Ajuda ema atu rona ba Maromak
1. Livru saida deʼit mak fó sai iha reuniaun boot ba loron tolu ho tema “Halo Ita-nia Reinu Toʼo Mai Ami”? Tanbasá mak livru sira-neʼe diʼak tebes atu uza kuandu haklaken?
1 Iha reuniaun boot ba loron tolu ho tema “Halo Ita-nia Reinu Toʼo Mai Ami”, fó sai livru rua ho títulu “Rona ba Maromak hodi Hetan Moris ba Nafatin” no mós “Rona ba Maromak”. Tanba livru sira-neʼe ladún iha liafuan barak entaun fasil atu tradús lalais deʼit. Tuir loloos iha tempu neʼebá, livru “Rona ba Maromak hodi Hetan Moris ba Nafatin” hetan ona lisensa atu tradús ba língua hamutuk 431.
2. Livru sira-neʼe lori buat diʼak ba sé?
2 Livru sira-neʼe diʼak ba sé? Hanoin toʼok situasaun tuirmai neʼe neʼebé dala barak mosu iha rai oioin:
• Haklaken-naʼin koʼalia ho uma-naʼin ida neʼebé nia foin hasoru ka kuandu halo vizita fali. Haklaken-naʼin neʼe haree katak uma-naʼin neʼe la hatene lee ka ladún lee ho momoos.
• Haklaken-naʼin fó sasin ba ema neʼebé koʼalia língua neʼebé seidauk iha ita-nia livru sira ka iha livru balun deʼit. Ka ema barak iha haklaken-fatin neʼe la bele lee língua neʼebé sira koʼalia loroloron.
• Haklaken-naʼin fó sasin ba ema tilun-diuk iha haklaken-fatin.
• Inan-aman hakarak atu hanorin lia-loos ba sira-nia oan kiʼik neʼebé seidauk hatene lee.
3. Ita gosta saida kona-ba livru Rona ba Maromak?
3 Livru sira-neʼe hakerek iha dalan oinsá: Livru Rona ba Maromak iha liafuan uitoan deʼit. Dala barak iha liafuan balu deʼit no iha mós eskritura ida iha pájina nia okos neʼebé hatudu sai pontu importante. Tanbasá? Hanoin toʼok katak ema fó ba ita livru ida iha língua neʼebé ita la bele lee, karik livru neʼe hakerek ho letra neʼebé ita la hatene. Maski ida-neʼe iha dezeñu furak oioin, ita sei gosta ka lae? Karik lae. Nuneʼe mós, kuandu livru ida iha liafuan barak liu, karik ema neʼebé ladún bele lee sei sente taʼuk atu simu ida-neʼe. Tan neʼe, buat diʼak husi livru Rona ba Maromak mak, iha pájina ida-idak iha dezeñu sira neʼebé halo ho didiʼak, no iha sinál neʼebé ajuda ema atu komprende oinsá dezeñu ida liga ho dezeñu tuirmai.
4. Ita gosta saida kona-ba livru Rona ba Maromak hodi Hetan Moris ba Nafatin?
4 Livru Rona ba Maromak hodi Hetan Moris ba Nafatin iha dezeñu neʼebé hanesan ho livru Rona ba Maromak. Livru neʼe halo atu bele uza hodi estuda ho ema neʼebé ladún bele lee ka ema neʼebé aprende atu lee. Ita mós bele uza livru Rona ba Maromak hodi Hetan Moris ba Nafatin, maski ema neʼebé ita hanorin uza livru Rona ba Maromak. Iha pájina liman-karuk nia leten, iha pergunta neʼebé bele hetan resposta iha pájina sira-neʼe. Iha mós dezeñu sira ho liafuan no eskritura sira. Iha pájina barak nia okos mós iha kaixa ho kór-mutin neʼebé iha pontu seluk no iha eskritura neʼebé ita bele uza atu koʼalia hamutuk, ida-neʼe depende ba estudante nia matenek.
5. Bainhira no oinsá mak ita fahe livru sira-neʼe?
5 Oinsá uza livru sira-neʼe: Kuandu ita haklaken uma ba uma, ita bele hili atu fahe livru rua neʼe maski livru sira-neʼe mak laʼós livru neʼebé fahe iha fulan neʼe. (Haree kaixa “Oinsá ita bele fahe livru sira-neʼe”.) Karik ita mós bele fahe ba ema kuandu ita halo vizita fali hodi dehan ba uma-naʼin katak ita hakarak hatudu livru ida ba nia no tuirmai fó ba nia.
6. Oinsá mak ita bele uza livru sira-neʼe atu estuda Bíblia?
6 Tanba livru Rona ba Maromak la iha pergunta sira, entaun ita la presiza halo pergunta no resposta hanesan ita uza livru Bíblia Hanorin. Iha rai hotu ema gosta atu rona istória. Entaun uza dezeñu sira atu konta istória sira neʼebé hakerek iha Bíblia. Esplika dezeñu ida-idak mak kona-ba saida. Koʼalia ho laran-manas. Husu estudante atu fó sai ninia hanoin. Lee eskritura sira iha pájina nia okos, no husu sira kona-ba sira-nia hanoin. Husu pergunta atu estudante bele hola parte no ajuda nia atu komprende. Se nia uza livru Rona ba Maromak hodi Hetan Moris ba Nafatin, lee hamutuk liafuan sira no mós eskritura sira kuandu koʼalia kona-ba dezeñu ida-idak.
7. Oinsá mak ita bele ajuda estudante atu laʼo ba oin?
7 Ajuda estudante atu laʼo ba oin: Kuandu ita koʼalia ba malu, ida-neʼe karik haburas estudante nia hakarak atu aprende lee atu nuneʼe nia rasik bele estuda mesak kona-ba Jeová. (Mt 5:3; Joao 17:3) Tan neʼe, se ita koʼalia ba malu hodi uza livru Rona ba Maromak, karik ita bele husu estudante se ita bele hanorin nia atu lee, no tuirmai ita bele uza fali livru Rona ba Maromak hodi Hetan Moris ba Nafatin. Maski ita estuda livru rua neʼe, ida-neʼe la dehan katak estudante prontu ona atu hetan batizmu kuandu ita ramata estuda. Tuir loloos, ita presiza estuda tan hodi uza livru Bíblia Hanorin ka livru sira seluk neʼebé ajuda estudante atu komprende didiʼak kona-ba Bíblia.
8. Tanbasá mak ita hafolin tebes livru foun sira-neʼe hodi uza atu haklaken?
8 Se ema hakarak atu moris ba nafatin, sira tenke rona ba Ukun-Naʼin Boot Liu Hotu iha lalehan no rai. (Isa 55:3) Jeová hakarak “ema hotu”, inklui mós sira neʼebé la hatene lee, atu aprende oinsá atu rona ba nia. (1 Tim 2:3, 4) Ita hafolin tebes livru foun sira-neʼe neʼebé ita bele uza hodi ajuda ema hatene kona-ba oinsá atu rona ba Maromak!
[Kaixa iha pájina 3]
Oinsá ita bele fahe livru sira-neʼe
Hatudu ba uma-naʼin dezeñu iha pájina 2-3, no dehan: “Ita hakarak atu hela iha mundu hanesan neʼe ka lae? [Hein ba resposta.] Bíblia promete [ka, livru santu neʼe promete] katak lakleur tan Maromak sei halo mundu sai furak, iha dame no la iha ona kiak ka moras. Haree toʼok saida mak ita tenke halo atu hela iha neʼebá. [Lee Isaías 55:3, neʼebé hakerek iha pájina 3 nia leten.] Iha neʼe konvida ita atu ‘mai hakbesik’ ba Maromak no ‘rona’ ba nia. Maibé, oinsá mak ita rona ba Maromak?” Loke ba pájina 4-5, no koʼalia hamutuk ho nia kona-ba resposta neʼe. Se nia la iha tempu, rai hela deʼit livru neʼe ba nia no halo planu atu vizita fali hodi koʼalia kona-ba resposta.