“Laran-manas nafatin iha espíritu”
1. Ita tenke hatudu saida kuandu halaʼo serbisu haklaken?
1 Ita ema kristaun labele para atu halo serbisu ba Maromak. Bíblia haruka ita hotu atu “laran-manas nafatin iha espíritu” no “serbí Naʼi” Jeová. (Rom 12:11) Maibé, iha buat barak neʼebé bele hamenus ita-nia laran-manas atu halaʼo serbisu haklaken. Oinsá mak ita bele halo ita-nia laran-manas “hanesan ahi lakan” hodi halaʼo ita-nia serbisu ba Maromak?—2 Tim 1:6, 7.
2. Oinsá mak estuda Bíblia mesak ajuda ita atu laran-manas iha ita-nia serbisu haklaken?
2 Estuda Bíblia mesak: Hodi bele haklaken ho diʼak, ita tenke hafolin Maromak nia lei sira no husik lia-loos husi Bíblia book ita-nia moris. (Sal 119:97) Kuandu ita estuda Bíblia mesak no hetan lia-loos neʼebé ita seidauk hatene, neʼe book ita-nia laran no aumenta ita-nia laran-manas. Ita-nia domin ba Maromak neʼebé fó lia-loos ba ita no ita-nia hakarak atu fahe lia-foun diʼak ba ema seluk, sei book ita atu hahiʼi no fó-hatene nia naran. (Ebr 13:15) Klaru katak hodi haklaken ho laran-manas ita hatudu katak ita hafolin duni lia-foun diʼak neʼebé ita fahe ba ema seluk.
3. Oinsá mak Maromak nia espíritu santu ajuda ita-nia serbisu haklaken?
3 Husu Maromak nia espíritu santu: Rezultadu diʼak husi ita-nia serbisu haklaken laʼós mai husi ita-nia kbiit rasik. Tuir loloos, ita hetan rezultadu diʼak tanba Maromak nia espíritu santu nia ajuda. (1 Ped 4:11) Hakbesik liután ba Maromak, “forsa boot” nia Hun, nia sei fó forsa ba ita atu haklaken ho aten-brani. (Isa 40:26, 29-31) Kuandu apóstolu Paulo hasoru susar iha ninia serbisu haklaken, nia “hetan Maromak nia tulun”. (Apos 26:21, 22) Maromak Jeová nia espíritu santu bele ajuda ita atu laran-manas nafatin iha ita-nia serbisu haklaken, tan neʼe ita tenke husu ida-neʼe iha ita-nia orasaun.—Lc 11:9-13.
4. Kuandu ita laran-manas atu haklaken, neʼe bele lori rezultadu diʼak saida? Maibé ita mós tenke kuidadu kona-ba saida?
4 Baibain, kuandu ita laran-manas atu haklaken, ida-neʼe mós book ita-nia maluk kristaun sira seluk atu laran-manas. (2 Kor 9:2) Iha haklaken-fatin, baibain ema gosta liu atu rona ita kuandu ita hatoʼo lia-foun diʼak ho laranmanas no fiar-metin. Maibé ita mós labele haluha atu hatudu laran-kmaus no laran-diʼak. (Tito 3:2) Iha tempu hotu, ita hakarak hatudu respeitu ba uma-naʼin no ninia liberdade atu hili.
5. Maromak nia Liafuan fó laran-manas mai ita atu halo saida?
5 Nuʼudar haklaken-naʼin, mai ita “laran-manas nafatin iha espíritu”. Mai ita haburas laran-manas atu haklaken hodi estuda Bíblia mesak no halo orasaun ba Maromak hodi husu nia espíritu santu. Hodi halo nuneʼe, ita bele halaʼo ita-nia serbisu haklaken ho laran-manas no “ho espíritu santu, hodi hatene loloos katak liafuan neʼe loos duni”.—1 Tes 1:5.