“Laʼo tuir nia ain-fatin”
1. Atu sai haklaken-naʼin neʼebé diʼak, ita tenke halo saida?
1 Jesus la bá eskola amlulik nian, maibé nia mak Haklaken-Naʼin neʼebé boot liu iha ema nia istória. Ita sente kontente tebes, tanba agora ita bele lee iha Bíblia laran kona-ba oinsá mak Jesus halaʼo ninia knaar. Atu ita mós bele sai haklaken-naʼin neʼebé diʼak, ita tenke “laʼo tuir nia ain-fatin”.—1 Ped 2:21.
2. Saida mak ajuda ita atu haburas domin hanesan domin neʼebé Jesus hatudu ba ema?
2 Hatudu domin ba emab: Domin ba ema seluk book Jesus atu halaʼo ninia serbisu. (Mc 6:30-34) Ema barak iha ita-nia haklaken-fatin “hakilar tanis” no presiza tebes atu hatene lia-loos. (Rom 8:22) Kuandu ita hanoin kona-ba sira-nia situasaun neʼebé susar, no mós oinsá mak Maromak Jeová sente kona-ba sira, ida-neʼe sei book ita atu tahan hodi kontinua haklaken. (2 Ped 3:9) Liután neʼe, se ita hatudu katak ita hanoin tebes sira, sai fasil liu ba sira atu simu ita-nia mensajen.
3. Jesus uza oportunidade saida deʼit atu haklaken?
3 Uza didiʼak oportunidade hotu: Jesus uza oportunidade hotu atu fahe lia-foun diʼak ba ema seluk. (Mt 4:23; 9:9; Joao 4:7-10) Hanesan neʼe, ita mós hakarak sai prontu nafatin atu koʼalia kona-ba lia-loos iha ita-nia moris loron-loron nian. Ema balu sempre lori Bíblia no livru sira atubele fó sasin ba ema iha serbisu-fatin, eskola, loja, ka fatin seluk.
4. Oinsá mak ita bele hatoʼo mensajen kona-ba Maromak nia Reinu iha serbisu haklaken?
4 Dada atensaun ba Maromak nia Reinu: Bainhira Jesus haklaken, nia hatoʼo lia-foun diʼak Reinu nian. (Lc 4:43) Karik ita la koʼalia kedas kona-ba Maromak nia Reinu, maibé ita hakarak nafatin ajuda ema atu hatene katak Maromak nia Reinu deʼit mak fó esperansa ba ema. No maski ita koʼalia kona-ba mundu aat atu hatudu katak ita moris iha loron ikus sira, keta haluha atu dada atensaun ba “liafuan foun diʼak”.—Rom 10:15.
5. Atu halaʼo ita-nia knaar ho diʼak, iha dalan saida deʼit mak ita tenke uza Bíblia?
5 Hanorin husi Maromak nia Liafuan: Durante tempu neʼebé Jesus haklaken, nia sempre uza Eskritura nuʼudar ninia hanorin nia hun. Nia nunka hanorin ka halo buat ruma hodi tuir nia hanoin rasik. (Joao 7:16, 18) Nia simu Maromak nia Liafuan hanesan ai-han loron-loron nian, no uza ida-neʼe atu hasoru babeur husi Diabu. (Mt 4:1-4) Atu ita bele hanorin ema ho didiʼak, ita tenke lee Bíblia loron-loron, no halo tuir iha ita-nia moris rasik. (Rom 2:21) Kuandu ita hatán pergunta ruma bainhira ita halaʼo ita-nia knaar, ita presiza hatudu oinsá mak Bíblia apoia buat neʼebé ita koʼalia daudauk no koko atu lee husi Bíblia rasik. Ita hakarak uma-naʼin atu hatene katak ita la koʼalia tuir ita-nia hanoin, maibé tuir Maromak nia hanoin.
6. Saida mak Jesus halo atu book ema nia laran kuandu nia hanorin?
6 Book ema nia laran kuandu hanorin: Kuandu amlulik boot no farizeu sira husu ba soldadu sira tansá mak sira la konsege kaer Jesus, sira hatán: “Ema ida seidauk koʼalia hanesan ema neʼe!” (Joao 7:46) Jesus la koʼalia lia-loos deʼit, maibé nia hanorin iha dalan neʼebé bele book ema nia laran. (Lc 24:32) Nia uza ai-knanoik neʼebé foti husi moris loron-loron nian, hodi ajuda ema atubele komprende buat neʼebé nia hanorin. (Mt 13:34) Jesus la fó informasaun barak demais ba ninia rona-naʼin. (Joao 16:12) Nia la dada atensaun ba nia an rasik, maibé ba Maromak Jeová. Hanesan Jesus, ita bele sai mestre neʼebé diʼak, se ita ‘tau matan didiʼak ba buat neʼebé ita hanorin’.—1 Tim 4:16.
7. Tansá mak Jesus la para atu halaʼo ninia knaar?
7 La para maski ema la rona no kontra ita: Maski Jesus halo milagre barak, ema barak la rona nia. (Lc 10:13) Foufoun, Jesus nia família rasik mós hanoin katak nia “bulak ona”. (Mc 3:21) Maski nuneʼe, Jesus la para. Nia la lakon haksolok, tanba nia fiar duni katak nia iha lia-loos neʼebé bele halo ema sai livre. (Joao 8:32) Hodi simu ajuda husi Maromak Jeová, ita mós sei la para, maski ema la rona no kontra ita.—2 Kor 4:1.
8. Oinsá mak ita bele banati-tuir Jesus neʼebé haklaken lia-foun diʼak hodi la buka nia rasik nia diʼak?
8 Haklaken hodi la buka ita rasik nia diʼak: Jesus la hanoin atu moris diʼak ho rikusoin, tanba nia hanoin uluk kona-ba knaar neʼebé nia simu husi Maromak. (Mt 8:20) Nia la kole atu haklaken, no dala ruma haklaken toʼo kalan. (Mc 6:35, 36) Jesus hatene katak nia iha tempu uitoan deʼit atu halo hotu ninia knaar. Tanba tempu neʼebé ita iha “badak liu ona”, ita mós la buka ita rasik nia diʼak, maibé fó ita-nia tempu, forsa, no rikusoin hodi halo tuir Jesus nia ezemplu.—1 Kor 7:29-31.
9. Oinsá mak ita bele sai haklaken-naʼin neʼebé diʼak ohin loron?
9 Ema kristaun sira iha apóstolu nia tempu halaʼo sira-nia knaar ho didiʼak tanba sira aprende husi Jesus. (Apos 4:13) Se ita halo tuir ezemplu husi Haklaken-Naʼin neʼebé boot liu iha ema nia istória, ita mós bele halaʼo ita-nia knaar ho didiʼak.—2 Tim 4:5.