Jeová loke dalan ba Ita atu sai livre

1-2. (a) Saida mak Tinan Livre nian? (Haree kaixa “Saida mak Tinan Livre nian?”) (b) Jesus koʼalia kona-ba saida iha Lucas 4:16-18?

NASAUN balu arranja selebrasaun espesiál bainhira liurai ka liurai-feto ukun ona ba tinan 50. Dala ruma, selebrasaun sira-neʼe halaʼo ba loron ida, semana ida ka kleur liu, no bainhira neʼe remata, ema haluha deʼit.

² Ita sei aprende kona-ba arranju neʼebé diʼak liu. Arranju neʼe mós diʼak liu fali Tinan Livre nian neʼebé ema Izraél antigu selebra kada tinan 50 neʼebé halaʼo durante tinan ida. Tinan Livre nian lori liberdade ba ema Izraél. Tanbasá ita presiza aprende kona-ba neʼe? Tanba ida-neʼe fó-hanoin ita kona-ba arranju neʼebé Jeová halo ona atu ita bele hetan liberdade ba nafatin, no ita mós bele hetan benefísiu husi ida-neʼe ohin loron. Jesus mós koʼalia kona-ba liberdade neʼe.—Lee Lucas 4:16-18.

3. Tuir Levítico 25:8-12, ema Izraél hetan benefísiu saida husi Tinan Livre nian?

³ Ita bele komprende Jesus nia liafuan neʼe se ita aprende uluk kona-ba Tinan Livre nian neʼebé Maromak halo ba ema Izraél antigu. Jeová hatete ba sira: “Imi tenke halo santu tinan 50 nian no fó sai liberdade ba ema hotu neʼebé hela iha rai neʼe. Neʼe sei sai nuʼudar Tinan Livre nian ba imi, no imi ida-idak tenke fila fali ba rai neʼebé imi simu ona nuʼudar liman-rohan no tenke fila fali ba imi-nia família.” (Lee Levítico 25:8-12.) Iha lisaun antes neʼe, ita aprende kona-ba benefísiu neʼebé ema Izraél hetan hodi halo tuir loron Sábadu semana-semana. Maibé ema Izraél hetan benefísiu saida husi Tinan Livre nian? Imajina toʼok, ema Izraél ida monu ba debe boot no tenke faʼan ninia rai atu selu fali debe. Durante Tinan Livre nian, nia bele hetan fali ninia rai. Nuneʼe nia bele “fila fali ba rai neʼebé [nia] simu ona nuʼudar liman-rohan” no tuirmai rai neʼe mós bele sai liman-rohan ba ninia oan. Imajina mós mane ida monu ba debe boot no tenke faʼan ninia oan ka ninia an nuʼudar atan hodi bele selu debe. Durante Tinan Livre nian, atan neʼe tenke “fila fali ba [ninia] família”. Entaun, atan hotu iha esperansa atu sai livre. Neʼe mak arranju neʼebé hatudu katak Jeová hanoin duni ninia povu.

4-5. Tanbasá importante ba ita atu aprende kona-ba Tinan Livre nian?

⁴ Iha benefísiu seluk tan husi Tinan Livre nian ka lae? Sin. Jeová esplika: “La iha ema ida iha imi-nia leet mak sei sai kiak, tanba Jeová sei haraik duni bensaun ba imi iha rai neʼebé Jeová, imi-nia Maromak, sei fó ba imi atu foti nuʼudar imi-nia liman-rohan.” (Deut 15:4) Ohin loron mundu la hanesan neʼe, baibain ema riku sai riku liután no ema kiak sai kiak liután.

⁵ Nuʼudar ema Kristaun, ita la presiza halo tuir Moisés nia Ukun-Fuan. Neʼe katak ita mós la presiza halo tuir ukun-fuan Tinan Livre nian kona-ba halo atan sira sai livre, haluha ema nia debe no fó fali ema nia rai. (Rom 7:4; 10:4; Éf 2:15) Maski nuneʼe, ita iha razaun importante atu aprende kona-ba Tinan Livre nian. Tanbasá? Tanba neʼe fó-hanoin ita kona-ba buat neʼebé Jeová halo ona atu ita sai livre husi sala.

JESUS FÓ SAI LIBERDADE

6. Ema hotu presiza sai livre husi saida?

⁶ Ita hotu presiza hetan liberdade tanba ita mak atan ba sala. Sai atan ba sala mak aat tebes. Nuʼudar sala-naʼin, ita sai ferik-katuas, moras no mate. Bainhira ita hateke ba espellu ka konsulta ba doutór, ita bele haree katak neʼe loos duni. Ita mós sai laran-kraik tanba halo sala. Apóstolu Paulo hatete katak nia “sai atan ba sala nia ukun-fuan neʼebé iha [ninia] isin”. Nia hatutan: “Haʼu mak ema neʼebé kuitadu loos! Sé mak sei salva haʼu husi isin neʼebé lori haʼu ba mate neʼe?”—Rom 7:23, 24.

7. Saida mak Isaias fó sai nanis kona-ba liberdade?

⁷ Ita kontente tanba Maromak arranja atu halo ita livre husi sala. Liuhusi Jesus mak ita bele sai livre. Tinan 700 liu antes Jesus mai mundu, profeta Isaias fó sai nanis katak iha futuru ema sei hetan liberdade neʼebé diʼak liu fali liberdade neʼebé ema Izraél hetan iha Tinan Livre nian. Isaias hakerek: “Jeová, Naʼi Ukun-Naʼin Boot Liu, fó ona ninia espíritu mai haʼu, tanba Jeová hili haʼu atu haklaken liafuan diʼak ba ema neʼebé laran-maus. Nia haruka haʼu atu kura ema neʼebé laran-kanek, atu fó sai liberdade ba ema dadur sira.” (Isa 61:1) Sé mak kumpre profesia neʼe?

8. Sé mak kumpre Isaias nia profesia kona-ba liberdade?

⁸ Profesia importante neʼe komesa sai loos kuandu Jesus hahú ninia serbisu haklaken. Bainhira Jesus bá Nazaré, fatin neʼebé nia sai boot, nia tama ba sinagoga no lee Isaias nia profesia ba ema Judeu neʼebé halibur hamutuk iha neʼebá: “Jeová fó ona ninia espíritu mai haʼu, tanba nia hili haʼu atu haklaken liafuan diʼak ba ema kiak sira. Nia haruka haʼu atu fó sai liberdade ba ema dadur sira, atu halo ema matan-delek sira haree fali, no atu halo livre ema neʼebé hetan terus, atu haklaken kona-ba tinan neʼebé Jeová hatudu ninia laran-diʼak.” Jesus fó sai katak nia kumpre liafuan sira-neʼe. (Lc 4:16-19, 21) Oinsá?

EMA PRIMEIRU NEʼEBÉ SAI LIVRE

9. Ema barak iha Jesus nia tempu hanoin sira sei sai livre iha dalan oinsá?

⁹ Iha Jesus nia tempu, ema komesa simu liberdade neʼe. Ita bele fiar nuneʼe tanba Jesus hatete: “Ohin, eskritura neʼebé imi foin rona, kumpre ona.” (Lc 4:21) Karik ema barak neʼebé rona ba Jesus, hein atu sai livre husi Roma nia ukun. Karik sira iha hanoin hanesan ho mane naʼin-rua neʼebé hatete: “Ami hanoin katak mane neʼe mak atu salva Izraél.” (Lc 24:13, 21) Ita hatene katak Jesus la anima ninia dixípulu atu kontra Roma nia ukun neʼebé hanehan ema. Maibé nia haruka sira atu “fó ba César buat neʼebé César nian”. (Mt 22:21) Entaun, oinsá mak Jesus halo ema sai livre iha tempu neʼebá?

10. Jesus ajuda ema atu sai livre husi saida?

¹⁰ Maromak nia Oan-Mane mai atu ajuda ema sai livre iha dalan rua. Primeiru, Jesus ajuda ema atu sai livre husi ulun-naʼin relijiaun sira-nia doutrina falsu. Iha tempu neʼebá, ema Judeu barak sai atan ba tradisaun no hanorin neʼebé sala. (Mt 5:31-37; 15:1-11) Ulun-naʼin relijiaun mak hanesan ema matan-delek. Sira dehan katak sira ajuda ema serbí Maromak, maibé tuir loloos sira rasik la serbí Maromak iha dalan loos. Sira la simu Mesias no lia-loos neʼebé nia hanorin, tan neʼe sira nafatin iha nakukun laran no la hetan perdua husi sira-nia sala. (João 9:1, 14-16, 35-41) Hodi hanorin lia-loos no hatudu ezemplu diʼak, Jesus hatudu ba ema haraik an katak sira bele sai livre husi hanorin falsu.—Mc 1:22; 2:23–3:5.

11. Saida mak dalan segundu neʼebé Jesus ajuda ema atu sai livre?

¹¹ Segundu, Jesus loke dalan ba ema atu sai livre husi atan ba sala. Liuhusi Jesus nia sakrifísiu, Maromak bele fó perdua ba ema neʼebé hatudu fiar no simu sakrifísiu neʼe. (Ebr 10:12-18) Jesus hatete: “Se Oan-Mane halo imi livre, imi sei sai livre duni.” (João 8:36) Liberdade neʼe mak diʼak liu fali liberdade neʼebé ema Izraél simu iha Tinan Livre nian. Porezemplu, mane neʼebé sai livre husi moris nuʼudar atan iha Tinan Livre nian bele sai fali atan no ikusmai mate. Maibé liberdade neʼebé mai husi Jesus mak ba nafatin.

12. Sé mak ema primeiru neʼebé hetan benefísiu husi liberdade neʼebé Jesus fó sai?

¹² Iha loron Pentekostes 33 EC, liuhusi espíritu santu Jeová hili apóstolu sira no mós ema laran-metin seluk atu sai ninia oan-hakiak no ikusmai sira sei simu moris-hiʼas ba lalehan atu ukun hamutuk ho Jesus. (Rom 8:2, 15-17) Sira mak ema primeiru neʼebé hetan benefísiu husi liberdade neʼebé Jesus fó sai iha sinagoga iha Nazaré. Mane no feto sira-neʼe la sai tan atan ba hanorin falsu no kostume sira neʼebé la bazeia ba Maromak nia Liafuan. Tuir Maromak nia haree sira livre ona husi sala neʼebé lori sira ba mate. Tinan Livre nian iha dalan simbóliku hahú bainhira Maromak nia espíritu tun ba Jesus nia dixípulu sira iha tinan 33 EC, no sei remata bainhira Jesus nia Ukun ba Tinan Rihun Ida remata. Buat diʼak saida mak sei akontese durante tempu neʼe?

EMA RIHUN BA RIHUN TAN SEI SAI LIVRE

13-14. Sé tan mak bele simu liberdade neʼebé Jesus fó sai?

¹³ Ohin loron, ema rihun ba rihun husi nasaun oioin mak parte husi “bibi-malae seluk”. (João 10:16) Maromak la hili sira atu ukun hamutuk ho Jesus iha lalehan. Maibé Bíblia hanorin katak sira iha esperansa atu moris ba nafatin iha mundu. Neʼe mak Ita-nia esperansa ka lae?

¹⁴ Ohin loron mós Ita bele simu benefísiu balu neʼebé Kristu nia alin sira simu. Tanba Ita fiar ba Jesus nia sakrifísiu, Ita bele husu perdua ba Ita-nia sala sira. Rezultadu mak Maromak sei simu Ita no Ita bele iha konxiénsia neʼebé diʼak iha ninia oin. (Éf 1:7; Apok 7:14, 15) Hanoin mós kona-ba benefísiu neʼebé Ita hetan tanba sai livre husi hanorin falsu. Jesus hatete: “Imi sei hatene lia-loos, no lia-loos sei halo imi livre.” (João 8:32) Ita kontente tebes atu simu liberdade neʼe.

15. Ita bele simu liberdade no bensaun saida iha futuru?

¹⁵ Iha futuru, ita bele sai livre iha dalan diʼak liután. Lakleur, Jesus sei halakon relijiaun falsu hotu no mós ema nia ukun hotu neʼebé la justu. Maromak sei proteje “ema-lubun boot” neʼebé serbí nia, no tuirmai sira sei moris kontente iha mundu paraízu. (Apok 7:9, 14) Ema barak sei simu moris-hiʼas no hetan oportunidade atu sai livre husi buat aat hotu neʼebé mosu tanba Adão nia sala.—Após 24:15.

16. Iha futuru ema sei hetan liberdade furak saida?

¹⁶ Durante Kristu nia Ukun ba Tinan Rihun Ida, Jesus no sira neʼebé ukun hamutuk ho nia sei ajuda ema atu hetan saúde neʼebé perfeitu no sai fali Maromak nia oan sira. Ema Izraél antigu sai livre durante Tinan Livre nian, maibé durante Kristu nia Ukun ba Tinan Rihun ida ema hotu sei hetan liberdade neʼebé diʼak liu. Rezultadu mak ema hotu neʼebé serbí Maromak ho laran-metin sei sai perfeitu no livre husi sala.

17. Tuir Isaias 65:21-23, Maromak nia povu sei moris hanesan saida? (Haree dezeñu iha livru oin.)

¹⁷ Isaias 65:21-23 fó sai profesia kona-ba moris iha mundu. (Lee.) Ita sei la moris nuʼudar baruk-teen. Maibé Bíblia hatudu katak iha tempu neʼebá Maromak nia povu sei halo serbisu diʼak neʼebé halo sira kontente. Bainhira Kristu nia Ukun ba Tinan Rihun Ida remata, ita bele fiar katak ema “sei sai livre husi atan ba isin neʼebé dodok, no hetan liberdade neʼebé furak nuʼudar Maromak nia oan sira”.—Rom 8:21.

18. Tanbasá ita bele fiar katak ita sei kontente iha futuru?

¹⁸ Jeová arranja atu ema Izraél bele iha tempu atu serbisu no mós deskansa, no nia mós sei halo nuneʼe ba ninia povu durante Kristu nia Ukun ba Tinan Rihun Ida. Ita sei iha tempu atu adora Maromak. Iha mundu foun mós ita presiza adora Maromak atu bele hetan kontente neʼebé loos. Ita hotu neʼebé laran-metin ba Maromak sei kontente durante Kristu nia Ukun ba Tinan Rihun Ida tanba ita sei halo serbisu neʼebé halo ita kontente no serbí Maromak hamutuk.