Buat neʼebé haʼu halo toʼo ka lae?
1. Dala ruma ema kristaun neʼebé laran-metin hanoin saida?
1 Ita husu ona pergunta hanesan neʼe ka lae? Se Ita kompara buat neʼebé Ita bele halo uluk, karik agora Ita-nia tempu atu hola parte iha serbisu haklaken sai menus tanba Ita sai idade liu, moras, ka Ita-nia responsabilidade iha família laran aumenta liután, no ida-neʼe halo Ita laran-tun. Irmán ida neʼebé iha oan naʼin-tolu hatete katak dala ruma nia sente triste tanba ninia tempu no forsa neʼebé nia uza atu tau matan ninia família hamenus buat neʼebé nia bele halo iha serbisu haklaken. Saida mak ajuda ita iha hanoin neʼebé loos kona-ba ita-nia situasaun?
2. Saida mak Maromak Jeová hakarak ita atu halo?
2 Saida mak Maromak Jeová hakarak husi ita: Ita hotu hakarak halo buat barak liután iha serbisu haklaken. Maibé dala barak buat neʼebé ita hakarak halo la hanesan ho buat neʼebé ita bele halo. Tanba ita sente katak ita hakarak halo buat barak liután, ida-neʼe hatudu katak ita seidauk kontente ho buat neʼebé ita halo daudauk. Ita presiza hanoin-hetan katak Maromak Jeová hatene ita ema fraku no nia nunka husu buat neʼebé ita la bele halo. (Sal 103:13, 14) Saida mak Maromak hakarak ita atu halo? Nia hakarak ita atu serbí nia ho laran tomak.—Kol 3:23.
3. Saida mak bele ajuda ita atu hatene buat neʼebé ita bele halo?
3 Saida mak bele ajuda ita atu hatene buat neʼebé ita bele halo? Ita bele husu Maromak Jeová atu ajuda ita haree didiʼak ita-nia situasaun. (Sal 26:2) Ita mós bele husu maluk kristaun ida neʼebé iha esperiénsia barak iha lia-loos no neʼebé koñese didiʼak ita atu fó-hatene ba ita se iha buat ruma neʼebé ita presiza hadiʼa. (Prov 27:9) No tanba ita-nia situasaun dala ruma troka, diʼak atu ita haree filafali ita-nia situasaun se iha buat ruma neʼebé ita presiza halo diʼak liután.—Ef 5:10.
4. Oinsá mak ita-nia hanoin ba avizu sira kona-ba serbisu haklaken?
4 Ita-nia haree kona-ba avizu: Kuandu ema halai-taru, ema sira neʼebé haree baibain hakilar atu fó laran-manas ba ema neʼebé halai. Sira halo nuneʼe laʼós atu halo ema neʼebé halai lakon esperansa atu manán, maibé atu ajuda sira halai toʼo hotu. Nuneʼe mós, avizu atu haklaken Maromak nia liafuan ho urjente husi ita-nia livru sira no reuniaun sira, tuir loloos atu ajuda ita sai laran-manas liután laʼós atu halo ita hanoin katak ita-nia hakaʼas-an iha serbisu neʼe latoʼo. (2 Tim 4:2, MF) Ita bele fiar katak kuandu ita hakaʼas an atu serbí Maromak ho laran tomak, Maromak Jeová sei hanoin-hetan domin no serbisu neʼebé ita halo ba nia.—Ebr 6:10.