Ita prepara an ona ba dezastre sira ka lae?
1. Tanbasá mak matenek atu prepara ita-nia an ba dezastre sira?
1 Tinan-tinan ema rihun ba rihun, inklui mós ita-nia irmaun-irmán barak, hasoru dezastre oioin hanesan rai-nakdoko, tsunami, anin no udan boot, rai-nabeen, funu no violénsia. Dala ruma dezastre bele mosu derrepente deʼit no bele kona ita, tan neʼe matenek atu prepara ita-nia an.—Prov 21:5.
2. Tanbasá mak importante tebes atu fó-hatene ita-nia hela-fatin no númeru telefone neʼebé ita uza daudauk ba katuas sira?
2 Antes dezastre mosu: Dala ruma estadu fó avizu antes dezastre mosu. Se nuneʼe, importante tebes atu halo tuir avizu sira-neʼe. (Prov 22:3) Iha situasaun hanesan neʼe, katuas kristaun sira sei hakaʼas an atu hasoru ka kontaktu irmaun-irmán hotu iha sira-nia kongregasaun hodi ajuda sira atu prepara an. Depois dezastre, katuas sira mós sei hakaʼas an atu hasoru ka kontaktu ema hotu neʼebé tuir reuniaun beibeik atu haree se sira diʼak ka lae, no atu buka-hatene se sira presiza ajuda. Se ita la fó-hatene ita-nia númeru telefone ka hela-fatin neʼebé loos ba katuas sira, sira sei lakon tempu barak atu buka ita. Entaun, diʼak se haklaken-naʼin hotu fó-hatene sira-nia hela-fatin no númeru telefone neʼebé sira uza daudauk ba sekretáriu no ba katuas grupu haklaken nian.
3. Se ita hela iha fatin neʼebé dala ruma kona dezastre, oinsá mak ita bele apoia katuas sira?
3 Se ita-nia kongregasaun iha fatin neʼebé dala ruma kona dezastre, karik katuas sira sei husu haklaken-naʼin hotu atu fó-hatene naran, hela-fatin no númeru telefone husi sira-nia família ka kolega neʼebé hela dook husi fatin neʼe. Hodi nuneʼe kuandu emerjénsia mosu, katuas sira bele kontaktu família ka kolega sira-neʼe. No mós, neʼe sei ajuda katuas sira atu hatene oinsá atu kontaktu irmaun-irmán sira neʼebé karik halai ba sira-nia família ka kolega. Karik katuas sira mós bele halo planu dezastre nian ba kongregasaun. Planu neʼe bele inklui halo lista kona-ba buat neʼebé tenke lori se ita presiza halai, no halo planu oinsá atu fó ajuda ba sira neʼebé presiza ajuda. Importante tebes ba ita hotu atu apoia arranju sira-neʼe.—Ebr 13:17.
4. Ita tenke halo saida se ita-nia fatin kona dezastre?
4 Depois dezastre: Ita tenke halo saida se ita-nia fatin kona dezastre? Ita tenke haree katak ita-nia família iha buat neʼebé sira presiza. Se ita bele, fó ajuda mós ba ema seluk. Hakaʼas an atu kontaktu kedas ita-nia katuas grupu haklaken nian ka katuas seluk. Importante atu halo nuneʼe maski la iha buat ruma neʼebé akontese ba ita ka maski ita la presiza ajuda. Se ita presiza ajuda ruma, ita bele fiar katak ita-nia irmaun sira halo buat hotu neʼebé sira bele atu ajuda ita. (1 Kor 13:4, 7) La haluha katak Maromak Jeová hatene ita-nia situasaun, entaun sadere ba nia no fiar katak nia sei tau matan ita. (Sal 37:39; 62:8) Buka oportunidade atu ajuda ema seluk atu hakbesik ba Maromak, no atu fó kmaan ba sira. (2 Kor 1:3, 4) Kuandu bele, diʼak se ita hakaʼas an atu halaʼo fali kedas ita-nia atividade kristaun nian.—Mt 6:33.
5. Nuʼudar ema kristaun, oinsá mak ita-nia haree kona-ba dezastre sira-neʼebé bele mosu?
5 Maski ema iha mundu neʼe laran-taridu tanba dezastre neʼebé bele kona sira, maibé ita bele haree futuru ho kontente tanba ita fiar ba Maromak. Lakleur tan, dezastre sira sei la iha ona. (Apok 21:4) Nuʼudar ita hein ba tempu neʼe, ita bele halo buat barak atu prepara ita-nia an ba tempu susar sira, no iha tempu hanesan, ita hatudu laran-manas nafatin atu haklaken lia-foun diʼak ba ema seluk.