Ita hanoin-hetan ka lae?
Ita lee didiʼak informasaun sira husi ita-nia Livru Haklaken foin daudauk neʼe ka lae? Koko atu hatán ba pergunta sira tuirmai neʼe:
Bíblia fó evidénsia saida katak Maromak hanoin ita?
Bainhira povu Izraél sai atan iha rai-Ejitu, Maromak hatene kona-ba sira-nia terus, no nia mós sente ida-neʼe. (Éxodo 3:7; Isaias 63:9) Maromak kria ita tuir ninia ilas, tan neʼe ita iha hahalok hanoin ema. Maromak hanoin ita maski ita sente katak ita la merese atu simu ninia domin.—wp18.3, p. 8-9.
Jesus hanorin saida atu ajuda ema halakon hahalok diskriminasaun?
Iha Jesus nia tempu ema Judeu barak hatudu hahalok diskriminasaun. Kristu hanorin sira katak sira presiza haraik an no labele foti an kona-ba sira-nia rasa. Nia fó laran-manas ba ninia dixípulu sira atu haree malu hanesan maun-alin.—w18.06, p. 9-10.
Maromak la husik Moisés tama ba rai neʼebé Nia promete, Ita bele aprende lisaun saida husi neʼe?
Moisés iha relasaun diʼak tebes ho Jeová. (Deuteronómio 34:10) Bainhira sira laʼo ona iha rai-fuik maran besik tinan 40 no atu tama ba rai neʼebé Maromak promete, povu muramura dala ida tan tanba bee la iha. Maromak hatete ba Moisés atu koʼalia ba fatuk boot atu halo bee sai. Maibé duké halo nuneʼe, Moisés baku fali fatuk neʼe. Karik Jeová sai hirus ba Moisés tanba la halo tuir Ninia matadalan ka karik tanba Moisés la fó glória ba Maromak kona-ba milagre neʼe. (Números 20:6-12) Ida-neʼe hanorin mai ita katak importante tebes atu halo tuir Maromak no fó glória ba nia—w18.07, p. 13-14.
Saida mak bele fó influénsia ba ita-nia opiniaun kona-ba ema seluk?
Iha buat tolu neʼebé bele fó influénsia ba ita-nia opiniaun kona-ba ema seluk, neʼe mak: ema nia rasa ka nasionalidade, ema neʼe riku ka kiak, no idade. Importante tebes atu hakaʼas an hodi haree ema seluk hanesan Maromak haree sira. (Apóstolu 10:34, 35)—w18.08, p. 8-12.
Iha dalan saida deʼit mak irmaun neʼebé idade ona bele ajuda ema seluk?
Maromak nafatin hafolin irmaun idade neʼebé simu mudansa kona-ba sira-nia knaar no sira bele halo buat barak atu ajuda ema seluk. Sira bele hakaʼas an atu koñese liután irmaun-irmán sira-nia kaben neʼebé la adora Jeová, ajuda irmaun-irmán sira neʼebé la ativu, halaʼo estuda Bíblia, no aumenta serbisu haklaken.—w18.09, p. 8-11.
Ema Kristaun iha saida deʼit iha sira-nia Ekipamentu Hanorin nian?
Iha kartaun kontaktu no konvite sira. Iha tratu ualu no mós Livru Haklaken no Matan-moris bá! Iha Ekipamentu Hanorin nian mós iha broxura balu, livru estuda nian rua no vídeo haat, inklui vídeo Tanbasá Estuda Bíblia?—w18.10, p. 16.
Oinsá mak ema Kristaun bele “sosa lia-loos”, hanesan iha Provérbios 23:23?
Ita la presiza uza osan hodi sosa lia-loos. Maski nuneʼe, ita presiza uza ita-nia tempu no hakaʼas an atu hetan neʼe.—w18.11, p. 4.
Saida mak ita bele aprende husi Oseias neʼebé simu fali ninia feen Gomer?
Gomer halo beibeik adultériu maibé Oseias fó perdua ba nia no moris hamutuk nafatin ho nia. Se ema Kristaun ida halo sala seksuál, ninia kaben neʼebé la halo sala bele hili atu fó perdua. Se ema neʼebé la sala halo fali relasaun seksuál ho ninia kaben neʼebé la laran-metin, la iha tan razaun neʼebé loos atu halo divórsiu.—w18.12, p. 13.