Uza didiʼak ita-nia livru sira
1. Oinsá mak ita bele halo tuir Jesus nia ezemplu kona-ba fó-agradese ba buat neʼebé Maromak fó mai ita?
1 Depois Jesus halo milagre hodi fó-han ba ema-lubun boot, nia haruka nia dixípulu sira atu halibur hahán neʼebé resin. (Mt 14:19-21) Hodi la soe hahán neʼebé resin, Jesus hatudu ezemplu diʼak atu “fó-agradese” ba buat neʼebé Maromak fó mai ita. Ita mós bele halo tuir ida-neʼe hodi uza didiʼak buat hotu neʼebé Maromak Jeová fó mai ita liuhusi ninia atan laran-metin.—Kol 3:15; Lc 12:42; Mt 24:45-47.
2. Saida mak ita bele halo se ita iha livru fulan-fulan nian barak iha uma?
2 Livru fulan-fulan nian: Se ita la fahe livru fulan-fulan nian ba ema, ikusmai ita iha livru barak iha uma. Se ita sempre iha resin, diʼak liu atu hamenus livru fulan-fulan nian neʼebé ita simu. Oinsá ho livru sira neʼebé tuan ona? Maski tuan, informasaun husi livru sira-neʼe sei diʼak ba ema. Se ita iha livru tuan barak, karik katuas serbisu ka katuas seluk bele ajuda ita oinsá ita bele fahe livru sira-neʼe.
3, 4. Kuandu ita foti livru husi kongregasaun, saida deʼit mak diʼak atu hanoin-hetan?
3 Livru seluk: Kuandu ita komesa fahe livru seluk iha serbisu haklaken, haree uluk iha ita-nia uma se ita iha ona livru neʼebé ita sei fahe ba ema, antes atu foti livru husi kongregasaun. Foti livru neʼebé ita sei uza iha semana ida nia laran deʼit, no se presiza tan mak foin bele foti fali.
4 Kona-ba livru neʼebé Ita sei uza rasik, foti deʼit buat neʼebé presiza. Hakerek Ita-nia naran iha Ita-nia livru. Hodi nuneʼe se karik Ita lakon Ita-nia livru Ita bele hetan fali. Se ita uza Watchtower Library iha CD-ROM no rai-hela ita-nia livru fulan-fulan nian, karik ita la presiza atu hameno livru mahar Menara Pengawal ka Sedarlah! neʼebé tau hamutuk ba tinan ida nian.
5. Saida deʼit mak ita tenke hanoin-hetan kuandu fahe ita-nia livru sira?
5 Oinsá atu fahe livru sira: Ita hakarak atu fahe ita-nia livru sira ba ema neʼebé hatudu interese, laʼós ba ema naran deʼit. La haluha katak ita rasik mak iha responsabilidade atu selu livru sira neʼebé ita uza iha ita-nia serbisu haklaken. Kuandu fahe ita-nia livru ba ema neʼebé hatudu interese, ita bele fó-hatene katak sira bele fó kontribuisaun hodi apoia ita-nia serbisu haklaken neʼebé halaʼo iha mundu tomak.
6. Tansá mak ita tenke hafolin ita-nia livru sira? Ida-neʼe book ita atu halo saida?
6 Hodi halo milagre Jesus fó-han ba ema barak, maibé dala barak liu nia fó-han ema iha dalan espirituál. Jesus hatete: “Ema sei la moris deʼit ho ai-han, maibé ho liafuan sira neʼebé sai husi Maromak futar ibun.” (Mt 4:4) Ita-nia livru sira hanorin lia-loos husi Bíblia neʼebé ajuda ita atu hetan moris rohan-laek. (Joao 17:3) Loos duni, ita-nia livru sira folin-boot tebes. Tan neʼe, ita lakohi estraga deʼit!