Hatudu “domin” ba ema
1. Ohin loron, tanbasá mak ema presiza duni ajuda?
1 Kompara ho tempu uluk, ohin loron ema barak liu presiza ajuda. Situasaun iha mundu neʼe neʼebé sai aat ba beibeik, halo ema barak la kontente, sente laran-tun, no lakon esperansa. Ema rihun ba rihun iha mundu neʼe presiza duni ajuda, no ita nuʼudar ema kristaun iha oportunidade atu hatudu katak ita hanoin tebes ema sira-neʼe. (Mt 22:39; Gal 6:10) Oinsá mak ita bele hatudu katak ita hanoin ema seluk?
2. Saida mak dalan diʼak liu atu hatudu domin ba ema?
2 Hatudu domin: Maromak deʼit mak bele fó ksolok no bele halo ema sente kmaan husi sira-nia susar. (2 Kor 1:3, 4) Maromak Jeová haruka ita atu banati-tuir nia hodi hatudu mós “domin” ba ema seluk, no nia haruka ita atu bá vizita sira hodi fahe lia-foun diʼak kona-ba Maromak nia Ukun. (1 Ped 3:8) Hodi hola parte beibeik iha serbisu neʼe mak dalan diʼak ba ita atu fó kmaan ba sira neʼebé “laran-kanek”, tanba Maromak nia Ukun deʼit mak bele fó esperansa neʼebé loos ba ema neʼebé terus. (Isa 61:1) Lakleur tan, hodi hatudu domin ba ninia povu, Maromak Jeová sei halakon buat aat hotu no sei halo mundu neʼe sai foun, no justisa sei hela ba nafatin.—2 Ped 3:13.
3. Oinsá mak ita bele haree ema hanesan Jesus?
3 Haree ema hanesan Jesus: Kuandu Jesus haklaken ba ema-lubun boot, nia la haree deʼit ema sira-neʼe nuʼudar grupu, nia mós hanoin sira nuʼudar ema ida-idak. Nia haree katak sira ida-idak presiza ajuda atu haburas relasaun diʼak ho Maromak. Sira hanesan bibi neʼebé bibi-atan la iha atu tau matan sira. Kuandu Jesus haree ema sira-neʼe, nia hanoin tebetebes sira, no nia hanorin sira ho pasiénsia. (Mc 6:34) Se ita haree ema hanesan Jesus, neʼe sei book ita atu hatudu domin loos ba sira nuʼudar ema ida-idak. Ita sei hatudu domin neʼe hodi koʼalia ho laran-diʼak no oin-midar. Ita sei haree serbisu haklaken nuʼudar buat neʼebé importante, no ita sei hatudu ho ita-nia liafuan katak ita hanoin ema ida-idak nia presiza.—1 Kor 9:19-23.
4. Tanbasá mak ita tenke hatudu domin ba ema?
4 Ema-lubun boot neʼebé mai husi nasaun hotu simu daudaun ita-nia mensajen kona-ba Maromak nia Ukun, no sira sente kmaan tanba ita hatudu domin ba sira. Nuʼudar ita kontinua hatudu domin ba ema, ita sei hahiʼi no halo kontente ita-nia Maromak domin nian, Jeová.—Kol 3:12.