Hakarak hatene?

Oinsá mak Estevão bele sai kalma nafatin bainhira ema fó-terus ba nia?

ESTEVÃO hamriik iha grupu ida nia oin neʼebé hirus tebes. Sira mak membru husi tribunál aas liu hotu iha Izraél naran Sinédriu. Juis naʼin-71 sira-neʼe mak ema neʼebé iha podér boot iha nasaun Izraél. Amlulik Boot Caifás neʼebé sai ulun ba tribunál neʼebé fó kastigu-mate ba Jesus fulan hira liubá, nia mak halibur juis sira-neʼe. (Mateus 26:57, 59; Apóstolu 6:8-12) Bainhira sira lori sasin falsu oioin atu kontra Estevão, sira haree buat neʼebé la hanesan baibain kona-ba Estevão, ninia oin haree “hanesan anju ida nia oin”.​—Apóstolu 6:13-15.

Oinsá mak Estevão bele kalma nafatin no la sai taʼuk iha situasaun hanesan neʼe? Antes ema kaer Estevão ba Sinédriu, Maromak nia espíritu fó forsa ba nia hodi halo Maromak nia serbisu ho badinas. (Apóstolu 6:3-7) Espíritu santu neʼe mak sai hanesan ksolok-naʼin no ajuda Estevão atu hanoin-hetan fali eskritura sira bainhira ema halo julgamentu ba nia. (João 14:16, nota-rodapé.) Apóstolu kapítulu 7 hatete katak, bainhira Estevão defende ninia an ho aten-brani, espíritu santu ajuda nia hanoin-hetan fali eskritura 20 ka liu husi Eskritura Lia-Ebraiku. (João 14:26) Maibé Estevão nia fiar sai metin liután kuandu nia haree liuhusi vizaun ida Jesus hamriik iha Maromak nia liman sorin loos.​—Apóstolu 7:54-56, 59, 60.

Karik loron ida ita bele hasoru ema neʼebé ameasa ka fó-terus ita. (João 15:20) Ita mós bele halo nakonu ita-nia an ho Jeová nia espíritu liuhusi estuda beibeik ninia Liafuan no haklaken ho badinas. Halo nuneʼe mós bele ajuda ita atu hetan kbiit hodi tahan hasoru ema neʼebé kontra no sai kalma nafatin iha laran.​—1 Pedro 4:12-14.