Proteje bá Ita-nia konxiénsia
1. Saida mak tema ba reuniaun boot ba loron ida iha tinan serbisu nian 2013? Programa neʼe nia objetivu mak saida?
1 Loron-loron ita hasoru situasaun neʼebé halo ita foti desizaun neʼebé la tuir ita-nia konxiénsia, ka laran. Tan neʼe programa ba ita-nia reuniaun boot ba loron ida iha tinan serbisu nian 2013, neʼebé sei hahú iha fulan-Setembru 2012, iha tema “Proteje bá Ita-nia Konxiénsia”. (1 Tim 1:19) Grupu Administradór prepara programa neʼe hodi ajuda ita ida-idak atu uza ho didiʼak prezente furak neʼe husi Ita-nia Kriadór.
2. Pergunta saida deʼit mak sei hetan resposta durante programa?
2 Buka resposta ba pergunta sira-neʼe: Iha programa neʼe sei hatán pergunta hitu kona-ba konxiénsia, ka laran:
• Saida deʼit mak bele hanetik ita-nia konxiénsia atu la laʼo ho didiʼak?
• Oinsá mak ita bele treinu ita-nia konxiénsia?
• Oinsá mak ita bele fase liman kona-ba ema nia raan?
• Dalan neʼebé ita hanoin no halo tuir Bíblia nia matadalan hatudu saida kona-ba ita?
• Saida mak ita bele halo atu la halo ema seluk sidi?
• Oinsá mak joven sira bele tahan hasoru tentasaun neʼebé koko sira-nia fiar?
• Sira neʼebé halo tuir sira-nia konxiénsia neʼebé hetan treinu husi espíritu santu, hetan bensaun saida deʼit?
3. Oinsá mak ita bele hetan buat diʼak husi programa neʼe?
3 Maski Satanás hakaʼas an atu hafoʼer ita-nia konxiénsia, ka laran, maibé ho Maromak Jeová nia ajuda, ita bele tahan hasoru ida-neʼe. Liuhusi Maromak nia Liafuan no organizasaun, ita-nia Aman iha lalehan hatete ba ita: “Ida-neʼe mak dalan. Ó laʼo tuir nia bá.” (Isa 30:21) Programa neʼe mak dalan ida neʼebé Jeová uza atu fó matadalan mai ita. Tan neʼe, halo planu agora hodi bele tuir programa hotu. Hanoin didiʼak oinsá mak ita bele halo tuir informasaun sira iha ita-nia moris rasik. Koʼalia hamutuk ho ita-nia família kona-ba informasaun neʼebé ita rona iha reuniaun boot neʼe. Kuandu ita halo tuir matadalan sira neʼebé ita sei simu, neʼe sei ajuda ita atu hametin ita-nia hakarak atu ‘halo ita-nia laran moos nafatin’. (1 Ped 3:16) Programa neʼe mós ajuda ita atu la husik Satanás nia mundu aat neʼe tenta ita atu halo buat ruma neʼebé bele estraga ita-nia relasaun diʼak ho Maromak Jeová.