Pergunta husi haklaken-na’in
◼ Se mane ho feto ida hakarak atu uza Salaun Reinu atu halaʼo sira-nia kazamentu, sira presiza koʼalia kona-ba saida deʼit ho katuas kongregasaun nian?
Kazamentu neʼebé halaʼo tuir Bíblia nia matadalan fó glória ba Maromak Jeová—liuliu kuandu kazamentu neʼe halaʼo iha Salaun Reinu. Serimónia neʼebé ita halaʼo iha neʼebá bele fó naran diʼak ba ita-nia organizasaun. Atu “buat hotu sei halo loloos no momoos”, katuas kongregasaun nian presiza koʼalia hamutuk ho sira neʼebé hakarak kaben iha Salaun Reinu kona-ba oinsá kazamentu neʼe sei halaʼo.—1 Kor 14:40.
Mane ho feto neʼebé hakarak uza Salaun Reinu atu halaʼo sira-nia kazamentu tenke husu lisensa hodi hakerek karta ba grupu servisu husi kongregasaun ida, neʼebé halo reuniaun iha fatin neʼebá. Sira-nia karta tenke hatama sedu no fó-hatene kona-ba loron no oras saida mak sira hakarak atu uza salaun neʼe. Sira presiza hanoin-hetan katak katuas sira sei la troka tempu reuniaun nian tan kazamentu neʼe. Liután neʼe, ema neʼebé hakarak kaben tenke iha naran diʼak iha kongregasaun, moris tuir Bíblia nia matadalan no moris tuir Maromak Jeová nia lei.
Atu kazamentu neʼe bele hatudu respeitu ba ita-nia Maromak, mane ho feto neʼebé hakarak kaben presiza koʼalia ho kongregasaun nia grupu servisu kona-ba arranju hotu ba loron kaben nian neʼe antes sira prepara buat hotu. Maski katuas sira la obriga mane ho feto atu halo tuir buat neʼebé katuas sira gosta, maibé se planu ruma ladún diʼak mane ho feto neʼebé hakarak kaben tenke hadiʼa. Bele toka deʼit múzika neʼebé iha ita-nia livru knananuk ka uza múzika husi CD Kingdom Melodies. Tenke hetan mós lisensa atubele enfeita ka muda kadeira sira iha Salaun Reinu. Se karik iha ema neʼebé hasai foto ka halo vídeo, ida-neʼe tenke halo iha dalan neʼebé hatudu nafatin respeitu ba tempu neʼe. Katuas sira bele fó lisensa atu halo treinu ba kazamentu iha Salaun Reinu bainhira ida-neʼe la hanetik kongregasaun nia atividade. Labele tau konvite ruma iha kongregasaun nia kuadru avizu. Maibé, katuas sira bele hatoʼo avizu iha reuniaun serbisu atu fó-hatene ba kongregasaun kona-ba kazamentu neʼebé sei halaʼo iha Salaun Reinu.
Maski la iha lei katak ema hotu neʼebé akompaña noivu no noiva tenkesér ema neʼebé hetan batizmu ona, maibé la diʼak atu uza ema neʼebé halaʼo moris la tuir Bíblia matadalan ka ema neʼebé iha hahalok neʼebé bele hamosu dúvida iha ema seluk nia hanoin. Katuas ida mak tenke halaʼo serimónia kazamentu neʼe. Katuas sira mak iha knaar atu hanorin Maromak nia Liafuan ba kongregasaun, tan neʼe sira mak iha kbiit atu fó sai Bíblia nia matadalan kona-ba moris kaben nian iha tempu importante neʼe.—1 Tim 3:2.
Katuas ida neʼebé sei halaʼo serimónia kazamentu neʼe tenke hatene nanis kona-ba arranju hotu, tanba ida-neʼe mós sei kona nia. Nia sei koʼalia hamutuk ho mane no feto neʼebé hakarak kaben atubele hatene kona-ba sira-nia hahalok durante tempu namora nian sei moos nafatin ka lae; tempu neʼe mak mane ho feto neʼe tenke koʼalia ho laran-moos no la taka. Se karik noiva ka noivu uluk kaben dala ida ona, sira tenke hatudu katak tuir Bíblia no mós tuir lei sira livre atubele kaben fali. (Mt 19:9) Ida-neʼe inklui hatudu ba katuas neʼe dokumentu neʼebé dehan katak tuir lei sira soe malu ona.
Kuandu mane no feto neʼebé hakarak kaben koʼalia la taka no serbisu hamutuk ho katuas sira, kazamentu sei sai nuʼudar loron neʼebé haksolok ba ema hotu.—Prov 15:22; Ebr 13:17.