Hahiʼi Maromak Jeová loroloron
1. Saida mak Maromak nia atan sira hakarak halo? Tanbasá?
1 Liurai David fó sai ninia hakarak atu hahiʼi Maromak Jeová “loron tomak”, toʼo tempu neʼebé la iha rohan. (Sal 145:2, 7, 21) Ita mós iha razaun barak atu hahiʼi Maromak Jeová loroloron.—Sal 37:10; 145:14, 18; 2 Ped 3:13.
2. Oinsá mak família sira bele hahiʼi Maromak Jeová loroloron?
2 Iha ita-nia uma: Ita iha livru sira neʼebé bele ajuda ita atu koʼalia hamutuk kona-ba Maromak no kona-ba Bíblia. Ita bele uza livru sira-neʼe kuandu lee hamutuk eskritura loroloron nian, kuandu halaʼo Adorasaun Família nian, no kuandu prepara ba reuniaun sira. Família barak iha toman atu han hamutuk, no ida-neʼe fó sira oportunidade atu koʼalia halimar hamutuk no hahiʼi Maromak Jeová. Kuandu inan-aman koʼalia kona-ba Maromak iha situasaun hanesan neʼe, ida-neʼe bele ajuda sira atu ‘hanorin oan sira dixiplina no Naʼi nia doutrina loloos’.—Ef 6:4; Deut 6:5-7.
3. Oportunidade saida mak ita iha kuandu hamutuk ho irmaun-irmán sira?
3 Hamutuk ho irmaun-irmán sira: Kuandu ita hola parte iha serbisu haklaken ka kuandu ita tuir reuniaun, ita iha oportunidade diʼak atu hahiʼi Maromak Jeová hamutuk ho ita-nia irmaun-irmán sira. (Prov 15:30; Flp 4:8; Ebr 13:15) Tanba ita hotu hadomi Maromak Jeová, ida-neʼe fasil ba ita atu koʼalia ba malu buat neʼebé diʼak kona-ba nia.—Sal 106:1.
4. Ita bele hahiʼi Maromak Jeová iha situasaun saida deʼit?
4 Kuandu koʼalia ho ema seluk: Karik ita-nia situasaun la fó tempu ba ita atu tuir haklaken loroloron. Maski nuneʼe ita bele fó sasin uitoan kona-ba Maromak no ninia hakarak ba maluk iha serbisu fatin, iha eskola, no ba ema seluk neʼebé ita hasoru. Ida-neʼe bele fó esperansa ba ema neʼebé laran-moos. (Sal 27:14; 1 Ped 3:15) Kuandu irmán ida iha aviaun, nia fó sasin ba ema neʼebé tuur iha nia sorin. Ema neʼe sente kmaan no kontente ho buat neʼebé nia rona husi irmán neʼe no fó nia diresaun no númeru telefone, atu nuneʼe sira bele kontaktu ba malu. Nuʼudar situasaun sai aat ba beibeik iha mundu neʼe, Maromak Jeová nia povu lori nafatin “lia-foun diʼak kona-ba buat neʼebé furak liu”. Ida-neʼe fó esperansa ba ema no book sira atu hahiʼi Aman Jeová.—Isa 52:7; Rom 15:11.
5. Tanbasá mak ita hakarak hahiʼi Aman Jeová? Oinsá mak ita bele halo ida-neʼe?
5 Maromak Jeová kontente tebes atu haree nia atan sira fó hahiʼi nia loroloron! Hanesan Maromak nia kriasaun neʼebé haleʼu ita, ita mós bele hahiʼi Maromak loroloron iha ita-nia uma, iha kongregasaun, no kuandu koʼalia ho ema seluk neʼebé seidauk hahiʼi Maromak Jeová.—Sal 19:1-4.