Ba Jeová, buat hotu bele deʼit

SERBISU HUSI DADEER-SAAN NAKUKUN TOʼO RAI-NAKARAS

Haʼu moris iha tinan 1937 besik Tokmok, rai-Kirgizistaun. Ami-nia família mak ema kirgize, no ami mós koʼalia lia-kirgize. Haʼu-nia inan-aman serbisu iha ema nia toʼos husi dadeer-saan nakukun toʼo rai-nakaras. Toʼos-naʼin sira simu beibeik ai-han atu teʼin, maibé tinan ida dala ida deʼit mak sira bele simu sira-nia saláriu. Susar ba haʼu-nia inan atu tau matan haʼu no haʼu-nia alin-feto. Haʼu eskola ba tinan lima deʼit, depois haʼu mós komesa serbisu iha toʼos.

Iha fatin neʼebé haʼu hela, ema barak mak kiak, no presiza serbisu makaʼas atu buka moris. Bainhira haʼu sei joven, haʼu ladún hanoin haʼu-nia futuru ka kona-ba tanbasá ita moris. Haʼu nunka hanoin oinsá lia-loos kona-ba Maromak Jeová sei troka haʼu-nia moris. Istória kona-ba oinsá lia-loos tama no habelar iha Kirgizistaun mak istória neʼebé furak tebes no lia-loos hahú iha haʼu-nia área iha Kirgizistaun parte norte.

DADUR SIRA LORI LIA-LOOS BA KIRGIZISTAUN

Iha tinan 1956 mak lia-loos kona-ba Maromak Jeová sai metin iha rai-Kirgizistaun. Maibé neʼe laʼós buat neʼebé fasil. Tanbasá? Tanba iha tempu neʼebá, Kirgizistaun mak parte husi Uniaun Soviétika no ema barak simu hanorin komunista. Maibé Testemuña ba Jeová iha Uniaun Soviétika neutrál kona-ba buat polítiku. (João 18:36) Tan neʼe governu komunista haree sira hanesan inimigu. Maibé la iha hanorin ida bele hanetik ema laran-moos sira atu simu Maromak nia Liafuan. Buat ida neʼebé haʼu aprende iha haʼu-nia moris mak, ba Jeová, “buat hotu bele deʼit”.​—Marcos 10:27.

Tuir loloos, tanba terus neʼebé Testemuña ba Jeová hetan mak lia-loos habelar iha rai-Kirgizistaun. Tanbasá mak hanesan neʼe? Uluk, Uniaun Soviétika mós inklui rai-Sibéria, no haruka ema neʼebé governu haree hanesan inimigu ba Sibéria nuʼudar dadur. Bainhira dadur sira-neʼe sai livre, barak muda ba Kirgizistaun, no sira balu lori mensajen kona-ba lia-loos hamutuk ho sira. Ida mak mane ida naran Emil Yantzen, neʼebé moris iha Kirgizistaun iha tinan 1919. Emil hasoru Testemuña sira iha komarka iha Sibéria. Nia simu lia-loos no fila ba Kirgizistaun iha 1956. Emil hela besik knua Sokuluk, iha haʼu-nia área. Iha fatin neʼe mak kongregasaun primeiru iha Kirgizistaun harii iha 1958.

Maizumenus tinan ida liutiha, Victor Vinter muda ba Sokuluk. Irmaun laran-metin neʼe hasoru ona susar barak. Dala rua nia tama komarka ba tinan tolu tanba nia neutrál. Depois neʼe nia tama komarka ba tinan sanulu no mós hetan kastigu ba tinan lima tan iha Sibéria. Maski Testemuña barak hetan terus, maibé adorasaun neʼebé loos habelar nafatin.

LIA-LOOS HAKBESIK BA AMI-NIA KNUA

Toʼo tiha tinan 1963 iha Testemuña naʼin-160 iha Kirgizistaun, sira barak mai husi Alemaña, Ukránia no Rúsia. Ida mak Eduard Varter, neʼebé batizmu iha Alemaña iha 1924. Liutiha tinan 1940, governu Nazi hatama nia ba komarka, no tinan balu liutiha neʼe, governu komunista iha Uniaun Soviétika haruka nia ba rai seluk nuʼudar dadur. Iha tinan 1961, irmaun laran-metin neʼe muda ba sidade Kant, neʼebé besik loos haʼu-nia sidade.

Irmán laran-metin ida naran Elizabeth Fot mós hela iha Kant. Nia serbisu suku roupa no tanba nia matenek tebes halo serbisu neʼe, doutór no mestre sira hameno roupa husi nia. Ema ida mak Aksamai Sultanalieva, ninia laʼen mak funsionáriu ida husi governu. Aksamai bá atu hameno roupa husi Elizabeth, maibé nia husu pergunta barak kona-ba tanbasá ita moris no ema mate sira iha neʼebé. Elizabeth uza Bíblia atu fó resposta ba pergunta hotu. Ikusmai, Aksamai sai haklaken-naʼin neʼebé laran-manas loos.

Iha tempu neʼebá, Nikolai Chimpoesh husi Moldávia hetan knaar atu serbí nuʼudar katuas área nian, no nia halo serbisu neʼe besik tinan 30. Nikolai vizita kongregasaun sira maibé nia mós organiza serbisu kona-ba halo kópia ba ita-nia livru sira no fahe livru sira-neʼe. Maibé governu hatene serbisu neʼebé nia halo. Tan neʼe, Eduard Varter fó sujestaun ba nia dehan: “Se sira litik Ita, haree ba polísia nia matan no fó-hatene loloos deʼit katak ita hetan ita-nia livru sira husi sede-jerál iha Brooklyn. Ita la presiza taʼuk.”​—Mateus 10:19.

Lakleur depois neʼe, polísia intelijénsia sira bolu Nikolai ba sira-nia sede-jerál iha Kant. Nikolai konta buat neʼebé akontese: “Polísia husu kona-ba ami-nia livru sira hetan husi neʼebé. Haʼu dehan, husi Brooklyn. Nia la hatene atu hatete saida. Nia husik haʼu bá deʼit no la bolu fali haʼu.” Testemuña sira kontinua haklaken ho aten-brani iha Kirgizistaun norte. Bainhira lia-loos toʼo ba haʼu-nia família iha tinan 1981, haʼu-nia feen, Mairambubu mak ema primeiru atu rona.

HAʼU-NIA FEEN RONA LIA-LOOS

Mairambubu mai husi área Naryn husi Kirgizistaun. Ami hasoru malu iha fulan-Agostu tinan 1974, bainhira nia vizita haʼu-nia alin-feto nia uma. Haʼu gosta kedas Mairambubu no ami kaben iha loron neʼe kedas.

Iha Janeiru 1981, Mairambubu bá merkadu no iha bís laran nia rona feto ida nia liafuan neʼebé temi ona iha leten. Haʼu-nia feen hakarak rona tan, entaun nia husu feto neʼe nia naran no hela-fatin. Feto neʼe hatete ninia naran, Apun, maibé nia kuidadu uitoan no la hatete ninia hela-fatin, tanba iha tempu neʼebá governu bandu Testemuña sira. Apun husu fali ami-nia hela-fatin. Haʼu-nia feen fila ba uma kontente tebes.

Mairambubu hatete: “Haʼu rona buat furak. Feto ida hatete ba haʼu katak lakleur tan, ema sei la mate. No animál fuik sira mós sei sai maus.” Haʼu la fiar buat neʼebé nia koʼalia, no haʼu dehan: “Ita hein nia vizita mak ita rona tan kona-ba neʼe.”

Fulan tolu liutiha, Apun mai vizita ami. Testemuña sira vizita beibeik no ami mós bele hasoru ema kirgize sira neʼebé sai Testemuña ba Jeová. Irmán sira-neʼe hanorin ami lia-loos furak kona-ba Jeová no ninia hakarak ba ema. Sira hanorin ami hodi uza livru From Paradise Lost to Paradise Regained.a No livru neʼe iha ida deʼit iha área Tokmok, tan neʼe ami kópia ida ho liman ba ami rasik.

Buat ida neʼebé ami aprende mak profesia iha Gênesis (Kejadian) 3:15. Profesia neʼe sei sai loos liuhusi Jesus, Liurai Mesias neʼebé Maromak hili ona. Neʼe mak mensajen importante neʼebé ema hotu tenke rona no ami mós hakarak hola parte atu fahe ida-neʼe. (Mateus 24:14) Lakleur, lia-loos husi Bíblia komesa troka ami-nia moris.

REUNIAUN NO BATIZMU SUBASUBAR

Irmaun ida iha Tokmok konvida ami tuir kazamentu ida. Haʼu no haʼu-nia feen haree katak Testemuña sira la hanesan ema seluk. Iha kazamentu neʼe, ema la hemu tua, no sira hatudu hahalok diʼak. Neʼe la hanesan duni kazamentu sira neʼebé ami tuir ona, ema lanu, hahalok arbiru no tolok.

Ami mós tuir reuniaun balu husi kongregasaun iha Tokmok. Baibain, se la udan, ami halaʼo reuniaun iha ai-laran. Ami hatene katak polísia nota hela ami, tan neʼe, ami hili irmaun ida atu hein no haree se ema ruma mai. Iha tempu malirin, ami halibur iha irmaun sira-nia uma. Dala ruma, polísia mai uma neʼe no husu ami halo saida. Iha tempu neʼebé haʼu no Mairambubu hetan batizmu iha Jullu 1982, iha mota Chüy, ami presiza kuidadu tebes. (Mateus 10:16) Irmaun-irmán sira mai ida-idak no ami halibur iha ai-laran. Ami kanta knananuk hamutuk no rona ba diskursu batizmu nian.

APROVEITA OPORTUNIDADE ATU AUMENTA AMI-NIA HAKLAKEN

Iha tinan 1987, irmaun ida husu haʼu atu bá vizita ema ida neʼebé interese iha sidade Balykchy. Presiza oras haat atu bá neʼebá ho komboiu. Ami haklaken iha neʼebá dala balu tan no haree katak, tuir loloos iha ema barak neʼebé interese. Ami haree ida-neʼe nuʼudar oportunidade atu aumenta ami-nia serbisu ba Maromak.

Haʼu no Mairambubu bá beibeik Balykchy. Findesemana ami toba kalan iha neʼebá. Ami bá haklaken no halaʼo reuniaun sira. Ema barak hakarak lee ami-nia livru sira. Ami sempre lori livru sira husi Tokmok iha mishok laran, bornál neʼebé baibain uza atu lori fehuk. Maski ami lori bornál rua nakonu ho livru sira atu fahe iha fulan ida nia laran, neʼe mós la toʼo. Ami mós haklaken iha komboiu laran.

Tinan ualu liutiha husi ami-nia vizita primeiru ba Balykchy, kongregasaun ida harii iha neʼebá. Neʼe mak iha tinan 1995. Presiza osan barak atu laʼo beibeik husi Tokmok no Balykchy durante tinan barak. Oinsá mak ami halo ida neʼe maski ami la iha osan barak? Irmaun ida fó beibeik kontribuisaun osan ba ami. Jeová hatene katak ami hakarak aumenta ami-nia serbisu ba nia, tan neʼe nia ‘loke odamatan sira iha lalehan’ no fakar tun bensaun ba ami. (Malaquias [Maleakhi] 3:10) Loos duni, ba Jeová, buat hotu bele deʼit!

OKUPADU HO FAMÍLIA NO HAKLAKEN

Iha tinan 1992 haʼu hetan knaar atu serbí nuʼudar katuas kongregasaun. Haʼu mak ema kirgize primeiru atu sai katuas kongregasaun iha ami-nia rai. Iha ami-nia kongregasaun iha Tokmok, iha oportunidade foun atu aumenta ami-nia serbisu ba Jeová. Iha fatin edukasaun sira ami estuda Bíblia ho estudante kirgize barak. Sira ida agora serbí iha Grupu Koordenadór ba Sukursál, no rua tan serbí nuʼudar pioneiru tempu-tomak. Ami mós hakaʼas an atu ajuda irmaun-irmán sira iha ami-nia kongregasaun. Maizumenus iha tinan 1990, ami-nia livru sira no reuniaun sira halaʼo iha lia-rusu. Maibé ba ema barak iha kongregasaun, sira-nia língua materna mak lia-kirgize. Tan neʼe, haʼu tradús diskursu sira ba lia-kirgize, no neʼe ajuda sira atu komprende liután lia-loos.

Haʼu no Mairambubu okupadu tebes hodi tau matan ba ami-nia oan sira. Ami lori sira ba haklaken no ba reuniaun. Maski ami-nia oan-feto Gulsayra tinan 12 deʼit, nia gosta tebes koʼalia kona-ba Bíblia ba ema neʼebé laʼo iha dalan. No ami-nia oan sira gosta dekór eskritura sira. Iha dalan neʼe mak ami-nia oan no bei-oan sira hola parte iha kongregasaun nia atividade sira. Husi ami-nia oan naʼin-9 no bei-oan naʼin-11 neʼebé sei moris, naʼin-16 serbí Jeová ka tuir reuniaun sira hamutuk sira-nia inan-aman.

MUDANSA FURAK SIRA

Irmaun-irmán sira neʼebé lori liafuan diʼak ba ami-nia área iha tempu uluk sei hakfodak tebes atu haree mudansa sira agora neʼe. Buat ida mak, maizumenus tinan 1990, ami hetan liberdade atu haklaken no halibur hamutuk atu adora Jeová.

Iha tinan 1991, haʼu no haʼu-nia feen tuir reuniaun boot iha Alma-Ata, rai-Kazakistaun. Neʼe mak dala primeiru ami bele tuir reuniaun boot ba loron tolu. No iha 1993, irmaun sira iha Kirgizistaun halaʼo reuniaun boot iha estádiu Spartak iha Bishkek ba dala primeiru. Irmaun-irmán sira uza semana ida atu hamoos estádiu neʼe. Diretór ba fatin neʼe hakfodak tebes, no nia fó ami uza fatin neʼe hodi la selu.

Tinan 1994 mak espesiál tebes tanba neʼe mak dala primeiru ami-nia livru ida tradús ba lia-kirgize. Ohin loron iha sukursál iha Bishkek irmaun-irmán sira neʼebé serbisu iha tradusaun tradús beibeik ita-nia livru sira ba lia-kirgize. Iha tinan 1998 governu fó lisensa ba Testemuña ba Jeová atu halo ita-nia atividade sira iha Kirgizistaun. Ita-nia organizasaun aumenta boot ba beibeik, no agora iha haklaken-naʼin 5.000 liu iha rai neʼe. Iha kongregasaun hamutuk 83 no grupu 25 iha lia-xinés, inglés, kirgize, rusu, língua liman rusu nian, turku, uigur no uzbeke. Irmaun-irmán sira-neʼe serbí Jeová ho unidade maski husi rai oioin. Buat hotu neʼe bele kumpre tan deʼit Jeová nia ajuda.

Jeová mós ajuda haʼu troka haʼu-nia moris. Haʼu moris iha família neʼebé kiak no eskola ba tinan lima deʼit. Maski nuneʼe, Jeová fó priviléjiu ba haʼu atu serbí nuʼudar katuas no hanorin lia-loos husi Bíblia ba ema neʼebé hetan edukasaun boot liu haʼu. Loos duni, Jeová bele kumpre buat neʼebé furak tebes. Husi haʼu-nia esperiénsia rasik haʼu bele haree katak ba Jeová, “buat hotu bele deʼit”.​—Mateus 19:26.