Tanbasá mak ita tenke “matan-moris nafatin”?

1. Fó toʼok ezemplu ida kona-ba tansá mak importante atu fó atensaun ba tempu no buat neʼebé akontese daudauk iha ita-nia sorin-sorin. (Haree foto iha leten.)

PROGRAMA ba reuniaun boot loron tolu nian atu komesa ona. Bainhira aprezentadór saʼe ba palku leten no fó tiha benvindu ba rona-naʼin, múzika mós komesa lian. Neʼe mak tempu neʼebé ema hotu presiza tuur nonook hodi rona ba múzika neʼe no prepara sira-nia laran atu rona ba diskursu sira. Maibé karik sei iha ema balu neʼebé la fó atensaun ba aprezentadór no sira mós la rona didiʼak ba múzika neʼebé lian daudauk. Tan neʼe sira la hatene katak reuniaun boot neʼe komesa ona, sira sei laʼo bá laʼo mai, ka koʼalia hela ho sira-nia kolega. Buat hanesan neʼe akontese ba sira tanba sira la hatene tuku hira ona no sira la fó atensaun ba saida mak akontese daudauk iha tempu neʼebá. Neʼe lisaun importante ida ba ita hotu tanba la kleur tan akontesimentu boot ida atu akontese ona, no ita tenke prepara an didiʼak ba akontesimentu neʼe. Neʼe koʼalia kona-ba saida?

2. Tanbasá mak Jesus hatete ba ninia dixípulu atu “matan-moris nafatin bá”?

² Bainhira Jesus Kristu koʼalia kona-ba mundu nia rohan, nia husu ba ninia dixípulu: “Kontinua haree bá, no matan-moris nafatin bá, tanba imi la hatene tempu neʼebé Maromak hili tiha ona.” Hotu tiha Jesus repete tan beibeik ba sira: “Matan-moris nafatin bá.” (Mateus 24:3; lee Marcos 13:32-37.) Husi Mateus nia evanjellu, Jesus mós fó avizu dala barak ba ninia dixípulu, nia dehan ba sira: “Matan-moris nafatin bá, tanba imi la hatene loron neʼebé imi-nia Naʼi sei mai. . . . Prontu bá, tanba iha oras neʼebé imi la hanoin nia atu mai, iha oras neʼe mak Oan-Mane husi ema sei mai.” Tuirmai nia repete tan dehan: “Matan-moris nafatin bá, tanba imi la hatene loron no oras.”—Mateus 24:42-44; 25:13.

3. Tanbasá mak ita hakarak fó atensaun ba Jesus nia avizu?

³ Nuʼudar Testemuña ba Jeová, ita fó duni atensaun ba Jesus nia avizu neʼe. Ita hatene katak ita hela daudauk iha loron ikus sira no “terus boot” besik ona atu hahú. (Daniel 12:4; Mateus 24:21) Ita haree sinál neʼebé Jesus hatete akontese daudauk hanesan funu, krime, violénsia, relijiaun lohi ema, moras aat, rai-nakdoko, no iha fatin barak rai-hamlaha. Ita mós haree Jeová nia povu haklaken daudauk ninia mensajen kona-ba ninia Ukun iha mundu tomak. (Mateus 24:7, 11, 12, 14; Lucas 21:11) Ita hein duni ho laran-manas ba tempu neʼebé Jesus atu mai no halo ninia Aman nia promesa hotu sai loos.—Marcos 13:26, 27.

LORON NEʼE BESIK DAUDAUK ONA!

4. (a) Tanbasá mak ita bele fiar katak agora Jesus hatene ona bainhira mak Armajedón sei mai? (b) Maski ita la hatene bainhira loos mak terus boot sei hahú, maibé ita bele fiar kona-ba saida?

⁴ Ita hatene oras saida mak programa ida-idak husi reuniaun boot atu komesa. Maibé, susar atu hatene bainhira loos mak terus boot atu hahú. Iha tempu Jesus sei moris iha rai, nia mós la hatene. Tan neʼe mak nia dehan: “Kona-ba loron no oras, ema ida la hatene, anju sira iha lalehan la hatene no Oan-Mane mós la hatene, só deʼit Aman.” (Mateus 24:36) Maibé ita bele fiar katak agora Jesus hatene ona, tanba nia mak sei lori hun atu funu hasoru Satanás nia mundu iha Armajedón. (Apokalipse 19:11-16) Ba ita, ita seidauk hatene sá loron ka tempu atu loron ikus nia rohan sei toʼo mai. Tan neʼe mak importante tebes atu matan-moris nafatin. Jeová marka diʼak tiha ona bainhira loos mak terus boot sei hahú, no loron ida-idak neʼebé liu daudauk, neʼe lori ita besik liután ba tempu terus boot nian. Ba Jeová, loron neʼe “sei la tarde!” (Lee Habacuque [Habakuk] 2:1-3.)^[1] Oinsá mak ita hatene?

5. Fó toʼok ezemplu neʼebé hatudu katak buat neʼebé Jeová fó-hatene nanis sempre sai loos tuir oras.

⁵ Buat sira neʼebé Jeová fó-hatene nanis sempre sai loos tuir oras! Porezemplu, hanoin toʼok kona-ba loron neʼebé nia lori ema Izraél sai husi Ejitu. Loron neʼe mak loron 14, fulan-Nisan, tinan 1513 molok Kristu. Kona-ba loron neʼe Moisés hatete: “Iha tinan 430 nia rohan, iha loron neʼe duni, Jeová nia grupu boot sira hotu sai husi rai-Ejitu.” (Êxodo [Keluaran] 12:40-42) Tinan 430 komesa sura husi tempu neʼebé Jeová nia aliansa ho Abraão hahú laʼo iha loron 14 fulan-Nisan, tinan 1943 molok Kristu. (Galásia 3:17, 18) Liutiha tempu uitoan husi tempu neʼebé Jeová halo aliansa ho Abraão, nia hatete ba Abraão: “Hatene loloos bá katak ó-nia bei-oan sei sai nuʼudar estranjeiru iha rai neʼebé laʼós sira-nian no ema iha neʼebá sei halo sira nuʼudar atan no hanehan sira ba tinan 400.” (Gênesis [Kejadian] 15:13; Apóstolu 7:6) Tinan 400 neʼe komesa husi tempu neʼebé Ismael goza Isaac iha tinan 1913 molok Kristu, no tinan 400 neʼe ramata iha tinan 1513 molok Kristu, iha tempu neʼebé ema Izraél sai husi rai-Ejitu. (Gênesis [Kejadian] 21:8-10; Galásia 4:22-29) Loos duni, tinan atus ba atus antes Jeová salva ninia povu, nia fó-hatene nanis ona tempu loloos saida mak nia sei halo sira livre!

6. Tanbasá mak ita bele fiar katak Jeová sei salva duni ninia povu?

⁶ Josué mós ema ida husi ema Izraél sira neʼebé sai husi Ejitu. Liutiha tinan balu nia fó-hanoin ba povu Izraél: “Imi hatene didiʼak ho imi-nia laran tomak no moris tomak katak Jeová, imi-nia Maromak, nia liafuan hotu husi ninia promete diʼak sira neʼebé nia hatete ona sai loos duni. Sin, sira hotu sai loos ba imi. La iha liafuan ida husi liafuan sira-neʼe hotu mak la sai loos.” (Josué [Yosua] 23:2, 14) Jeová mós promete katak nia sei salva ita husi terus boot atu lori ita tama ba mundu foun, no ita bele fiar katak Jeová sei kumpre duni ninia promesa neʼe. Maibé, se ita hakarak atu moris iha mundu foun, ita tenkesér matan-moris nafatin.

MATAN-MORIS NAFATIN ATU BELE HETAN SALVASAUN

7, 8. (a) Guarda nia knaar iha tempu antigu mak atu halo saida, no ita bele aprende saida husi neʼe? (b) Konta toʼok saida mak bele akontese se guarda sira toba bainhira halaʼo hela sira-nia knaar.

⁷ Ita bele aprende lisaun ida husi tempu antigu kona-ba guarda nia knaar importante atu hein sidade. Iha tempu neʼebá, sidade sira, hanesan Jeruzalein, iha moru aas neʼebé haleʼu sidade sira-neʼe. Moru neʼe atu proteje sira husi inimigu nia ataka. Iha moru leten, baibain iha guarda, no guarda sira-neʼe bele haree rai no sidade tomak. Iha mós guarda seluk neʼebé hein iha sidade nia portaun. Guarda sira-neʼe tenkesér matan-moris kalan no loron. Se sira mak haree iha inimigu mai, sira tenkesér fó avizu ba povu iha sidade laran. (Isaías [Yesaya] 62:6) Ba guarda sira, sira hatene katak importante tebes atu matan-moris no haree didiʼak saida mak akontese. Selae, neʼe bele lori mate ba ema iha sidade neʼe.—Ezequiel (Yehezkiel) 33:6.

⁸ Istória-naʼin Josefo hatete katak soldadu Roma bele tama sidade Jeruzalein iha tinan 70 tanba guarda balu neʼebé hein sidade neʼe toba hela. Tan neʼe soldadu Roma sira halai tama no sunu templu, no harahun hotu sidade Jeruzalein. Neʼe mós ramata ona terus boot neʼebé ema judeu sira hasoru daudauk iha tempu neʼebá.

9. Ohin loron, ema barak la hatene kona-ba saida?

⁹ Ohin loron, nasaun barak uza soldadu no teknolojia foun hodi hein sira-nia fronteira. Sira halo seguransa hodi ema la bele fó ameasa ba sira-nia rai. Maibé sira la hatene katak iha governu ida neʼebé forte tebes iha lalehan. Lakleur tan ninia Liurai Jesus Kristu sei halo funu boot ida hasoru ema nia governu hotu iha rai. (Isaías [Yesaya] 9:6, 7; 56:10; Daniel 2:44) Ita hotu hein ho namanas no hakarak prepara didiʼak ba loron neʼe. Tan neʼe, ita tenke fó atensaun ba Bíblia nia profesia sira no kontinua serbí Jeová ho laran-metin.—Salmo (Mazmur) 130:6.

FÓ ATENSAUN ATU MATAN-MORIS NAFATIN

10, 11. (a) Ita tenke kuidadu kona-ba saida, no tanbasá? (b) Saida mak halo ita fiar katak tanba Diabu nia hahalok mak ema la fó atensaun ba Bíblia nia profesia?

¹⁰ Se guarda ida mak hadeer ona ba kalan tomak, susar tebes ba nia atu matan-moris nafatin iha oras neʼebé nia atu ramata ninia knaar neʼe tanba nia kole tebes. Hanesan neʼe mós ho ita ohin loron. Ita besik ona mundu neʼe nia rohan, no neʼe sei halo difisil liu ba ita atu bele matan-moris nafatin. Triste tebes se ita mak la matan-moris tan! Agora mai ita koʼalia kona-ba buat tolu neʼebé bele halo ita atu la matan-moris tan.

¹¹ Diabu nia lohi. Antes Jesus mate, nia fó-hanoin dala tolu ba ninia dixípulu katak Diabu mak “ukun-naʼin mundu neʼe nian”. (João 12:31; 14:30; 16:11) Diabu uza relijiaun falsu hodi lohi ona ema barak. Tan neʼe mak ohin loron ema barak la fó atensaun tan ba Bíblia nia profesia sira neʼebé hatudu ho momoos katak mundu nia rohan besik toʼo ona. (Sofonias [Zefanya] 1:14) Ita bele haree ho momoos katak Satanás taka duni ema nia neon, tan neʼe mak bainhira ita koko atu esplika katak mundu neʼe nia rohan besik ona no Kristu ukun daudauk ona, ema barak lakohi rona. Baibain sira hatete, “Bá buka ema seluk!”

12. Tanbasá mak ita lakohi atu husik Diabu lohi ita?

¹² Keta husik ema nia atitude hanesan neʼe atu halo ita laran-tun hodi la matan-moris tan. Ita hatene katak importante tebes atu matan-moris nafatin, tanba apóstolu Paulo hatete: “Imi rasik hatene ho didiʼak katak Jeová nia loron sei mai.” No nia hatutan dehan: “Hanesan naʼok-teen iha kalan.” (Lee 1 Tesalónika 5:1-6.) Jesus mós fó avizu mai ita: “Matan-moris bá, tanba imi la hatene iha oras saida mak Oan-Mane husi ema sei mai.” (Lucas 12:39, 40) Lakleur tan Satanás sei lohi ema atu fiar katak mundu neʼe iha daudauk “dame no hakmatek”. Tuirmai, derrepente deʼit Jeová nia loron sei toʼo mai, no neʼe sei halo sira hakfodak. Oinsá ho ita? Se ita mak hakarak prepara an ba loron neʼe no la husik Satanás atu lohi ita, ita tenkesér “hadeer nafatin no kontinua oin-moos” husi agora kedas. Tan neʼe mak ita tenke lee Maromak nia Liafuan loroloron no hanoin kleʼan kona-ba buat neʼebé ita lee.

13. Oinsá mak mundu nia hahalok book daudauk ema, no oinsá mak ita bele hasees an husi perigu neʼe?

¹³ Mundu nia hahalok. Ohin loron, ema barak sente katak sira la presiza atu hatene Maromak. (Mateus 5:3) Sira uza sira-nia moris no forsa tomak atu buka sasán husi mundu neʼe. (1 João 2:16) No atividade halimar nian mós dada ema nia atensaun no book ema atu “hadomi deʼit ksolok” hodi halo tuir deʼit sira-nia hakarak. (2 Timóteo 3:4) Tan neʼe mak apóstolu Paulo fó avizu ba ema kristaun katak sira tenke “hadeer husi toba” hodi la tau atensaun liu ba “oinsá atu halo hakarak isin nian”.—Roma 13:11-14.

14. Lucas 21:34, 35 fó avizu kona-ba saida?

¹⁴ Ita hakarak husik Maromak nia espíritu, laʼós mundu nia hahalok mak atu book ita-nia dalan atu hanoin. Liuhusi ninia espíritu mak Jeová ajuda ita hodi komprende ho momoos kona-ba saida mak atu akontese iha futuru.^[2] (Haree nota husi lisaun.) (1 Korinto 2:12) Maibé ita presiza kuidadu tanba dala ruma buat kiʼik mós bele halo ita la bele fó atensaun hodi serbí Jeová. (Lee Lucas 21:34, 35.) Karik ema seluk bele goza ita dehan ita beik hodi fiar katak ita moris daudauk iha loron ikus sira. (2 Pedro 3:3-7) Maibé ita la bele husik ema sira-neʼe atu halo ita laran-tun. Ita iha evidénsia barak neʼebé hatudu katak mundu neʼe nia rohan besik ona atu mai. Se ita hakarak husik Maromak nia espíritu atu book ita, ita tenkesér tuir beibeik reuniaun ho ita-nia maluk kristaun sira.

15. Saida mak akontese ba Pedro, Tiago, no João, no karik saida mós bele akontese ba ita?

¹⁵ Ita-nia fraku sira. Jesus komprende katak ita ema sala-naʼin iha fraku oioin. Haree toʼok kona-ba saida mak akontese iha kalan antes Jesus mate. Maski Jesus sala-laek, maibé nia hatene katak nia presiza sadere ba ninia Aman iha lalehan nia forsa atu bele laran-metin nafatin toʼo mate. Tan neʼe nia husu ba apóstolu Pedro, Tiago, no João labele toba iha tempu neʼebé nia halo daudauk orasaun ba Jeová. Maibé apóstolu sira-neʼe la komprende tanbasá mak importante tebes atu matan-moris nafatin iha tempu neʼebá. Sira sente kole tebes, tan neʼe sira toba tiha. Jesus mós sente kole iha tempu neʼebá, maibé nia matan-moris nafatin hodi halo orasaun ba ninia Aman. Tuir loloos ninia apóstolu sira mós tenkesér halo tuir nia iha tempu neʼebá.—Marcos 14:32-41.

16. Tuir Lucas 21:36, oinsá mak Jesus hanorin ita atu bele “matan-moris”?

¹⁶ Saida mak bele ajuda ita atu matan-moris nafatin hodi prepara an ba Jeová nia loron? Ita presiza iha hakarak forte atu halo buat neʼebé loos. Maibé neʼe deʼit seidauk toʼo. Loron hirak antes Jesus mate, nia fó-hatene ba ninia dixípulu sira atu halo orasaun beibeik hodi husu Jeová nia ajuda. (Lee Lucas 21:36.) Tan neʼe, atu bele matan-moris nafatin iha loron ikus sira-neʼe, ita mós tenke halo orasaun beibeik.—1 Pedro 4:7.

KONTINUA MATAN-MORIS NAFATIN

17. Oinsá mak ita bele prepara an ba buat neʼebé atu akontese iha futuru?

¹⁷ Jesus hatete katak mundu nia rohan sei toʼo mai “iha oras neʼebé [ita] la hanoin nia atu mai”. (Mateus 24:44) Tan neʼe ita tenkesér prontu iha tempu hotu. Agora laʼós tempu atu husik Satanás nia mundu lohi ita katak moris tuir mundu nia hahalok bele lori haksolok. Neʼe laʼós realidade maibé mehi deʼit. Liuhusi Bíblia, Jeová no Jesus fó-hatene ona ba ita kona-ba saida mak sei akontese iha futuru no oinsá mak ita bele matan-moris nafatin ohin loron. Tan neʼe ita tenke fó atensaun ba Bíblia nia profesia, no oinsá mak profesia sira sai loos daudauk. Ita mós tenkesér hakbesik liután ba Jeová no tau uluk ninia Ukun iha ita-nia moris. Se ita halo nuneʼe, bainhira mundu nia rohan toʼo mai, ita prontu ona. (Apokalipse 22:20) Ita-nia moris depende duni ba ita-nia matan-moris!