“Husik imi-nia naroman sai nabilan”
1. Ita iha responsabilidade saida?
1 Husi rai-hun mutin toʼo rai-nakaras, ita bele haree naroman neʼebé furak tebes. Ida-neʼe fó glória ba Maromak Jeová. Maski nuneʼe, iha naroman seluk neʼebé Jesus konvida ninia dixípulu sira atu hetan, neʼe mak “naroman moris nian”, katak lia-loos husi Bíblia. (Joao 8:12) Hetan “naroman moris nian” mak prezente espesiál neʼebé lori responsabilidade boot. Jesus haruka ninia dixípulu sira: “Husik imi-nia naroman sai nabilan iha ema sira oin.” Hodi nuneʼe, ema seluk mós bele hetan buat diʼak. (Mt 5:16, MF) Ema barak hela iha nakukun laran tanba sira la hatene Maromak, no situasaun sai aat liu daudauk. Entaun, ita tenke fahe naroman moris nian! Maibé, oinsá mak ita bele husik ita-nia naroman sai nabilan hanesan Kristu?
2. Oinsá mak Jesus hatudu katak importante tebes atu fahe naroman lia-loos nian?
2 Liuhusi haklaken: Jesus uza ninia tempu, forsa, no buat hotu neʼebé nia iha atu halo naroman lia-loos nian sai nabilan. Nia halo ida-neʼe iha fatin hotu neʼebé nia bele hetan ema, hanesan iha ema nia uma, iha dalan, no iha foho-tutun sira. Nia komprende katak fahe lia-loos husi Bíblia ba ema seluk mak serbisu neʼebé importante tebes. (Joao 12:46) Atubele haklaken ba ema barak liután, Jesus treinu ninia dixípulu sira atu sai “mundu nia roman”. (Mt 5:14) Sira husik sira-nia naroman sai nabilan hodi hatudu hahalok diʼak ba ema seluk no hodi koʼalia kona-ba lia-loos husi Bíblia.
3. Oinsá mak ita bele hatudu katak ita hafolin duni naroman lia-loos nian?
3 Maromak nia povu hafolin tebes sira-nia responsabilidade atu “sai tiha naroman nia oan sira” hodi haklaken iha fatin hotu neʼebé ema iha. (Ef 5:8) Hodi lee Bíblia ka livru seluk husi ita-nia organizasaun iha fatin neʼebé ema bele haree kuandu ita iha serbisu-fatin ka iha eskola, ida-neʼe bele loke dalan atu koʼalia kona-ba Bíblia ho ema. Hodi halo nuneʼe, ita-nia irmán joven ida komesa estudu Bíblia ida, no fahe livru ho ninia kolega naʼin-12!
4. Tansá mak ‘husik ita-nia naroman sai nabilan’ inklui hahalok diʼak?
4 Liuhusi hahalok diʼak: Husik ita-nia naroman sai nabilan envolve mós ita-nia hahalok loroloron nian. (Ef 5:9) Iha serbisu-fatin, iha eskola, ka iha fatin naran deʼit, ema seluk bele haree ita-nia hahalok diʼak no ida-neʼe fó oportunidade mai ita atu fahe lia-loos husi Bíblia. (1 Ped 2:12) Porezemplu, tanba labarik-mane ho tinan lima hatudu hahalok diʼak, ida-neʼe book ninia mestra atu telefone ninia inan-aman. Mestra neʼe hatete: “Haʼu nunka haree labarik hanesan neʼe neʼebé hatene ho klaru saida mak loos no saida mak sala!” Sin, ita-nia serbisu haklaken no ita-nia hahalok diʼak bele dada ema ba “naroman moris nian” no ida-neʼe lori hahiʼi ba ita-nia Maromak.