Ita bele “gaba an” kona-ba saida?
1. Iha fulan ida-idak nia rohan, ita bele gaba an kona-ba saida?
1 Iha fulan ida-idak nia rohan haklaken-naʼin hotu presiza hatama oras neʼebé sira uza atu haklaken. Entaun, Ita bele “gaba an” kona-ba saida? (Gal 6:4) Karik ita hatama oras 130 tanba ita serbí nuʼudar pioneiru tempu-tomak ka karik ita hetan lisensa atu hatama deʼit minutu 15. Maski nuneʼe, ita hotu haksolok tanba ita hatudu katak ita serbí Jeová ho laran tomak.—Sal 100:2.
2. Tanbasá mak ita presiza hakaʼas an atu halo Jeová nia serbisu?
2 Nuʼudar Ukun-Naʼin Boot Liu Hotu iha lalehan no rai, Maromak Jeová merese duni atu simu buat neʼebé diʼak liu husi ita. (Mal 1:6) Ita hatudu domin ba nia hodi dedika ita-nia moris ba nia atu halo ninia hakarak. Tan neʼe, se ita fiar katak iha fulan ida-idak nia rohan ita fó ona “fuan primeiru” husi ita-nia tempu, matenek, no forsa atu halo Jeová nia serbisu, ida-neʼe bele halo ita gaba an. (Prov 3:9) Maibé, se ita-nia laran tesi lia ba ita katak ita la fó fuan primeiru, entaun ita tenke hanoin kona-ba oinsá atu hadiʼa ida-neʼe.—Rom 2:15.
3. Tanbasá mak la diʼak atu kompara ita-nia an ho ema seluk?
3 ‘Labele tanesan ho ema seluk’: Keta kompara ita-nia an ho ema seluk ka ho buat neʼebé uluk ita halo kuandu ita sei iha forsa. Ida-neʼe laʼós buat neʼebé diʼak. Tuir loloos, ita-nia situasaun bele troka. Ita iha kbiit neʼebé la hanesan. Se ita halo nuneʼe, karik ida-neʼe sei halo ita buka atu manán deʼit ka sente katak ita la iha folin. (Gal 5:26; 6:4) Jesus nunka kompara ema. Maibé, nia gaba ema ida-idak tuir buat neʼebé sira bele halo.—Mc 14:6-9.
4. Saida deʼit mak ita bele aprende husi Jesus nia ai-knanoik kona-ba osan talenta?
4 Iha Jesus nia ai-knanoik kona-ba osan talenta, nia dehan katak serbisu-naʼin ida-idak simu osan talenta ‘tuir sira-nia kbiit’. (Mt 25:15) Kuandu sira-nia naʼi mai no husu atu atan ida-idak fó sai saida mak sira halo, atan sira neʼebé serbisu badinas hodi tuir sira-nia kbiit no situasaun, simu gaba husi sira-nia naʼi no tama ba naʼi nia ksolok. (Mt 25:21, 23) Nuneʼe mós, se ita serbisu badinas atu haklaken Maromak nia Ukun, ita bele fiar katak Maromak sei simu ita no neʼe halo ita gaba an!