Ita bele aumenta Ita-nia serbisu haklaken ka lae?
1. Tanbasá mak serbisu haklaken importante liu agora? Diʼak atu halo saida?
1 Hodi haree ema barak hatudu interese ba lia-foun diʼak Reinu nian, Jesus husu nia dixípulu sira atu “harohan ba toʼos-naʼin atu haruka serbisu-naʼin sira ba nia toʼos”. (Mt 9:37, 38) Tempu atu koʼa besik hotu ona, tan neʼe agora ita-nia serbisu haklaken importante liu. Nuneʼe, diʼak atu hanoin no halo orasaun kona-ba oinsá ita bele aumenta ita-nia serbisu haklaken.—Joao 14:13, 14.
2. Oinsá mak irmaun-irmán barak aumenta sira-nia serbisu haklaken?
2 Aumenta ita-nia serbisu: Ho Maromak Jeová nia ajuda, irmaun-irmán barak komesa atu serbí nuʼudar pioneiru. (Sal 26:2, 3; Flp 4:6) Sira balu hakaʼas an atubele serbí nuʼudar pioneiru ausiliár ba fulan ida ka liu iha tinan ida nia laran. Hodi halo nuneʼe, sira aumenta sira-nia serbisu haklaken. Liután neʼe, serbisu nuʼudar pioneiru ausiliár fó ksolok ba irmaun-irmán sira-neʼe no book sira barak atu hakarak sai pioneiru regular.—Apos 20:35.
3. Se uluk Ita serbí nuʼudar pioneiru, diʼak atu hanoin fali kona-ba saida?
3 Ita bele serbí fali nuʼudar pioneiru ka lae?: Se uluk Ita serbí nuʼudar pioneiru, karik Ita hanoin hela kona-ba ksolok neʼebé Ita hetan iha tempu neʼebá. Diʼak atu hanoin kona-ba serbí fali nuʼudar pioneiru no halo orasaun kona-ba neʼe. Karik buat neʼebé hapara Ita uluk atu serbí nuʼudar pioneiru, agora la iha ona no Ita bele serbí fali nuʼudar pioneiru.—1 Joao 5:14, 15.
4. Oportunidade diʼak saida mak loke ba ita hotu?
4 Serbisu haklaken neʼebé ita halo daudauk besik ona atu ramata. (Joao 4:35, 36) Mai ita hotu haree didiʼak ita-nia situasaun. Karik ita bele halo mudansa ho ita-nia atividade loroloron nian atubele aumenta ita-nia serbisu haklaken hodi bele serbí nuʼudar pioneiru. Se ita la bele aumenta ita-nia serbisu haklaken, karik ita bele hadiʼa dalan neʼebé ita haklaken. (Mc 12:41-44) Serbisu pioneiru mak knaar espesiál neʼebé diʼak liu ba sira neʼebé iha oportunidade atu halo ida-neʼe!—Sal 110:3.