Pergunta husi haklaken-naʼin
◼ Saida mak labarik sira presiza aprende hodi bele laʼo ba oin iha dalan espirituál?
Inan-aman kristaun presiza halo buat barak atu bele haboot sira-nia oan “hodi fó dixiplina no matadalan neʼebé tuir Jeová nia hakarak”. (Éfeso 6:4) Porezemplu, inan-aman barak hetan rezultadu diʼak hodi koʼalia kona-ba eskritura loron-loron nian hamutuk ho sira-nia oan dadeer-dadeer. Durante adorasaun família nian no iha tempu seluk, família bele haree ita-nia DVD sira no koʼalia hamutuk kona-ba neʼe, ka koʼalia hamutuk kona-ba tópiku ruma husi livru Pertanyaan Kaum Muda, ka halo drama kiʼik kona-ba istória ruma husi Bíblia, ka halo treinu ruma. Maibé, hodi oan sira bele “sai ema boot”, sira mós presiza simu hanorin neʼebé kleʼan kona-ba lia-loos husi Bíblia.—Ebreu 6:1.
Hanoin toʼok kona-ba buat neʼebé ita hanorin ba ema neʼebé ita hasoru iha haklaken-fatin. Kuandu ita foin hasoru sira ka vizita sira iha tempu seluk, baibain ita koko atu komesa estuda ho sira hodi uza livru Tuir Loloos, Saida mak Bíblia Hanorin? Depois estuda hotu tiha livru neʼe, ita tama ba livru “Hela Nafatin iha Maromak nia Domin”. Tanbasá ita halo ida-neʼe? Tanba livru Bíblia Hanorin ajuda estudante atu hetan hanorin importante sira husi Eskritura. No livru “Maromak nia Domin” ajuda sira oinsá atu halo tuir Bíblia nia matadalan iha moris loron-loron nian. Hodi estuda livru rua neʼe sei ajuda ema foun atu iha “abut” iha Kristu no ‘hamriik metin iha fiar’. (Koloso 2:6, 7) Se nuneʼe, ita-nia oan sira mós bele hetan buat diʼak husi livru rua neʼe ka lae? Labarik sira mós presiza simu hanorin kona-ba saida mak Jesus nia sakrifísiu, Maromak nia Ukun, no ema mate nia kondisaun. Sira presiza hatene tanbasá Maromak husik terus no hatene kona-ba sinál loron ikus nian. Sira presiza fiar duni katak Testemuña ba Jeová deʼit mak iha lia-loos. Joven sira mós presiza komprende Bíblia nia matadalan sira no hatene oinsá atu fó treinu “sira-nia kbiit atu hanoin”. (Ebreu 5:14) Maibé, inan-aman presiza hanoin kona-ba labarik ida-idak nia tinan no mós sira-nia kbiit atu komprende. Maski nuneʼe, labarik barak iha kbiit atu aprende lia-loos neʼebé kleʼan husi Bíblia maski sira sei kiʼik hela.—Lucas 2:42, 46, 47.
Atu ajuda inan-aman sira, ita-nia sítiu jw.org sei iha mós matadalan kona-ba halaʼo estuda husi livru Bíblia Hanorin. Família sira bele hetan informasaun neʼe iha ita-nia sítiu iha AJARAN ALKITAB > KAUM MUDA. Aban-bainrua ami sei tau informasaun kona-ba halaʼo estuda neʼebé foti husi livru “Maromak nia Domin”. Maibé ita mós bele uza livru sira neʼebé print tiha ona. Inan-aman bele hili atu estuda informasaun neʼe durante Adorasaun Família nian, ka kuandu sira estuda ketak ho oan ida, ka bainhira fó treinu ba oan kona-ba oinsá atu estuda mesak.