Halaʼo serbisu haklaken ho pasiénsia
1. Oinsá mak Maromak Jeová hatudu pasiénsia ba ema?
1 Pasiénsia mak hahalok furak ida neʼebé Maromak hatudu ba ita ema. (Êx 34:6; Sal 106:41-45; 2 Ped 3:9) Dalan ida neʼebé Maromak hatudu pasiénsia boot mak hodi haruka ita atu haklaken lia-foun diʼak kona-ba ninia Ukun iha mundu tomak. Maski Maromak Jeová ajuda ema atu hakbesik ba nia ba tinan 2.000 ona, maibé nia nafatin dada ema neʼebé laran-moos. (Joao 6:44) Oinsá mak ita bele haleno Maromak Jeová nia pasiénsia iha ita-nia serbisu haklaken?
2. Oinsá mak ita bele hatudu pasiénsia iha serbisu haklaken?
2 Haklaken husi uma ba uma: Ita halo tuir Maromak Jeová nia pasiénsia kuandu ita “la para” atu haklaken maski ema barak ladún simu lia-loos. (Apos 5:42, MF) Ho pasiénsia, ita kontinua haklaken kuandu ita hasoru ema neʼebé la rona ita, goza ita, ka kontra hasoru ita. (Mc 13:12, 13) Ita mós hatudu pasiénsia hodi hakaʼas an nafatin atu rega fini lia-loos nian maski susar atu hetan ema neʼe iha sira-nia uma.
3. Tanbasá mak ita presiza hatudu pasiénsia kuandu ita halo vizita fali no halaʼo estudu Bíblia?
3 Estudu Bíblia: Ema neʼebé kuda ai presiza hatudu pasiénsia. Ita bele tau matan didiʼak ba ai, maibé ita la bele hakaʼas ai sira-neʼe atu sai boot lalais. (Tgo 5:7) Hanesan mós ho serbisu atu hanorin lia-loos ba ema, sira sei laʼo ba oin ho hakat ida ba hakat seluk. (Mc 4:28) Karik sira neʼebé estuda ho ita sente susar atu husik fiar ruma husi relijiaun falsu ka toman ruma neʼebé la tuir Bíblia nia matadalan. Ita labele hakaʼas ita-nia estudante sira atu laʼo ba oin lalais hodi halo mudansa kedas. Ita presiza hatudu pasiénsia hodi fó tempu ba ema neʼe no husik Maromak nia espíritu mak book sira-nia laran.—1 Kor 3:6, 7.
4. Iha dalan saida deʼit mak ita bele hatudu pasiénsia ba ita-nia família neʼebé seidauk tama lia-loos?
4 Ba família neʼebé seidauk tama lia-loos: Maski ita hakarak tebes atu ita-nia família mós aprende lia-loos, ita hatudu pasiénsia hodi hein toʼo tempu diʼak atu koʼalia kona-ba ita-nia fiar, no mós hodi kuidadu atu la fahe kedas informasaun barak demais ba sira. (Ecle 3:1, 7) Nuʼudar ita hein ho pasiénsia, ita hatudu hahalok diʼak ba sira no sempre prepara an atu koʼalia kona-ba ita-nia fiar ho laran-maus no respeitu. (1 Ped 3:1, 15) Sin, haklaken ho pasiénsia bele lori rezultadu diʼak no sei halo ita-nia Aman iha lalehan kontente.