebes”. (Isaías [Yesaya] 63:9) No bainhira ema judeu sira harii hela templu, inimigu sira kontra makaʼas sira no sira sai taʼuk tebes. Jeová komprende ka lae kona-ba sira-nia sentimentu neʼe? Maromak fó-hatene ba sira: “Sé deʼit neʼebé mak book imi book haʼu-nia matan-fuan.” (Zacarias [Zakharia] 2:8) Hanesan ho inan nia domin ba ninia bebé, Jeová mós iha domin hanesan neʼe ba ninia povu no nia hakarak tebes atu ajuda sira. (Isaías [Yesaya] 49:15) Se ita komprende kona-ba ema nia sentimentu bainhira sira hasoru hela situasaun ruma, neʼe hatudu katak Ita mós banati-tuir Jeová nia domin.—Salmo (Mazmur) 103:13, 14.

JESUS HALENO JEOVÁ NIA DOMIN

3. Jesus iha sentimentu saida? Esplika toʼok.

³ Jesus mós komprende kona-ba ema nia sentimentu bainhira ema hasoru susar ruma maski Jesus rasik seidauk hasoru situasaun neʼe. Porezemplu, relijiaun nia ulun-naʼin sira lohi povu no halo lei barak hodi hanehan sira, tan neʼe povu baibain taʼuk sira no sempre moris iha terus laran. Maski Jesus nunka taʼuk ka husik relijiaun nia ulun sira bosok nia, maibé nia komprende katak neʼe mak povu baibain nia sentimentu. (Mateus 23:4; Marcos 7:1-5; João 7:13) Jesus nia laran sente moras tebes bainhira nia haree povu iha moris hanesan neʼe. Tan neʼe mak “kuandu nia haree ema-lubun neʼe, nia hanoin tebes sira, tanba nia haree katak ema hanehan no la tau matan ba sira, no sira hanesan bibi neʼebé bibi-atan la iha”. (Mateus 9:36) Jesus hanesan duni ho ninia Aman “laran-sadiʼa no laran-diʼak”.—Salmo (Mazmur) 103:8.

4. Jesus halo saida bainhira nia komprende katak ema presiza ninia ajuda?

⁴ Hanesan ho Jeová, Jesus mós iha domin ba ema. Se nia mak haree ema moris iha susar laran, ninia domin book nia atu fó ajuda ba ema sira-neʼe. Porezemplu, iha loron ida Jesus nia apóstolu sira fila husi haklaken. Sira sente kole tebes tanba sira laʼo dook. Tan neʼe sira atu bá buka fatin mesamesak ida hodi bele deskansa uitoan. Maibé tanba Jesus haree iha ema-lubun boot ida mak hein hela nia atu husu ajuda, Jesus “hahú hanorin sira buat barak”, tanba nia hanoin tebes sira.—Marcos 6:30, 31, 34.

DALAN ATU BANATI-TUIR JEOVÁ NIA DOMIN

5, 6. Se ita hakarak banati-tuir Jeová, ita tenke halo saida? Fó toʼok ezemplu. (Haree dezeñu iha pájina 24.)

⁵ Se ita hakarak halo tuir Jeová nia domin, ita tenke halo saida deʼit? Mai ita haree ezemplu ida. Iha irmaun joven ida naran Alex. Nia hanoin hela kona-ba irmaun ida neʼebé idade boot ona. Irmaun neʼe matan ladún diʼak ona, kusta tebes ba nia atu bele lee. Nia mós sente kusta tebes atu laʼo bá haklaken husi uma ba uma. Husi neʼe Alex hanoin kona-ba Jesus nia liafuan neʼebé dehan: “Buat neʼebé imi hakarak ema halo ba imi, halo mós nuneʼe ba sira.” (Lucas 6:31) Entaun Alex husu ba ninia an: ‘Saida mak haʼu hakarak ema atu halo ba haʼu?’ Nia rasik nia hatán mak: ‘Haʼu hakarak ema atu tebe bola ho haʼu!’ Maibé irmaun neʼe la bele halimar ho nia. Entaun, tuir loloos Alex tenke husu ba ninia an, ‘Se haʼu mak irmaun neʼe, haʼu hakarak ema seluk halo saida ba haʼu?’

⁶ Maski Alex sei klosan, seidauk koko ema idade nia situasaun, maibé nia bele hanoin didiʼak ba irmaun neʼe nia moris no rona didiʼak bainhira nia hatoʼo ninia sentimentu. Neineik-neineik nia bele komprende katak susar duni ba irmaun neʼe atu lee no laʼo husi uma ba uma. Se Alex mak komprende ona irmaun neʼe nia situasaun, neʼe sei book nia atu ajuda irmaun neʼe. Ita mós bele halo hanesan neʼe atu banati-tuir Jeová nia domin. Ita tenke tau ita-nia an iha ema seluk nia situasaun.—1 Korinto 12:26.

7. Atu komprende kona-ba irmaun-irmán sira-nia susar, ita presiza halo saida?

⁷ Se ema ida mak kona susar ruma, maibé ita rasik seidauk kona susar neʼe, karik ita la bele komprende ema seluk nia susar. Porezemplu, irmaun-irmán barak hasoru daudaun susar neʼebé mai husi moras ka hetan asidente ruma ka tanba problema ho idade nian. Balu karik hasoru daudaun depresaun, neon taridu ka laran la hakmatek, no balu iha esperiénsia moris neʼebé moruk husi tempu uluk. Balu tan hasoru problema neʼebé mai husi família neʼebé fiar la hanesan ka susar neʼebé inan mesak ka aman mesak hasoru tanba ema ida deʼit mak presiza haboot oan. Ema hotu iha sira-nia problema rasik, no problema ema ida-idak nian la hanesan. Entaun, oinsá mak ita bele banati-tuir Jeová nia domin atu ajuda ema sira-neʼe? Ita tenke rona didiʼak bainhira sira koʼalia ho ita atu ita bele komprende sira-nia situasaun. Se ita halo nuneʼe, ita mós bele hatene oinsá mak ita bele ajuda sira. Karik ita bele fó-hanoin sira oinsá mak Jeová sente kona-ba sira-nia situasaun neʼe ka buka dalan atu fó ajuda. Se ita halo nuneʼe, ita halo tuir duni Jeová nia domin.—Lee Roma 12:15; 1 Pedro 3:8.

BANATI-TUIR JEOVÁ NIA LARAN-DIʼAK

8. Jesus sempre halo saida atu nia bele hatudu laran-diʼak ba ema?

⁸ Jeová hatudu laran-diʼak ba ema hotu. (Lucas 6:35) Jesus mós hatudu laran-diʼak ba ema hanesan Jeová. Maibé, saida mak ajuda Jesus atu bele halo nuneʼe? Nia sempre hanoin uluk oinsá mak buat neʼebé nia halo ka koʼalia bele kona ema nia sentimentu. Porezemplu, loron ida, feto ida hakbesik ba Jesus. Tanba uluk nia halo sala barak, tan neʼe nia sente triste toʼo ninia matan-been suli no halo bokon Jesus nia ain. Jesus haree katak nia sente triste tebes ba buat sira neʼebé uluk nia halo no agora nia arrepende an ona ba ninia sala sira. No Jesus hatene katak se nia la hatudu laran-diʼak ba feto neʼe, neʼe bele halo feto neʼe sente triste liután. Entaun, Jesus gaba nia tanba nia arrepende an ona no fó perdua nia. Bainhira ema farizeu ida haree kona-ba neʼe, nia hirus. Maibé Jesus koʼalia nafatin ho laran-diʼak ba ema farizeu neʼe.—Lucas 7:36-48.

9. Oinsá mak ita bele halo tuir Jeová nia laran-diʼak? Fó toʼok ezemplu ida.

⁹ Oinsá mak ita bele banati-tuir Jeová hodi hatudu laran-diʼak ba ema? Antes atu halo ka koʼalia buat ruma, diʼak atu hanoin uluk lai atu ita la bele hakanek ema seluk nia sentimentu. Apóstolu Paulo hatete katak: “Naʼi nia atan la presiza haksesuk malu, maibé tenke hatudu laran-diʼak ba ema hotu.” (2 Timóteo 2:24) Tan neʼe, hanoin toʼok oinsá mak ita bele hatudu laran-diʼak iha ezemplu sira tuirmai neʼe: Ita sei halo saida se ita-nia manajer la halaʼo didiʼak ninia serbisu? Se irmaun ida mak falta reuniaun kleur ona no nia foin mai tuir fali reuniaun, ita sei koʼalia saida ba nia? Se uma-naʼin ida hatete katak agora nia la iha tempu atu koʼalia ho ita, ita sei halo saida? Se ita-nia kaben hatete ba ita tanbasá mak ita halo planu maibé la fó-hatene nia, ita sei koʼalia didiʼak fali ba nia ka lae? Ita presiza hatene oinsá ita-nia liafuan ka buat neʼebé ita halo ba ema bele kona sira-nia sentimentu. Tan neʼe ita tenke kuidadu ho buat neʼebé ita atu halo ka koʼalia hodi ita bele banati-tuir Jeová nia laran-diʼak.—Lee Provérbios (Amsal) 15:28.a

BANATI-TUIR MAROMAK NIA MATENEK

10, 11. Oinsá mak ita bele halo tuir Jeová nia matenek? Fó toʼok ezemplu ida.

¹⁰ Jeová mak matenek liu hotu, no se nia hakarak, nia bele hili atu haree buat hotu neʼebé atu akontese iha futuru. Ita ema laiha matenek hanesan Jeová nian, maibé ita bele uza ita-nia kbiit hodi siʼik saida mak sei akontese se ita halo buat ruma. Porezemplu, antes atu halo desizaun ruma, ita bele haree oinsá mak ita-nia desizaun neʼe bele kona mós ema seluk. Tan neʼe mak bainhira koʼalia kona-ba ema Izraél sira, Moisés dehan: “Sira mak nasaun neʼebé laiha sentimentu, no sira laiha matenek. Se sira mak matenek karik, sira sei hanoin didiʼak kona-ba neʼe. Sira sei tetu didiʼak kona-ba rezultadu husi sira-nia hahalok.” (Deuteronômio [Ulangan] 32:28, 29) Maibé ema Izraél la hanoin kona-ba konsekuénsia saida mak sira sei hetan se sira la halo tuir Jeová. Sira nunka hanoin kona-ba sira-nia relasaun ho Jeová no buat hotu neʼebé nia halo ba sira. Moisés bele haree duni katak iha futuru, ema Izraél sira sei halo buat neʼebé Jeová la gosta.—Deuteronômio (Ulangan) 31:29, 30.

¹¹ Ita mós presiza tetu didiʼak ka hanoin kona-ba konsekuénsia ruma neʼebé ita bele hetan husi ita-nia hahalok ruma. Porezemplu, se ita mak namora hela, ita presiza rekoñese katak hakarak seksuál ba malu bele sai makaʼas. Tan neʼe ita tenke kuidadu atu la halo buat neʼebé mak bele estraga ita-nia relasaun diʼak ho Jeová! Ita presiza rona ba Jeová nia liafuan neʼebé dehan: “Ema neʼebé matenek haree perigu no subar an, maibé ema neʼebé ladún iha esperiénsia kontinua laʼo no hetan susar.”—Provérbios (Amsal) 22:3.

HASEES AN HUSI HANOIN NEʼEBÉ LORI PERIGU

12. Oinsá mak buat neʼebé ita hanoin bele estraga ita?

¹² Ema neʼebé matenek rekoñese katak kbiit atu hanoin bele ajuda ita ka estraga ita hanesan ahi. Ita bele uza ahi atu teʼin hahán. Maibé se ita la kuidadu, ahi bele han ita-nia uma tomak no bele oho ita. Hanesan neʼe mós bainhira ita uza kbiit hanoin nian atu banati-tuir Jeová, neʼe buat neʼebé diʼak. Maibé se ita uza kbiit neʼe atu hanoin fali ba buat la morál nian, neʼe sei estraga ita. Porezemplu, se ita mak hanoin beibeik kona-ba hakarak seksuál nian, hanoin neʼe bele sai makaʼas toʼo halo ita monu ba hahalok sala-foʼer. Hanoin foʼer bele duni estraga ita-nia relasaun ho Jeová.—Lee Tiago 1:14, 15.

13. Eva iha hanoin sala saida?

¹³ Ezemplu ida mak kona-ba Eva. Jeová fó mandamentu ba Adão no Eva atu labele han husi “ai-hun koñesimentu nian kona-ba diʼak no aat”. (Gênesis [Kejadian] 2:16, 17) Maibé Satanás hatete ba Eva: “Imi sei la mate. Tanba Maromak hatene katak iha loron neʼebé imi han ai-fuan husi ai-hun ida-neʼe, imi-nia matan sei nakloke no imi sei sai hanesan Maromak hodi hatene diʼak no aat.” Eva “haree katak ai-hun neʼe diʼak nuʼudar ai-han no katak neʼe mak buat neʼebé matan kaan, sin, ai-hun neʼe diʼak tebes atu haree. Tan neʼe nia kuʼu ai-fuan husi ai-hun neʼe no han. Depois nia mós fó balu ba nia laʼen kuandu hamutuk ho nia no nia mós komesa atu han”. (Gênesis [Kejadian] 3:1-6) Ba Eva, buat neʼebé Satanás hatete mak rona diʼak tebes. Nia hanoin nia bele halo desizaun rasik kona-ba buat neʼebé diʼak ka aat duké rona ba Jeová. Tuir loloos nia tenke hapara kedas hanoin neʼebé sala, maibé nia la halo hanesan neʼe. Rezultadu mak “sala tama iha mundu, no mate tanba sala”.—Roma 5:12.

14. Bíblia fó avizu saida deʼit kona-ba sala-foʼer?

¹⁴ Maski Eva nia sala laʼós kona-ba sala-foʼer, maibé Bíblia fó avizu atu ita labele hanoin ka imajina kona-ba hahalok sala-foʼer nian. Jesus hatete: “Ema neʼebé hateke beibeik ba feto ida toʼo kaan nia, ema neʼe halo ona sala-foʼer ho feto neʼe iha ninia laran.” (Mateus 5:28) Apóstolu Paulo mós fó avizu: “Keta planu nanis kona-ba oinsá atu halo hakarak isin nian.”—Roma 13:14.

15. Rikusoin hanesan saida mak ita hakarak halibur, no tanbasá?

¹⁵ Perigu ida tan mak kona-ba hanoin beibeik atu sai riku duké halo buat neʼebé Jeová gosta. Maski ema ida riku tebes mós, ninia osan la bele proteje nia. (Provérbios [Amsal] 18:11) Jesus hatete katak se ema ida mak halibur rikusoin barak ba ninia an maibé la tau Jeová uluk iha ninia moris, ema neʼe beik, tanba nia “la sai riku ba Maromak”. (Lucas 12:16-21) Bainhira ita halibur “rikusoin iha lalehan” no halo buat neʼebé Jeová gosta, ita halo kontente nia no ita mós kontente. (Mateus 6:20; Provérbios [Amsal] 27:11) Ita-nia relasaun diʼak ho Jeová mak folin boot liu sasán hotu.

KETA HANOIN RESIN

16. Bainhira ita sente laran-taridu, saida mak bele ajuda ita?

¹⁶ Imajina beibeik atu sai riku iha mundu neʼe bele halo ita hanoin resin. (Mateus 6:19) Jesus hatete katak susar tebes ba ema ida atu buka uluk Maromak nia Ukun se nia mak sempre hanoin kona-ba osan. (Mateus 13:18, 19, 22) Ema balu laʼós hanoin osan, maibé taʼuk kona-ba se buat aat ruma sei kona sira. Hanoin resin ba buat sira-neʼe bele halo moras no bele mós halo lakon ita-nia fiar ba Jeová. Ita tenke tau fiar ba Jeová tanba nia bele ajuda ita. Bíblia dehan: “Laran-taridu iha ema nia fuan mak hatodan nia, maibé liafuan neʼebé diʼak halo ema nia laran-haksolok.” (Provérbios [Amsal] 12:25) Tan neʼe, se ita laran-taridu ba buat ruma, koʼalia ba irmaun ka irmán ida neʼebé hatene didiʼak ita. Hanesan ita-nia inan-aman, kaben, ka belun neʼebé diʼak sei anima ita atu tau fiar ba Jeová hodi ita bele hamenus ita-nia laran-taridu.

17. Oinsá mak Jeová ajuda ita tahan hasoru laran-taridu?

¹⁷ La iha ema ida mak bele komprende ita diʼak liu fali Jeová. Tan neʼe apóstolu Paulo hatete: “Keta laran-taridu kona-ba buat ida, maibé iha buat hotu hatoʼo imi-nia laran-susar ba Maromak liuhusi orasaun no harohan no mós fó-agradese; no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin liuhusi Kristu Jesus.” (Filipe 4:6, 7) Nuneʼe mak bainhira ita sente laran-taridu, diʼak atu hanoin kona-ba ajuda neʼebé ita bele hetan husi Jeová atu ajuda ita iha relasaun neʼebé metin nafatin ho nia. Ajuda sira-neʼe bele mai husi irmaun-irmán sira, katuas sira, atan laran-metin no matenek, anju sira, no Jesus.

18. Kbiit atu hanoin ajuda ita iha dalan saida deʼit?

¹⁸ Hanesan ita aprende ona, ita-nia kbiit atu hanoin bele ajuda ita banati-tuir Jeová nia hahalok sira, hanesan domin. (1 Timóteo 1:11; 1 João 4:8) Ita-nia moris sei sai kontente liután bainhira ita hatudu domin no pasiénsia ba ema seluk, bainhira ita hanoin didiʼak kona-ba rezultadu husi ita-nia hahalok sira, no la hanoin resin ba buat neʼebé mak bele halo ita lakon ita-nia solok. Mai ita uza didiʼak kbiit neʼebé Maromak fó mai ita atu hanoin ka imajina kona-ba ita-nia esperansa sira iha futuru no hodi halo tuir Jeová ho ita-nia forsa tomak.—Roma 12:12.