“Hela nafatin iha Maromak nia domin”
1. Tansá Grupu Administradór halo livru “Hela Nafatin iha Maromak nia Domin”?
1 Ita haksolok tebes atu estuda livru foun “Hela Nafatin iha Maromak nia Domin” iha Estudu Bíblia iha Kongregasaun. Estuda livru neʼe sei komesa iha semana 23 Fevereiru! Karta neʼebé Grupu Administradór hatoʼo ba ema ida-idak neʼebé hadomi Maromak Jeová ramata ho liafuan tuirmai neʼe: “Ho ami-nia laran tomak, ami hein katak livru ida-neʼe sei ajuda imi atu kontinua halaʼo imi-nia moris tuir lia-loos no hodi nuneʼe hela nafatin ‘iha Maromak nia domin hodi hein . . . moris rohan-laek’.—Jud 21.”
2. Livru neʼe sei ajuda ita iha dalan saida deʼit?
2 Ita sei estuda kona-ba saida? Oinsá mak Bíblia nia matadalan ajuda ita kona-ba ransu ho ema seluk, halo atividade halimar nian, hatudu respeitu ba sira neʼebé mak ita-nia ulun, hadiʼa ita-nia toman, halaʼo moris kaben nian, no mós dalan neʼebé ita koʼalia no ita-nia kostume sira? Hodi estuda livru neʼe, ita sei treinu ita-nia laran, ka kbiit neon nian atu hatene kona-ba buat diʼak no aat, atubele moris tuir Maromak nia matadalan iha ninia Liafuan. (Sal 19:7, 8) Nuʼudar ita komprende diʼak liután dalan neʼebé Maromak Jeová hanoin, ida-neʼe sei book ita atu hakaʼas an liután atu halo kontente Maromak no halo tuir nia iha ita-nia moris tomak.—Prov 27:11; 1 Joao 5:3.
3. Tansá mak ita tenke hakaʼas an atu hola parte iha estudu semana-semana?
3 Hakaʼas an atu hola parte: Kuandu Ita prepara, hanoin oinsá Ita bele hahiʼi Maromak iha ninia povu nia leet. (Ebr 13:15) Kongregasaun tomak sei estuda hamutuk livru foun neʼe. Tanba ita sei estuda informasaun uitoan deʼit kada semana, fasil ba ita atu prepara didiʼak. Nuneʼe, ita hotu bele fahe buat neʼebé ita aprende ona. Ita-nia komentáriu neʼebé ita prepara didiʼak sei book maluk kristaun sira seluk atu hatudu domin no hahalok diʼak, no ida-neʼe sei halo ita-nia estudu sai moris liu. (Ebr 10:24) No mós ita sei sai kontente liu kuandu ita ida-idak fó komentáriu kona-ba ita-nia fiar.
4. Tansá mak importante tebes atu halo tuir Maromak Jeová nia ukun-fuan sira?
4 Iha Jesus nia kalan ikus kuandu nia moris nuʼudar ema iha rai, nia esplika katak atubele hela nafatin iha Maromak nia domin, importante tebes atu ita halo tuir Maromak nia ukun-fuan sira. (Joao 15:10) Livru “Maromak nia Domin” sei ajuda ita atu hakaʼas an liután atu halo tuir Bíblia nia matadalan sira iha ita-nia moris loroloron no atu “hela nafatin iha Maromak nia domin”.—Jud 21.