Anti-Kristu mak sé loos?

HUSI tempu uluk toʼo ohin loron, ema temi beibeik liafuan “anti-Kristu”. Maibé ita-nia pergunta mak: Anti-Kristu mak sé loos? Neʼe kona duni ita-nia moris ohin loron ka lae? Mai ita buka-hatene resposta ba pergunta sira-neʼe husi Bíblia. Tuir loloos, liafuan “anti-Kristu” mosu dala lima deʼit iha Bíblia laran.

ANTI-KRISTU MAK SÉ?

Iha Bíblia laran, apóstolu João deʼit mak temi liafuan “anti-Kristu”. João uza liafuan neʼe atu koʼalia kona-ba saida? Iha ninia karta primeiru, nia dehan: “Oan sira, ida-neʼe mak tempu nia rohan, no hanesan imi rona ona katak Kristu nia inimigu [ka, anti-Kristu] sei mosu mai, ohin Kristu nia inimigu barak mosu ona; ho ida-neʼe ita hatene katak agora mak tempu nia rohan. Uluk sira hamutuk ho ita maibé sira husik hela ita . . . Ema bosok-teen mak ida neʼebé nega katak Jesus mak Kristu, loos ka lae? Nia mak Kristu nia inimigu, ida neʼebé nega Aman no Oan-Mane.”—1 João 2:18, 19, 22.

Liafuan hirak-neʼe hatudu saida mai ita? João dehan ‘anti-Kristu barak’, neʼe katak anti-Kristu mak laʼós kona-ba ema ida deʼit, maibé neʼe kona-ba ema barak, ka organizasaun ruma neʼebé habelar lia-bosok, ka nega Jesus nuʼudar Kristu ka Mesias, no koko atu troka lia-loos kona-ba Maromak no nia Oan-Mane Jesus Kristu. Liután neʼe, ema sira neʼebé anti-Kristu dala ruma temi sira-nia an mak Kristu ka ninia dixípulu, maibé tanba sira “husik hela” ema kristaun loos, tan neʼe, sira la fó sai buat loos tuir Bíblia nia hanorin. Grupu anti-Kristu neʼe mosu ona husi tempu neʼebé apóstolu João hakerek ninia karta neʼe, katak iha “tempu nia rohan” bainhira apóstolu ikus sira besik atu mate.

João mós hakerek saida tan kona-ba anti-Kristu? Kona-ba profeta falsu sira, nia dehan: “Mensajen hotu neʼebé fó sai kona-ba Jesus Kristu nuʼudar ida neʼebé mai iha isin mak mensajen neʼebé husi Maromak. Maibé mensajen hotu neʼebé la fó sai kona-ba Jesus la mai husi Maromak. Liután neʼe, ida-neʼe mak mensajen husi Kristu nia inimigu [ka, anti-Kristu], ida neʼebé imi rona ona katak atu mai, no agora nia mosu ona iha mundu neʼe.” (1 João 4:2, 3) Tuirmai, iha ninia karta segundu, João hakerek tan: “Lohidór barak mosu ona iha mundu, no sira la fiar Jesus Kristu nuʼudar ida neʼebé mai iha isin. Ema neʼebé halo nuneʼe mak nuʼudar lohidór no Kristu nia inimigu [ka, anti-Kristu].” (2 João 7) João uza liafuan “anti-Kristu” atu koʼalia kona-ba ema sira neʼebé habelar lia-bosok kona-ba Jesus Kristu no Jesus nia hanorin

“PROFETA FALSU” NO “MANE NEʼEBÉ AAT”

Tinan barak antes João hakerek kona-ba lohidór sira-neʼe, Jesus Kristu hatete ona ba ninia dixípulu sira: “Matan-moris kona-ba profeta falsu sira neʼebé mosu ba imi hodi hatais hanesan bibi-malae, maibé tuir loloos, sira hanesan asu-fuik.” (Mateus 7:15) Apóstolu Paulo mós fó avizu nanis ba nia maluk kristaun sira iha Tesalónika, dehan: “Keta husik ema ida lohi imi kona-ba buat naran deʼit, tanba [Jeová nia loron] sei la mai antes sira neʼebé kontra lia-loos mosu uluk no mane neʼebé aat hatudu sai nia an; nia mak ida neʼebé sei halakon tiha.”—2 Tesalónika 2:3.

Iha apóstolu sira-nia tempu, profeta falsu no ema neʼebé kontra lia-loos mosu ona iha kongregasaun kristaun nia leet, sira koko atu estraga ema kristaun loos nia fiar. Ema sira neʼebé habelar lia-bosok kona-ba Jesus Kristu no halo kleʼuk Jesus nia hanorin, sira-neʼe mak grupu “anti-Kristu”. Maromak Jeová la simu duni sira, tan neʼe mak apóstolu Paulo bolu grupu neʼe nuʼudar “ida neʼebé sei halakon tiha”.

KUIDADU BA ANTI-KRISTU OHIN LORON

Oinsá ho ohin loron? Toʼo ohin loron, ema no organizasaun sira neʼebé sai anti-Kristu kontinua kontra nafatin Kristu no ninia hanorin. Sira ho neon habelar hanorin falsu kona-ba Aman Maromak Jeová no Ninia Oan Jesus Kristu. Tan neʼe, ita presiza kuidadu nafatin kona-ba hanorin bosok sira-neʼe. Mai ita hanoin kona-ba ezemplu rua.

Ba tinan atus ba atus ona, igreja sira hanorin doutrina Trindade, katak Aman ho Oan mak ida deʼit no sira naʼin-rua mak hanesan deʼit. Anti-Kristu nia hanorin hirak-neʼe sai hanesan mistériu ida neʼebé halo ema barak la bele hatene ho loloos kona-ba Aman Maromak Jeová no ninia Oan-Mane Jesus Kristu. Doutrina neʼe hanetik ema laran-moos sira neʼebé hakarak banati-tuir Jesus Kristu no hakbesik ba Maromak tuir Bíblia nia matadalan.—1 Korinto 11:1; Tiago 4:8.

Igreja sira mós taka dalan ba ema atu hatene ho loloos kona-ba Maromak tanba sira uza tradusaun Bíblia neʼebé hasai tiha Maromak nia naran Jeová, maski loloos Bíblia iha lia orijinál temi Maromak nia naran Jeová maizumenus dala 7.000. Sin, tanba igreja hasai tiha Maromak nia naran, neʼe halo susar liu ba ema atu hatene lia-loos kona-ba Maromak neʼebé loos.

Maibé, bainhira ema laran-moos sira hatene Maromak nia naran mak Jeová, neʼe loke dalan ba sira atu hakbesik ba Maromak. Porezemplu, mane ida naran Ricardo konta fali kona-ba tempu neʼebé nia koʼalia hamutuk ho Testemuña ba Jeová naʼin-rua, nia dehan: “Sira hatudu mai haʼu husi Bíblia katak Maromak loos nia naran mak Jeová. Haʼu foin mak hatene Maromak iha naran, neʼe halo haʼu hakfodak no kontente loos.” Husi tempu neʼebá, Ricardo hahú troka ninia hahalok hodi moris tuir Bíblia nia matadalan no halo Maromak Jeová kontente. Nia hatutan tan: “Hatene Maromak nia naran ajuda duni haʼu atu hakbesik liután ba Nia.”

Kleur ona, anti-Kristu halo ema moris iha nakukun laran tanba la bele hatene lia-loos kona-ba Maromak. Maibé hodi estuda Maromak nia Liafuan Bíblia, ita bele hatene anti-Kristu neʼe mak sé loos no halo ita sai livre husi sira-nia lia-bosok no hanorin falsu sira.—João 17:17.