Banati-tuir profeta sira—Joel
1. Oinsá mak ita bele banati-tuir profeta Joel nia hahalok haraik-an kuandu ita haklaken?
1 Sé mak profeta Joel? Buat neʼebé nia hatete kona-ba ninia an rasik mak nia “Petuel nia oan-mane”. (Joel 1:1) Profeta neʼe ho haraik-an fó sai deʼit Maromak Jeová nia mensajen, duké dehan katak nia mak ema neʼebé lori mensajen neʼe. Hanesan neʼe mós ho ita. Kuandu ita haklaken, duké dada atensaun ba ita-nia an ita hakarak dada ema nia atensaun ba Jeová no ba Bíblia. (1 Kor 9:16; 2 Kor 3:5) Liután neʼe, mensajen neʼe bele hametin ita-nia fiar. Entaun, ohin loron, profeta Joel nia liafuan ida-neʼebé mak fó laran-manas no esperansa mai ita?
2. Tanba Maromak Jeová nia loron besik ona, ida-neʼe tenke book ita atu halo saida?
2 “Jeová nia loron besik ona.” (Joel 1:15): Maski liafuan neʼe hakerek tinan rihun ba rihun liubá, maibé ita moris iha tempu neʼebé liafuan sira-neʼe sai loos duni. Mundu neʼe agora sai aat ba beibeik no ema la simu ita ka goza ita bainhira ita bá haklaken. Hahalok sira-neʼe hatudu ho klaru katak ita hela iha loron ikus sira iha mundu aat neʼe. (2 Tim 3:1-5; 2 Ped 3:3, 4) Tanba ita hatene katak mundu neʼe besik ona atu ramata, ida-neʼe fó razaun mai ita atu tau uluk serbisu haklaken iha ita-nia moris.—2 Ped 3:11, 12.
3. Tanbasá mak importante mai ita atu halo serbisu haklaken antes terus boot toʼo mai?
3 “Jeová sei sai fatin protesaun ba Ninia povu.” (Joel 3:16): Kuandu versíkulu neʼe dehan katak Maromak Jeová sei halo nakdoko lalehan no rai, ida-neʼe kona-ba tempu tesi-lia nian durante terus boot. Ita la sente taʼuk tanba ita hatene katak Jeová sei salva ninia atan sira iha tempu susar neʼe. (Apok 7:9, 14) Kuandu ita halo serbisu haklaken no haree oinsá Jeová apoia no hametin ita, ida-neʼe sei ajuda ita atu halo ita-nia fiar metin liután no tahan toʼo rohan. Hahalok sira-neʼe sei ajuda ita durante terus boot neʼebé besik ona mai.
4. Tansá mak ita kontente no hein ba futuru ho laran-metin?
4 Maski ema balu hanoin katak profeta Joel nia mensajen halo ema taʼuk, maibé ida-neʼe fó esperansa ba Maromak nia povu katak Nia sei salva sira. (Joel 2:32) Tan neʼe, mai ita hein ba futuru ho laran-metin, no laran-manas nafatin atu haklaken liafuan diʼak kona-ba Maromak nia Ukun, no halo tuir liafuan iha Joel 2:23 neʼebé dehan: “Sai kontente no haksolok bá iha Jeová ó-nia Maromak.”