‘Hatoʼo ita-nia moris rasik’ atu ajuda ita-nia estudante sira
1. Atu ajuda estudante Bíblia, ita presiza halo saida?
1 Atu ajuda ita-nia estudante Bíblia laʼo ba oin no dedika an ba Maromak, halaʼo estuda Bíblia deʼit la toʼo. Apóstolu Paulo haree nia relasaun ho ema neʼebé nia hanorin hanesan ho inan neʼebé hadomi nia oan. Ita mós hakarak ajuda ita-nia estudante sira laʼo ba oin iha lia-loos hodi ‘hatoʼo ita-nia moris rasik’, neʼe katak fó ita-nia tempu no forsa ba sira, no sai sira-nia kolega.—1 Tes 2:7-9.
2. Tansá mak ita presiza hatudu interese ba ita-nia estudante no sai nia kolega? No oinsá mak ita bele halo nuneʼe?
2 Hatudu interese: Kuandu estudante Bíblia halo tuir buat neʼebé nia aprende, karik nia laran book nia atu la ransu beibeik ho nia kolega sira neʼebé la moris tuir matadalan husi Bíblia. (1 Ped 4:4) No mós, karik nia família la gosta ona nia. (Mt 10:34-36) Ita bele ajuda nia atu la sente triste demais hodi hatudu interese ba nia no sai nia kolega. Misionáriu ida neʼebé iha esperiénsia barak hatete: “Kuandu estudu hotu, keta fila lalais. Se bele, koʼalia halimar uitoan.” Fó atensaun ba Ita-nia estudante nia presiza no ajuda nia. Porezemplu, kuandu nia moras ita bele telefone no vizita nia ka lae? Karik diʼak mós atu tuur hamutuk ho nia iha reuniaun no ajuda haree ninia oan.
3. Saida deʼit mak ita bele halo atu ajuda ita-nia estudante hakbesik ho kongregasaun?
3 Ajuda husi kongregasaun: Se Ita haklaken besik Ita-nia estudante nia uma, diʼak atu lori Ita-nia maluk neʼebé haklaken hamutuk atu koñese malu ho nia. Ita mós bele konvida irmaun ka irmán seluk, inklui katuas, atu tuir Ita-nia estuda. No mós, maski nia foin komesa estudu, la haluha atu konvida nia tuir reuniaun sira iha Salaun Reinu. Hodi halo nuneʼe, ita bele ajuda nia atu hetan haksolok hodi ransu malu ho irmaun-irmán sira iha kongregasaun neʼebé karik sei sai ninia família iha lia-loos.—Mc 10:29, 30; Ebr 10:24, 25.
4. Oinsá mak ita-nia hakaʼas-an atu ajuda ita-nia estudante sira bele fó rezultadu diʼak?
4 Aman ida neʼebé hakaʼas an ajuda oan atu haburas relasaun ho Maromak Jeová sei sente kontente tebes kuandu nia oan foti desizaun rasik atu serbí Maromak Jeová no laʼo tuir lia-loos. (3 Joao 4) Ita mós bele sente haksolok hanesan neʼe kuandu ita ‘hatoʼo ita-nia moris rasik’ atu ajuda ita-nia estudante sira.