Ajuda ba família sira

1. Oinsá mak Loron Sábadu semana-semana ajuda família sira iha Israel?

¹ Iha Israel antigu, Loron Sábadu mak arranju diʼak husi Maromak Jeová atu ajuda família sira. Iha loron neʼe ema Israel deskansa husi sira-nia serbisu loroloron nian atubele hanoin kleʼan kona-ba Maromak Jeová nia laran-diʼak no sira-nia relasaun ho nia. Inan-aman sira bele uza tempu neʼe atu hanorin sira-nia oan kona-ba Maromak nia Ukun-Fuan. (Deut 6:6, 7) Maromak Jeová arranja Loron Sábadu semana-semana atu nia povu bele fó atensaun liu ba sira-nia adorasaun ba nia.

2. Loron Sábadu hanorin ita saida kona-ba Maromak Jeová?

² Iha ita-nia tempu, Maromak Jeová la husu tan família sira atu halaʼo Loron Sábadu. Maibé, ukun-fuan neʼe hanorin ita buat ruma kona-ba ita-nia Maromak. Nia sempre fó buat diʼak ba ninia povu no ajuda sira iha sira-nia adorasaun. (Isa 48:17, 18) Ohin loron, dalan ida neʼebé Maromak Jeová halo ida-neʼe mak liuhusi Adorasaun Família nian.

3. Tansá mak ita halaʼo Adorasaun Família nian?

³ Tansá mak ita halaʼo Adorasaun Família nian? Hahú iha fulan-Janeiru 2009, ita komesa halaʼo Grupu Estudu Livru nian iha tempu hanesan ho reuniaun Eskola Serbisu Kristaun no Reuniaun Serbisu. Razaun ida ba mudansa neʼe mak atu fó oportunidade ba família sira atu hametin sira-nia relasaun ba Maromak Jeová hodi hili kalan ida semana-semana atu halaʼo adorasaun família nian. Família ida-idak hetan laran-manas atu halaʼo sira-nia estudu nuʼudar família iha loron neʼebé uluk sira uza atu tuir estudu livru nian. Atu nuneʼe, sira bele uza tempu natoon atu koʼalia hamutuk kona-ba Bíblia no estuda kona-ba buat neʼebé família presiza.

4. Família tenke estuda ba oras ida deʼit ka lae? Esplika toʼok.

⁴ Uluk, atubele tuir Grupu Estudu Livru nian ita presiza gasta tempu atu prepara ita-nia an, laʼo ba reuniaun-fatin, no halo buat seluk tan. Ba família barak, hodi tuir reuniaun neʼe, neʼebé halaʼo iha oras ida deʼit, han oras rua ka liu. Tanba muda ona Grupu Estudu Livru, agora ita iha kalan ida atu adora Maromak Jeová nuʼudar família. Nuneʼe, ita lalika hanoin katak ita tenke halaʼo Adorasaun Família nian ba oras ida deʼit. Maibé, diʼak atu hanoin kona-ba Ita-nia família nia presiza no situasaun, no tuirmai deside kona-ba oras hira neʼebé Ita sei uza atu halaʼo Adorasaun Família nian.

5. Tenke uza tempu hotu atu koʼalia hamutuk ka lae? Esplika toʼok.

⁵ Tenke uza tempu hotu atu koʼalia hamutuk ka lae? Kuandu kaben-naʼin no família sira neʼebé iha oan koʼalia hamutuk kona-ba Bíblia, sira hametin malu. (Rom 1:12) Família hakbesik malu liután. Tan neʼe, koʼalia hamutuk kona-ba Bíblia mak importante tebes durante Adorasaun Família nian. Maibé, ema ida-idak iha família laran mós bele uza tempu neʼe atu estuda mesak. Porezemplu, depois família estuda no koʼalia hamutuk tiha, sira ida-idak bele kontinua tuur hamutuk hodi estuda mesak, karik sira bele prepara ba reuniaun sira ka lee livru fulan-fulan. Família balu deside atu la loke televizaun iha kalan neʼe.

6. Oinsá mak Ita bele halaʼo Adorasaun Família nian?

⁶ Oinsá atu halaʼo Adorasaun Família nian? Ita la presiza halaʼo Adorasaun Família nian hodi husu pergunta no resposta deʼit. Hodi halaʼo sira-nia Adorasaun Família nian iha dalan neʼebé família gosta, família barak halo hanesan iha reuniaun Estudu Bíblia iha Kongregasaun, Eskola Serbisu Kristaun, no Reuniaun Serbisu. Reuniaun sira-neʼe fahe ba parte balu no halo iha dalan oioin. Porezemplu, família barak lee Bíblia, prepara parte ida ka rua ba reuniaun, no treinu atu haklaken hamutuk. Ita bele hetan ideia sira kona-ba oinsá atu halaʼo Adorasaun Família nian iha pájina 6.

7. Inan-aman bele halo buat saida deʼit kuandu halaʼo Adorasaun Família nian?

⁷ Inan-aman bele halo buat saida deʼit kuandu halaʼo Adorasaun Família nian? Ita-nia família sei aprende ho diʼak kuandu sira sente hakmatek. Se tempu diʼak, karik ita bele halaʼo estudu iha liur. Dala ruma, ita bele para dala balu atu deskansa uitoan. Família balu han uitoan depois sira estuda. Diʼak atu la uza tempu Adorasaun Família nian atu hirus ka kastigu oan sira. Maski nuneʼe, karik inan-aman bele uza tempu uitoan atu koʼalia kona-ba buat ruma neʼebé oan sira halo neʼebé ladún diʼak, ka kona-ba problema ruma. Maibé, se inan-aman haree katak oan ida iha problema neʼebé boot, karik diʼak liu atu koʼalia ba oan neʼe iha tempu seluk. Hanesan neʼe, sira la hamoe nia iha ninia maun-alin nia oin. Tanba ita adora Maromak neʼebé kontente, ita lakohi halaʼo Adorasaun Família nian iha dalan neʼebé halo família baruk, maibé iha dalan neʼebé halo família hotu kontente.—1 Tim 1:11.

8, 9. Preparasaun saida deʼit mak família nia ulun presiza halo?

⁸ Oinsá mak família nia ulun bele prepara? Família sei hetan buat diʼak liután se família nia ulun prepara didiʼak antes halaʼo Adorasaun Família nian ida-idak. Nia presiza hatene informasaun saida mak família presiza estuda no oinsá atu halo ida-neʼe. (Prov 21:5) Diʼak ba laʼen atu husu ninia feen nia hanoin kona-ba ida-neʼe. (Prov 15:22) Dala ruma diʼak mós atu husu oan sira kona-ba informasaun saida mak sira hakarak estuda nuʼudar família, loos ka lae? Se família nia ulun halo nuneʼe, nia sei hatene sira-nia hanoin no buat neʼebé iha sira-nia laran.

⁹ Família nia ulun la presiza gasta tempu barak atu prepara semana-semana. Karik iha buat ida ka rua neʼebé família gosta halo beibeik, hanesan lee Bíblia hamutuk. Se nuneʼe, família nia ulun la presiza prepara informasaun foun kona-ba parte sira-neʼe. Maski nuneʼe, nia prepara informasaun foun ba parte seluk iha adorasaun família. Karik nia hakarak prepara depois sira estuda, tanba nia sei hanoin kona-ba informasaun saida mak família presiza atu estuda. Família nia ulun balu hakerek iha surat-tahan buat neʼebé sira atu estuda semana oin no taka ida-neʼe iha fatin neʼebé fasil atu haree. Ida-neʼe halo família hein namanas ba sira-nia Adorasaun Família nian no fó tempu ba sira atu prepara se presiza.

10. Oinsá mak sira neʼebé mesak deʼit bele halo Adorasaun Família nian?

¹⁰ Oinsá se haʼu mesak deʼit? Sira neʼebé hela mesak ka mesak deʼit iha lia-loos bele halo Adorasaun Família nian hodi estuda Bíblia mesak. Sira bele tuir programa estudu mesak nian neʼebé importante. Neʼe inklui lee Bíblia, prepara ba reuniaun sira, no lee Livru Haklaken no Sedarlah! Haklaken-naʼin balu mós halo buat seluk tan, hanesan buka-hatene liután kona-ba tema ida ka estuda ita-nia livru seluk. Dala ruma sira bele konvida haklaken-naʼin ida ka família ida atu koʼalia kona-ba Bíblia hamutuk.

11, 12. Bensaun saida deʼit mak ita bele hetan kuandu halaʼo Adorasaun Família nian semana-semana?

¹¹ Bensaun saida deʼit mak ita bele hetan kuandu halaʼo Adorasaun Família nian semana-semana? Sira neʼebé halaʼo adorasaun loos ho laran tomak sai besik liután ba Maromak Jeová. Liután neʼe, família neʼebé adora Maromak hamutuk hametin sira-nia relasaun ba malu. Kaben-naʼin ida koʼalia kona-ba bensaun neʼebé sira hetan, sira hatete: “Nuʼudar kaben-naʼin pioneiru neʼebé la iha oan, ami hein namanas ba kalan neʼebé ami halaʼo Adorasaun Família nian. Ami sente katak ami hakbesik liután ba malu no ba ita-nia Aman iha lalehan. Kuandu ami hadeer iha loron neʼebé ami atu estuda hamutuk, ami hatete ba malu: ‘Ohin, loron saida? Loron Adorasaun Família nian!’”

¹² Arranju atu halaʼo adorasaun família nian ajuda mós família sira neʼebé okupadu. Irmán ida neʼebé haboot oan naʼin-rua mesak no serbí nuʼudar pioneiru hakerek: “Uluk, ami sempre falta estuda família nian tanba haʼu kole. Haʼu la hatene oinsá haʼu bele fahe tempu ba buat hotu. Nuneʼe, haʼu hakerek karta neʼe atu hatoʼo obrigadu barak ba arranju Adorasaun Família nian. Agora, ami bele estuda nuʼudar família semana-semana no hetan bensaun barak husi neʼe.”

13. Oinsá mak arranju Adorasaun Família nian ajuda ita-nia família?

¹³ Hanesan ho Loron Sábadu iha Israel antigu, Adorasaun Família nian mak hanesan prezente husi ita-nia Aman iha lalehan atu ajuda família sira ohin loron. (Tgo 1:17) Se família sira iha Israel uza didiʼak arranju Loron Sábadu nian, sira-nia relasaun ho Maromak Jeová sai besik liután. Nuneʼe mós ohin loron, se ita uza didiʼak arranju Adorasaun Família nian, ita-nia família sei hetan bensaun barak. (2 Kor 9:6; Gal 6:7, 8; Kol 3:23, 24) Ita-nia família bele sente hanesan ema neʼebé hakerek salmu ida sente, nia hatete: “Maibé ba haʼu, hakbesik ba Maromak mak diʼak mai haʼu. Haʼu halo Naʼi Jeová, Ukun-Naʼin Boot Liu, sai haʼu-nia fatin protesaun.”—Sal 73:28.

[Liafuan neʼebé foti husi pájina 5]

Halaʼo Adorasaun Família nian iha dalan neʼebé la halo família baruk, maibé iha dalan neʼebé halo família hotu kontente

[Kaixa iha pájina 6]

RAI DIDIʼAK

Ideia sira neʼebé bele uza ba Adorasaun Família nian

Kona-ba Bíblia:

• Lee kapítulu ida husi programa atu lee Bíblia ba semana ida. Maibé, se kapítulu neʼe iha ema balu neʼebé koʼalia ba malu, ema ida-idak iha família laran bele finje sai ema iha istória neʼe.

• Halo drama kona-ba istória neʼebé ita lee iha Bíblia.

• Husu ema ida-idak atu lee nanis kapítulu ida iha Bíblia no hakerek pergunta ida ka rua neʼebé mosu iha nia hanoin kona-ba kapítulu neʼe. Tuirmai, família buka resposta ba pergunta sira-neʼe hamutuk.

• Semana-semana halo kartaun no hakerek eskritura iha oin no iha kotuk hakerek liafuan husi eskritura neʼe. Halo hanesan neʼe toʼo barak, no bele haree fali semana-semana atu hatene eskritura hira mak família bele dekor.

• Rona lee Bíblia neʼebé grava tiha ona no lee tuir ho ita-nia Bíblia rasik.

Kona-ba reuniaun:

• Prepara hamutuk parte ida ba reuniaun

• Treinu knananuk neʼebé atu kanta iha reuniaun ba semana oin.

• Se ema ida iha família hetan knaar iha Eskola Serbisu Kristaun ka halo drama kiʼik iha Reuniaun Serbisu, koʼalia hamutuk oinsá atu halo, ka treinu iha família nia oin.

Kona-ba buat neʼebé família presiza:

• Estuda lisaun ida husi livru Pertanyaan Kaum Muda ka Belajarlah dari sang Guru Agung.

• Treinu oinsá atu hatán kona-ba problema ruma neʼebé bele mosu iha eskola.

• Inan-aman finje sai oan no oan sai fali inan-aman. Oan sei buka informasaun kona-ba tema ruma no hanorin inan-aman kona-ba ida-neʼe.

Kona-ba serbisu haklaken:

• Treinu kona-ba saida mak atu koʼalia iha serbisu haklaken iha findesemana.

• Koʼalia hamutuk kona-ba oinsá mak família bele aumenta sira-nia tempu ba serbisu haklaken durante tempu Memoriál ka feriadu.

• Fó tempu ba ema ida-idak iha família atu buka informasaun kona-ba oinsá atu hatán ba pergunta neʼebé karik ema sei husu, tuirmai treinu ida-neʼe.

Ideia seluk tan:

• Lee hamutuk informasaun ruma husi livru fulan-fulan nian.

• Husu ema ida-idak iha família atu lee nanis informasaun husi livru fulan-fulan nian neʼebé sira gosta liu, no tuirmai husu sira atu esplika kona-ba neʼe.

• Dala ruma bele konvida haklaken-naʼin ida ka kaben-naʼin ida atu tuir ita-nia Adorasaun Família nian no karik bele entrevista sira.

• Haree ita-nia vídeo ida no koʼalia hamutuk kona-ba neʼe.

• Koʼalia hamutuk kona-ba “Kaum Muda Bertanya” ka “Untuk Tinjauan Keluarga” husi Sedarlah!

• Koʼalia hamutuk kona-ba “Hanorin Ita-nia oan” ka “Ba joven sira” husi Livru Haklaken.

• Lee Buku Tahunan foun ka livru foun neʼebé foin simu husi reuniaun boot no depois koʼalia hamutuk kona-ba neʼe.

• Depois tuir reuniaun boot, koʼalia hamutuk kona-ba buat diʼak neʼebé ita rona.

• Estuda didiʼak kona-ba Maromak Jeová nia kriasaun ruma neʼebé besik ita-nia uma, no koʼalia hamutuk kona-ba buat saida deʼit mak kriasaun neʼe hanorin ita kona-ba Maromak Jeová.

• Serbisu hamutuk hodi halo buat ruma, hanesan halo mapa ka tabela.