Treinu Ita-nia oan kiʼik atu serbí Jeová

1. Manoá halo saida bainhira nia hatene nia sei simu responsabilidade boot nuʼudar aman ida?

MANOÁ nia feen foin lori liafuan neʼebé halo Manoá hakfodak. Uluk sira naʼin-rua hanoin sira sei nunka iha oan, maibé Jeová nia anju ida fó-hatene Manoá nia feen katak nia sei iha oan-mane ida. Bainhira Manoá rona ida-neʼe, nia kontente tebes! Maibé nia mós hatene katak agora nia iha responsabilidade boot ida. Oinsá mak sira bele treinu sira-nia oan atu hadomi Jeová no serbí nia iha nasaun neʼebé ema barak nia hahalok mak aat? Manoá husu Jeová atu haruka fali ninia anju ba nia. Nia dehan: “Favór ida, Maromak loos nia ema neʼebé Ita foin haruka mai, haruka fali nia atu mai dala ida tan no hanorin ami kona-ba buat neʼebé ami tenke halo ba oan neʼebé atu moris.”—Juízes (Hakim-Hakim) 13:1-8.

2. Saida mak ita presiza halo atu hanorin oan sira? (Haree mós kaixa “Ita-nia estudante sira neʼebé importante liu hotu.”)

² Se Ita mak inan ka aman ida, Ita bele komprende Manoá nia sentimentu tanba Ita mós iha responsabilidade atu ajuda Ita-nia oan kiʼik atu koñese no hadomi Jeová. (Provérbios [Amsal] 1:8) Ita bele halo nuneʼe hodi halaʼo Adorasaun Família nian ho sira semana-semana. Maibé atu oan sira bele komprende no simu duni Bíblia nia hanorin, halaʼo deʼit adorasaun família nian, neʼe seidauk toʼo. (Lee Deuteronômio [Ulangan] 6:6-9.a) Entaun, saida tan mak ita bele halo hodi treinu sira atu hadomi no serbí Jeová? Iha lisaun neʼe, ita sei haree oinsá inan-aman sira bele halo tuir Jesus nia ezemplu. Maski Jesus nunka sai aman ida, maibé inan-aman sira bele aprende husi nia tanba nia hanorin no fó treinu ba ninia dixípulu sira ho domin, haraik-an no matenek. Agora, mai ita haree hahalok sira-neʼe ida-idak.

HADOMI ITA-NIA OAN

3. Oinsá mak Jesus nia dixípulu sira hatene katak nia hadomi sira?

³ Jesus la dada an atu fó sai ba ninia dixípulu sira katak nia hadomi sira. (Lee João 15:9.) Nia gasta tempu hamutuk ho sira. (Marcos 6:31, 32; João 2:2; 21:12, 13) Jesus laʼós deʼit sira-nia mestre, maibé nia mós sira-nia belun. Ninia dixípulu sira la iha duvida katak nia hadomi sira. Oinsá mak inan-aman sira bele aprende husi Jesus?

4. Oinsá mak Ita bele hatudu Ita-nia domin ba oan sira? (Haree foto iha pájina 3.)

⁴ Fó-hatene beibeik ba Ita-nia oan katak Ita hadomi sira, no hatudu katak ba Ita, sira importante tebes. (Provérbios [Amsal] 4:3; Tito 2:4) Samuel, neʼebé hela iha rai-Austrália hatete: “Bainhira haʼu sei kiʼik, kalan-kalan haʼu-nia apá lee Livru Istória husi Bíblia ba haʼu. Nia hatán haʼu-nia pergunta sira, hakoʼak haʼu, reʼi haʼu, depois fó bonoite ba haʼu. Bainhira haʼu boot, haʼu hakfodak tanba haʼu foin hatene katak iha tempu haʼu-nia apá sei kiʼik, ninia inan-aman nunka halo hanesan neʼe ba nia. Maibé nia hakaʼas an atu hatudu ninia domin mai haʼu. Tanba ida-neʼe, haʼu sai besik loos ba haʼu-nia apá, haʼu sente kontente no seguru.” Se Ita hakarak Ita-nia oan mós atu sente hanesan neʼe, dehan beibeik ba sira, “Haʼu hadomi ó.” Hakoʼak no reʼi sira, gasta tempu ho sira, koʼalia ho sira, han ho sira, no halimar hamutuk ho sira.

5, 6. (a) Saida mak Jesus halo tanba nia hadomi ninia dixípulu sira? (b) Iha dalan saida mak Ita tenke dixiplina Ita-nia oan?

⁵ Jesus hatete: “Haʼu fó konsellu no dixiplina ba sira hotu neʼebé haʼu hadomi.”b (Haree nota iha kraik.) (Apokalipse 3:19) Jesus nia dixípulu sira haksesuk malu dala barak kona-ba sé mak boot liu, maibé Jesus la husik deʼit problema neʼe. Ho pasiénsia nia korrije beibeik sira. Nia halo ida-neʼe ho laran-diʼak no iha tempu no fatin neʼebé loos.—Marcos 9:33-37.

⁶ Hatudu domin ba Ita-nia oan hodi fó dixiplina ba sira. Dala ruma karik Ita presiza esplika deʼit ba sira tanbasá mak buat ruma neʼebé sira halo neʼe diʼak ka ladiʼak. Maibé oinsá se sira la halo tuir? (Provérbios [Amsal] 22:15) Se hanesan neʼe, banati-tuir Jesus nia ezemplu. Iha tempu no fatin neʼebé diʼak, korrije sira, fó treinu no fó matadalan ba sira ho laran-diʼak. Irmán ida iha rai-Áfrika Súl naran Elaine hanoin-hetan oinsá ninia inan-aman fó dixiplina ba nia. Nia hatete katak sira sempre esplika ho klaru saida mak sira hakarak husi nia. Se sira dehan katak nia sei simu kastigu tanba nia la halo tuir, entaun sira fó duni kastigu neʼe. Maibé nia dehan: “Sira nunka fó dixiplina haʼu ho hirus ka la fó-hatene haʼu tanbasá mak sira fó dixiplina mai haʼu.” Tanba ninia inan-aman halo ida-neʼe, nia sente nia inan-aman hadomi nia.

HATUDU HARAIK-AN

7, 8. (a) Oinsá mak Jesus hatudu haraik-an bainhira nia halo orasaun? (b) Oinsá mak inan-aman nia orasaun bele ajuda sira-nia oan atu sadere ba Jeová?

⁷ Bainhira Jesus besik atu mate, iha ninia orasaun ida nia hatete: “Abba, Aman, buat hotu bele deʼit ba Ita; hasai tiha kopu neʼe husi haʼu. Maski nuneʼe, laʼós tuir haʼu-nia hakarak, maibé tuir Ita-nia hakarak.”c (Haree nota iha kraik.) (Marcos 14:36) Hanoin toʼok, Jesus nia dixípulu sira sente oinsá bainhira sira rona ka hatene kona-ba ninia orasaun neʼe. Sira bele haree katak, maski Jesus ema sala-laek, nia nafatin husu ajuda husi ninia Aman. Sira aprende katak sira mós presiza hatudu haraik-an no sadere ba Jeová.

⁸ Ita-nia oan sira bele aprende buat barak husi Ita-nia orasaun. Maski Ita-nia orasaun laʼós deʼit atu hanorin Ita-nia oan, maibé bainhira sira rona Ita halo orasaun, sira aprende atu sadere ba Jeová. Ana, neʼebé hela iha rai-Brazíl, hatete: “Se ami iha problema, hanesan bainhira ami-nia avó sira moras, haʼu-nia inan-aman husu Jeová atu fó forsa ba sira atu bele tahan, no sira husu atu fó matenek hodi foti desizaun neʼebé diʼak. Iha tempu neʼebé susar hatodan sira, sira husik sira-nia problema iha Jeová nia liman. Tanba sira-nia ezemplu, haʼu aprende atu sadere ba Jeová.” Bainhira Ita halo orasaun hamutuk ho Ita-nia oan sira, labele husu Jeová atu ajuda Ita-nia oan sira deʼit, maibé husu nia ajuda mós Ita. Porezemplu, husu Jeová atu ajuda Ita husu lisensa husi Ita-nia patraun atu tuir reuniaun boot ba loron tolu nian, ka atu sai brani haklaken ba viziñu, ka ajuda Ita iha dalan seluk tan. Se Ita ho haraik-an sadere ba Jeová, Ita-nia oan sira mós sei aprende atu halo tuir Ita-nia ezemplu.

9. (a) Oinsá mak Jesus hanorin ninia dixípulu sira atu serbí ema seluk ho haraik-an? (b) Se Ita ho haraik-an serbí ema seluk, neʼe bele hanorin saida ba oan sira?

⁹ Husi Jesus nia liafuan no hahalok, nia treinu ninia dixípulu sira atu hatudu haraik-an no la hanoin an deʼit. (Lee Lucas 22:27.) Ninia apóstolu sira haree katak nia halo sakrifísiu barak atu serbí Jeová no atu ajuda ema seluk, no sira mós aprende atu halo ida-neʼe. Oinsá ho Ita? Ita bele hanorin Ita-nia oan husi Ita-nia ezemplu. Debbie, ho oan naʼin-rua, hatete: “Bainhira haʼu-nia laʼen, neʼebé katuas kongregasaun ida, presiza fó ninia tempu ba ema seluk, haʼu nunka sente laran-moras. Haʼu hatene katak bainhira ami presiza nia, nia sempre prontu atu fó nia tempu mai ami.” (1 Timóteo 3:4, 5) Oinsá mak Debbie no ninia laʼen, Pranas nia ezemplu kona sira-nia família? Pranas dehan katak sira-nia oan sira sempre prontu atu ajuda iha tempu reuniaun boot nian. Sira mós kontente, iha belun sira neʼebé diʼak no gosta ransu hamutuk ho irmaun-irmán sira. Agora, sira hotu halo serbisu ba Jeová tempu-tomak. Se Ita mós haraik-an no la hanoin an deʼit, Ita-nia oan sira sei aprende oinsá atu serbí ema seluk.

HATUDU MATENEK

10. Oinsá mak Jesus uza matenek bainhira ema husi Galileia mai buka nia?

¹⁰ Jesus hatudu matenek tanba nia laʼós deʼit haree ba buat neʼebé ema halo maibé nia mós komprende tansá mak sira halo ida-neʼe. Porezemplu, dala ida ema balu husi Galileia mai buka nia atu tuir nia. (João 6:22-24) Maibé Jesus bele haree ba sira-nia laran, no nia hatene katak sira hakarak liu mak simu hahán neʼebé nia fó, duké simu ninia hanorin. (João 2:25) Jesus komprende oinsá sira sente iha laran, depois nia korrije sira no esplika saida mak sira presiza hadiʼa.—Lee João 6:25-27.

11. (a) Oinsá mak Ita bele hatene oinsá Ita-nia oan sente kona-ba haklaken? (b) Saida mak Ita bele halo atu Ita-nia oan gosta haklaken?

¹¹ Maski ita la bele haree ba ema nia laran, maibé ita bele hatudu matenek hodi komprende oinsá Ita-nia oan sente kona-ba haklaken. Inan-aman balu gosta deskansa uitoan durante haklaken hodi oan bele hola sasán ruma atu han no hemu. Se nuneʼe, husu ba Ita-nia an, ‘Haʼu-nia oan gosta duni haklaken ka gosta deʼit mak tempu deskansa hodi sosa dose ka hemu?’ Se Ita haree katak Ita-nia oan ladún gosta haklaken, koko buat ruma atu halo sira gosta. Fó ba sira knaar kiʼik ruma hodi sira mós bele hola parte iha haklaken.

12. (a) Jesus hatudu matenek hodi fó avizu saida ba ninia dixípulu sira? (b) Tanbasá mak sira presiza duni avizu neʼe?

¹² Iha dalan saida tan mak Jesus uza matenek? Jesus hatudu katak sala ida bele lori ema atu halo sala neʼebé boot liután no nia fó avizu ba ninia dixípulu sira kona-ba neʼe. Porezemplu, ninia dixípulu sira hatene katak sala-foʼer mak hahalok neʼebé sala. Maibé Jesus fó avizu ba sira kona-ba hakat neʼebé lori ema atu halo sala neʼe. Nia hatete: “Ema neʼebé hateke beibeik ba feto ida toʼo kaan nia, ema neʼe halo ona sala-foʼer ho feto neʼe iha ninia laran. Neʼe duni, se ó-nia matan sorin loos halo ó sidi, losu sai nia no soe dook tiha.” (Mateus 5:27-29) Jesus nia dixípulu sira moris iha ema Roma nia leet neʼebé gosta haree drama sira nakonu ho lia-foʼer no hahalok sala-foʼer. Tan neʼe, Jesus fó avizu atu hasees an husi buat ruma neʼebé sei halo susar atu moos nafatin.

13, 14. Oinsá mak Ita bele proteje Ita-nia oan husi filme, livru no múzika neʼebé foʼer?

¹³ Ita mós bele uza matenek atu proteje Ita-nia oan atu nia la bele halo buat ruma neʼebé Maromak la gosta. Ohin loron, realidade mak labarik kiʼik sira mós bele haree pornografia ka buat foʼer seluk. Inan-aman sira bele esplika katak sala atu haree buat sira-neʼe, no matenek mós bele ajuda inan-aman atu hatene tanbasá mak sira-nia oan hakarak haree pornografia. Husu ba Ita-nia an, ‘Saida mak bele book sira atu haree ida-neʼe? Haʼu-nia oan sira hatene tanbasá mak pornografia perigu tebes? Sira sente fasil atu hakbesik haʼu ka lae atu husu ajuda se karik sira hetan tentasaun atu haree ba pornografia?’ Maski Ita-nia oan sei kiʼik hela, maibé Ita bele dehan ba nia: “Se loron ida ó haree buat ruma iha internét kona-ba buat seksuál nian no hetan tentasaun hakarak loke, mai koʼalia ho haʼu. Lalika taʼuk ka moe tanba haʼu hakarak ajuda ó.”

¹⁴ Bainhira Ita hili atividade halimar nian ba Ita-nia an rasik, hanoin didiʼak kona-ba hatudu ezemplu diʼak ba Ita-nia oan. Pranas, neʼebé temi tiha ona hatete: “Ita bele koʼalia barak ba Ita-nia oan, maibé ikusmai sira sei haree ba Ita-nia ezemplu no halo buat neʼebé Ita halo.” Se Ita hili filme, livru no múzika neʼebé la foʼer, Ita-nia oan sira mós sei halo hanesan.

MAROMAK NEʼEBÉ LOOS SEI RONA BA ITA

15, 16. (a) Oinsá mak Ita hatene Jeová sei ajuda Ita treinu Ita-nia oan? (b) Saida mak ita sei koʼalia iha lisaun tuirmai?

¹⁵ Saida mak akontese bainhira Manoá husu Jeová atu ajuda nia sai aman neʼebé diʼak? “Maromak neʼebé loos rona ba Manoá.” (Juízes [Hakim-Hakim] 13:9) Jeová mós sei rona ba imi, inan-aman sira. Nia sei ajuda imi treinu imi-nia oan sira. No nia sei ajuda imi atu hatudu domin, haraik-an no matenek.

¹⁶ Hanesan ita foin aprende, Jeová sei ajuda inan-aman sira atu treinu oan kiʼik sira. Jeová mós bele ajuda sira treinu sira-nia oan joven. Lisaun tuirmai sei esplika oinsá Ita bele banati-tuir Jesus nia hahalok domin, haraik-an no matenek hodi treinu Ita-nia oan joven atu serbí Jeová.