Agora haʼu bele ajuda ema seluk

HAʼU-NIA MORIS ULUK NIAN:

Haʼu moris iha Acul, knua ida iha Guatemala nia foho sira iha parte oeste. Haʼu-nia família mak ema Ixil, grupu ida neʼebé mai husi jerasaun Maya. Haʼu hatene língua Españól no mós ami-nia língua rasik. Funu akontese iha Guatemala durante tinan 36 nia laran, no bainhira haʼu kiʼik, funu neʼe sei makaʼas hela. Durante tempu neʼe, ema Ixil barak mak mate.

Bainhira haʼu tinan haat, haʼu nia maun neʼebé tinan hitu halimar hela ho granada no derrepente granada neʼe rabenta. Neʼe halo haʼu-nia matan sai delek, no triste tebes mak, haʼu-nia maun mate. Depois neʼe, haʼu tenke tama instituisaun iha Sidade Guatemala ba labarik matan-delek sira, no haʼu aprende lee letra Braile. Iha neʼebá, mestre sira la husik haʼu atu ransu ho labarik sira seluk, haʼu la komprende tanbasá. Kolega sira mós hasees an husi haʼu. Haʼu sempre sente mesamesak, maibé tinan-tinan, ba fulan rua haʼu bele fila ba uma atu hamutuk ho haʼu-nia inan neʼebé laran-diʼak no hadomi haʼu. Haʼu sempre hein namanas ba tempu neʼe. Maibé, bainhira haʼu tinan sanulu, haʼu-nia inan mate. Haʼu triste tebetebes tanba haʼu lakon ema ida deʼit neʼebé hadomi haʼu.

Bainhira haʼu tinan 11, haʼu fila ba haʼu-nia knua no hela hamutuk ho haʼu-nia maun ida no ninia família. Sira tau matan mai haʼu iha dalan fíziku, maibé la iha ema ida bele ajuda haʼu iha dalan emosionál. Dala ruma, haʼu hakilar ba Maromak, dehan: “Tanbasá mak haʼu-nia inan mate? Tanbasá mak haʼu matan-delek?” Ema dehan mai haʼu katak susar sira neʼe akontese tanba Maromak nia hakarak. Tan neʼe, haʼu hanoin katak Maromak la hanoin ema no la justisa. Razaun ida deʼit haʼu la oho an mak, tanba haʼu la iha dalan atu halo ida-neʼe.

Tanba haʼu matan-delek, ema aproveita deʼit haʼu iha dalan fíziku no emosionál. Bainhira haʼu sei labarik, ema estraga haʼu dala barak. Haʼu nunka kesar kona-ba neʼe, tanba haʼu hanoin la iha ema ida mak interese. Ema la gosta atu koʼalia mai haʼu, no haʼu mós la koʼalia ho ema seluk. Haʼu sente laran-kraik tebes, no haʼu la fiar ema ida.

OINSÁ MAK BÍBLIA TROKA HAʼU-NIA MORIS:

Bainhira haʼu tinan 13, feen-laʼen Testemuña ida hakbesik haʼu iha eskola durante rekreiu, tanba mestre laran-diʼak ida hanoin haʼu-nia situasaun, no husu sira atu vizita haʼu. Sira koʼalia mai haʼu kona-ba Bíblia nia promesa katak ema mate sei moris-hiʼas no matan-delek sira sei haree fali iha futuru. (Isaias 35:5; João 5:28, 29) Haʼu gosta buat neʼebé sira hanorin mai haʼu, maibé tanba haʼu la toman atu koʼalia ho ema, susar atu konversa ho sira. Maski haʼu ema neʼebé nonook deʼit, sira nafatin hakarak vizita haʼu atu hanorin haʼu kona-ba Bíblia. Feen-laʼen neʼe laʼo kilómetru sanulu liu no saʼe foho hodi bele mai vizita haʼu.

Haʼu-nia maun dehan katak sira hatais kabeer, maibé laʼós ema riku. Maibé sira sempre hatudu interese mai haʼu no lori prezente kiʼik. Haʼu sente katak só ema Kristaun neʼebé loos mak hatudu hahalok diʼak sira no la hanoin an deʼit hanesan neʼe.

Haʼu estuda Bíblia hodi uza livru ho letra Braile. Maski haʼu komprende buat neʼebé haʼu aprende, maibé iha buat balu neʼebé haʼu sente susar atu simu. Porezemplu, susar ba haʼu atu fiar katak Maromak hadomi duni haʼu, no katak ema seluk mós iha hanoin hanesan Maromak kona-ba haʼu. Haʼu komprende tanbasá Maromak Jeová husik buat aat akontese maibé susar ba haʼu atu haree nia nuʼudar Aman neʼebé iha domin.a

Neineik-neineik, Bíblia ajuda haʼu atu troka haʼu-nia hanoin neʼe. Porezemplu, haʼu aprende katak Maromak hanoin tebes ema neʼebé hasoru terus. Kona-ba ninia povu sira neʼebé ema haterus, Maromak hatete: “Haʼu haree duni haʼu-nia povu nia terus . . . Haʼu hatene didiʼak kona-ba terus neʼebé sira hasoru.” (Éxodo 3:7) Tanba aprende kona-ba Jeová nia hahalok diʼak sira book tebes haʼu, haʼu dedika haʼu-nia moris ba nia. Iha 1998, haʼu hetan batizmu nuʼudar Testemuña ba Jeová.

Maizumenus tinan ida depois haʼu-nia batizmu, haʼu tuir kursu ba ema matan-delek besik sidade ida naran Escuintla. Katuas kongregasaun husi área neʼebá rona katak susar ba haʼu atu tuir reuniaun sira iha haʼu-nia knua rasik. Kongregasaun neʼebé besik liu haʼu mak tenke saʼe foho sira neʼebé feen-laʼen Testemuña uluk laʼo atu mai vizita haʼu, tan neʼe susar tebes ba haʼu atu bá neʼebá. Atu ajuda haʼu, katuas neʼe husu família ida iha Escuintla atu haʼu bele hela hamutuk ho sira hodi bele tuir reuniaun sira. Toʼo ohin loron, sira nafatin haree haʼu hanesan sira-nia família rasik.

Loloos, haʼu bele konta ezemplu barak tan kona-ba domin neʼebé irmaun-irmán sira hatudu ona mai haʼu. Buat neʼe hotu hatudu mai haʼu katak Testemuña ba Jeová mak ema Kristaun neʼebé loos.​—João 13:34, 35.

BENEFÍSIU NEʼEBÉ HAʼU HETAN:

Haʼu la sente tan hanesan folin-laek no la iha esperansa. Agora haʼu-nia moris iha folin. Haʼu uza haʼu-nia tempu barak liu iha serbisu edukasaun nian neʼebé Testemuña ba Jeová halaʼo. Duké fokus liu ba haʼu-nia defisiénsia, haʼu fokus liu atu hanorin ema seluk buat furak neʼebé Bíblia hatete. Haʼu mós serbí nuʼudar katuas kongregasaun nian no haʼu hatoʼo diskursu sira kona-ba Bíblia iha ema nia oin. Dala ruma haʼu mós hatoʼo diskursu iha reuniaun boot neʼebé ema rihun ba rihun mak asiste.

Iha 2010, haʼu hetan graduasaun husi Eskola Treinu Atan Kristaun (neʼebé agora bolu Eskola ba Haklaken-Naʼin Tempu-Tomak) neʼebé halaʼo iha Elsalvadór. Eskola neʼe ajuda haʼu atu bele kumpre ho didiʼak haʼu-nia responsabilidade sira iha kongregasaun. Liuhusi eskola neʼe, haʼu sente duni Maromak Jeová nia domin no sente katak nia hafolin tebes haʼu. Nia bele fó kbiit ba ema naran deʼit atu halaʼo ninia serbisu.

Jesus hatete: “Kontente liu atu fó duké simu.” (Apóstolu 20:35) Ohin loron, haʼu bele dehan katak, haʼu kontente tebes iha haʼu-nia moris. No agora haʼu bele ajuda ema seluk, maski uluk haʼu hanoin neʼe mak buat neʼebé haʼu nunka bele halo.