Hakarak hatene?
Sinagoga iha apóstolu sira-nia tempu: Dezeñu neʼe hatudu parte oioin husi sinagoga, no neʼe atu hanesan sinagoga iha apóstolu sira-nia tempu neʼebé hetan iha Gamla, maizumenus kilómetru 10 iha parte nordeste husi Tasi Galileia. Neʼe ajuda ita hatene sinagoga iha tempu uluk mak hanesan saida.
Horibainhira mak sinagoga komesa?
LIAFUAN “sinagoga” mai husi liafuan Gregu neʼebé signifika “asembleia” ka “halibur hamutuk”. Naran neʼe diʼak duni tanba husi tempu antigu sinagoga mak fatin ba ema Judeu halibur hamutuk hodi simu hanorin no halaʼo adorasaun. Eskritura Lian Ebraiku la temi kona-ba sinagoga, maibé Eskritura Lian Gregu temi ho klaru katak fatin neʼe iha ona iha apóstolu sira-nia tempu.
Matenek-naʼin barak fiar katak sinagoga komesa durante tempu neʼebé ema Judeu sai dadur iha Babilónia. Livru ida (Encyclopaedia Judaica) dehan: “Ema dadur sira neʼebé la iha Templu iha rai estranjeiru presiza hetan kmaan husi sira-nia situasaun susar, tan neʼe dala ruma sira halibur hamutuk, karik iha loron Sábadu, no lee Eskritura sira.” Bainhira ema Judeu sai livre husi dadur, karik sira kontinua halibur hamutuk atu halo orasaun no lee Eskritura sira no harii sinagoga iha fatin neʼebé sira hela bá.
Iha apóstolu sira-nia tempu, ema Judeu sira neʼebé hela iha fatin oioin iha área Mediterráneu, iha Médiu Oriente, no mós iha rai-Izraél, haree sinagoga nuʼudar parte importante ba sira-nia adorasaun no mós sira-nia moris loroloron. Matenek-naʼin ida naran Lee Levine husi universidade ida (The Hebrew University of Jerusalem) dehan katak sinagoga mak “sai nuʼudar fatin atu tau kontribuisaun, estuda, han ai-han sagradu, tribunál, no fatin ba reuniaun polítiku no sosiál nian”. Nia dehan tan: “Importante liu mak neʼe sai nuʼudar fatin adorasaun”. Tan neʼe, ita la hakfodak katak Jesus tuir beibeik reuniaun iha sinagoga. (Mc 1:21; 6:2; Lc 4:16) Iha neʼebá nia hanorin no anima ema. Bainhira harii kongregasaun Kristaun, apóstolu Paulo mós haklaken dala barak iha sinagoga sira. Baibain ema neʼebé iha interese ba buat espirituál mai halibur iha sinagoga, tan neʼe bainhira Paulo tama iha sidade ida, dala barak nia bá uluk sinagoga no haklaken iha neʼebá.—Após 17:1, 2; 18:4.