Haklaken hametin nafatin ita-nia relasaun ho Maromak Jeová
1. Buat diʼak saida deʼit mak ita hetan kuandu halaʼo serbisu haklaken?
1 Hodi haklaken beibeik ita hametin ita-nia relasaun ho Maromak Jeová, no ida-neʼe halo ita haksolok liután. Klaru katak ita haklaken liuliu atu halo kontente Maromak Jeová. Maibé, hodi halo tuir nia mandamentu atu “haklaken lia-menon neʼe”, ita mós simu bensaun husi Maromak Jeová no haburas hahalok neʼebé diʼak. (2 Tim 4:2; Isa 48:17, 18) Oinsá loos mak haklaken bele hametin ita no halo ita haksolok?
2. Iha dalan saida deʼit mak haklaken hametin ita?
2 Hametin ita no hetan bensaun: Haklaken ajuda ita atu hanoin kona-ba bensaun husi Maromak nia Reinu duké hanoin demais kona-ba susar neʼebé ita hasoru daudaun. (2 Kor 4:18) No mós, bainhira ita esplika hanorin husi Bíblia ba ema seluk ita hametin ita-nia fiar ba buat neʼebé Maromak Jeová promete, no ida-neʼe halo ita hafolin liután lia-loos. (Isa 65:13, 14) Nuʼudar ita ajuda ema seluk atu hametin sira-nia relasaun ho Maromak Jeová no la halo parte iha mundu neʼe, ita mós hametin ita-nia hakarak atu haketak an husi mundu neʼe.—Joao 17:14, 16; Rom 12:2.
3. Oinsá mak serbisu haklaken ajuda ita atu haburas ita-nia hahalok kristaun?
3 Hola parte iha serbisu haklaken ajuda ita atu haburas ita-nia hahalok kristaun. Porezemplu, hakaʼas an atu sai “buat hotu ba ema hotu” ajuda ita atu haraik an liu. (1 Kor 9:19-23) Nuʼudar ita koʼalia ba sira neʼebé “kole no neon-nakraik, hanesan bibi sira neʼebé bibi-atan la iha”, ita aprende atu sente ema seluk nia sentimentu no komprende sira-nia susar. (Mt 9:36) Ita aprende atu tahan maski ema la hatudu interese ka kontra ita. Sin, ita haksolok bainhira ita uza ita-nia moris atu ajuda ema seluk.—Apos 20:35.
4. Ita haree serbisu haklaken oinsá?
4 Atu halaʼo serbisu neʼebé hahiʼi Maromak Jeová mak bensaun boot ba ita, loos ka lae? Nia deʼit mak soʼi atu ita fó adorasaun. Serbisu haklaken hametin ita. Serbisu neʼe lori bensaun barak tebes ba sira neʼebé fó an tomak “atu fó sasin ba evanjellu”.—Apos 20:24.