Haburas toman hodi tuir tempu no oras
1. Maromak Jeová hatudu ezemplu diʼak saida deʼit kona-ba tuir tempu ho loloos?
1 Maromak Jeová sempre tuir tempu no oras. Porezemplu, nia fó ajuda ba ninia atan sira “iha tempu neʼebé loos”. (Ebreu 4:16) Nia mós fó ai-han espirituál “iha tempu loloos”. (Mateus 24:45) Entaun ita bele fiar duni katak Maromak nia loron hirus “sei la tarde”. (Habacuque [Habakuk] 2:3) Sin, ita hotu hetan buat diʼak tanba Maromak Jeová sempre tuir tempu ho loloos! (Salmo [Mazmur] 70:5) Maibé, nuʼudar ema sala-naʼin neʼebé iha buat barak atu halo, susar mai ita atu sempre tuir oras. Se nuneʼe, tanbasá mak ita presiza haburas toman hodi tuir oras?
2. Tanbasá mak hodi tuir oras fó hahiʼi ba Maromak Jeová?
2 Ohin loron ema uitoan deʼit mak hakaʼas an hodi tuir tempu no oras, liuliu iha loron ikus sira neʼebé ema barak hadomi deʼit sira-nia an no la kontrola an. (2 Timóteo 3:1-3) Tan neʼe, bainhira ema kristaun hakaʼas an hodi tuir oras kuandu tama serbisu, ka hasoru ema ida, ka tuir enkontru sira, ema seluk sei haree ida-neʼe, no ida-neʼe fó hahiʼi ba Maromak Jeová. (1 Pedro 2:12) Baibain kuandu ita bá serbisu, ita hakaʼas an hodi tama tuir oras. Maibé kona-ba halaʼo ita-nia atividade kristaun nian, dala barak ita la tuir oras, loos ka lae? Bainhira ita toʼo sedu iha reuniaun sira no hola parte hodi kanta knananuk primeiru no orasaun, ita hatudu katak ita hakarak banati-tuir ita-nia Aman iha lalehan neʼebé halaʼo buat hotu ho loloos no momoos.—1 Korinto 14:33, 40.
3. Tanbasá mak hodi tuir oras hatudu katak ita hanoin ema seluk?
3 Hodi tuir oras ita hatudu katak ita hanoin uluk ema seluk. (Filipe 2:3 4) Porezemplu, kuandu ita toʼo sedu iha reuniaun sira, inklui mós reuniaun ba grupu haklaken, ita sei la atrapalla ita-nia maluk sira seluk. Maibé se ita sempre toʼo tarde iha reuniaun sira, ida-neʼe bele halo ema seluk hanoin katak ita hafolin liu ita rasik nia tempu duké ema seluk nian. Hodi iha toman atu tuir oras, ema seluk sei haree ita nuʼudar ema neʼebé badinas no bele tau fiar, no sira sei hafolin ita-nia hakaʼas-an.
4. Se ita sente susar atu tuir oras, ita bele halo saida atu hadiʼa ida-neʼe?
4 Se ita sente susar atu tuir oras, diʼak atu hanoin kleʼan kona-ba razaun tansá ita tarde. Hakerek programa ida tuir ita-nia situasaun, no fahe tempu ho didiʼak hodi bele kumpre knaar oioin hodi tuir oras. (Eclesiastes [Pengkhotbah] 3:1 Filipe 1:10) Husu Maromak Jeová atu ajuda ita. (1 João 5:14) Atu iha toman hodi tuir oras, neʼe mak dalan ida neʼebé hatudu katak ita hafolin ukun-fuan rua neʼebé importante duni, neʼe mak hadomi Maromak no hadomi ita-nia maluk sira.—Mateus 22:37-39.