Pergunta husi haklaken-naʼin
◼ Kuandu vizita fatin neʼebé uza atu halaʼo adorasaun no serbisu ba Maromak Jeová, diʼak atu hatais oinsá?
Rai barak iha mundu tomak iha Salaun Reinu, Betél, no sukursál nuʼudar fatin espesiál atu halaʼo adorasaun no serbisu ba Maromak Jeová. Fatin sira-neʼe haree simples, moos, no diʼak atu halo serbisu ba Maromak. Ida-neʼe lahanesan duni ho buat neʼebé ita haree iha Satanás nia mundu. Kuandu ita vizita fatin sira-neʼebé uza atu halaʼo adorasaun no serbisu ba Maromak Jeová, ema seluk sei hanoin katak ita mak nuʼudar Maromak Jeová nia povu neʼebé halo tuir ninia hakarak.
Ita ema kristaun ‘hatudu ita-nia an nuʼudar Maromak nia emar [ka atan]’ iha buat hotu, hanesan uza hatais neʼebé moos no diʼak no kuidadu atu labele halo ita-nia an foʼer no sabraut. (2 Kor 6:3, 4) Ita mós presiza hatudu hahalok neʼebé diʼak. Iha tempu hotu, ita-nia hatais tenke hatudu katak ita mak Maromak Jeová nia atan. Nuneʼe, kuandu ita vizita sede-jerál iha Novaiorke ka sukursál neʼebé iha rai seluseluk, ita tau matan liután kona-ba ita-nia hatais.
Livru Diorganisasi untuk Melakukan Kehendak Yehuwa hatete katak ita presiza halo ita-nia an moos, no hatais roupa neʼebé la dada atensaun ba ita-nia an rasik kuandu ita halaʼo serbisu haklaken no asiste reuniaun. Tuirmai, iha pájina 138, parágrafu 3, hatete: “Hanoin-hetan katak, naran Betél mak ‘Maromak nia uma’. Tan neʼe, ita-nia hatais no hahalok tenkesér moos no diʼak, hanesan atu asiste reuniaun iha Salaun Reinu hodi adora Maromak.” Haklaken-naʼin neʼebé vizita Betél tenke halo tuir matadalan ida-neʼe, maski sira hela besik ka dook husi Betél. Hodi halo nuneʼe, ema neʼebé vizita Betél hatudu katak sira agradese no respeitu ba fatin sira-neʼe.—Sal 29:2.
Ita-nia hatais tenke hatudu katak ita mak ema neʼebé “hadomi Maromak”. (1 Tim 2:10) Se ita hatais moos no diʼak, ida-neʼe bele ajuda ema seluk atu muda sira-nia hanoin kona-ba adorasaun ba Maromak Jeová. Maski nuneʼe, irmaun no irmán balu neʼebé vizita fatin neʼebé uza atu halaʼo serbisu ba Maromak Jeová, sira-nia hatais runguranga no sabraut, ka dada atensaun ba sira-nia an rasik. Hatais hanesan neʼe ladiʼak ba ema kristaun iha tempu hotu. Kona-ba ida-neʼe, no mós kona-ba buat hotu-hotu iha ita-nia moris, ita hakarak tuir Maromak nia matadalan neʼebé halo Maromak nia povu lahanesan ho mundu. Ita halo buat hotu atu fó glória ba Maromak.—Rom 12:2; 1 Kor 10:31.
Nuneʼe, bainhira ita vizita fatin neʼebé uza atu halaʼo adorasaun no serbisu ba Maromak Jeová, husu ba ita-nia an: ‘Haʼu-nia hatais moos no diʼak ka lae? Haʼu-nia hatais hatudu respeitu ba fatin neʼebé haʼu atu bá ka lae? Haʼu-nia hatais hatudu katak haʼu Maromak nia atan ka lae? Haʼu-nia hatais halo ema seluk sente diʼak ka lae? Haʼu-nia hatais dada ema nia atensaun ba haʼu-nia an ka lae?’ Kuandu ita vizita fatin espesiál neʼe ho planu ka ita bá derrepente deʼit, diʼak atu husu pergunta sira-neʼe ba ita-nia an. Liuhusi ita-nia hatais, mai ita sempre halo “Maromak . . . nia doutrina bele hetan naran diʼak”!—Tito 2:10.