Banati-tuir profeta sira—Sofonias
1. Sofonias serbí nuʼudar profeta iha tempu oinsá? Oinsá mak nia hatudu ezemplu diʼak mai ita?
1 Maizumenus tinan 650 molok Kristu, iha nasaun Judá ema barak adora hela maromak falsu Baal. Ema foin oho liurai aat naran Amon. Ninia oan Josias neʼebé sei labarik mak ukun fali nuʼudar liurai. (2 Crônicas [Tawarikh] 33:21–34:1) Iha tempu hanesan neʼe mak Maromak Jeová foti Sofonias atu hatoʼo Ninia liafuan. Karik Sofonias mak liurai nia família ida. Maski nuneʼe, nia hatoʼo ho loloos Jeová nia tesi-lia todan ba nasaun Judá nia ukun-naʼin sira. (Sofonias [Zefanya] 1:1; 3:1-4) Ita mós hakarak banati-tuir Sofonias hodi hatudu aten-brani no la husik ita-nia família hanetik ita atu adora Jeová. (Mateus 10:34-37) Mensajen saida mak Sofonias fó sai? Ida-neʼe lori rezultadu saida?
2. Hodi Jeová bele salva ita iha ninia loron hirus, ita tenke halo saida deʼit?
2 Buka Jeová: Iha Maromak Jeová nia loron hirus, só Nia deʼit mak bele salva ema. Tan neʼe, Sofonias anima nasaun Judá atu buka Jeová, buka buat neʼebé loos, no buka laran-maus antes Maromak nia loron toʼo mai. (Sofonias [Zefanya] 2:2, 3) Hanesan Sofonias, ohin loron ita mós anima ema seluk atu buka Jeová. Maibé ita rasik mós tenke hakaʼas an atu nunka “fila kotuk ba Jeová hodi la halo tuir tan”. (Sofonias [Zefanya] 1:6) Atu buka Jeová, ita presiza estuda didiʼak ninia Liafuan no halo orasaun hodi husu ninia matadalan. Atu buka buat neʼebé loos, ita presiza moris tuir morál neʼebé moos. Atu buka laran-maus, ita labele ulun-toos no presiza haburas toman atu halo tuir matadalan husi Jeová nia organizasaun.
3. Tanbasá mak ita presiza kontinua hakaʼas an atu haklaken?
3 Rezultadu Diʼak: Bainhira Sofonias hatoʼo liafuan tesi-lian nian ba nasaun Judá, neʼe kona loos ema balu nia laran, liuliu liurai Josias, neʼebé komesa buka Jeová bainhira nia sei labarik. Ikusmai, Josias harahun hotu maromak falsu sira iha ninia rai. (2 Crônicas [Tawarikh] 34:2-5) Ohin loron, maski fini lia-loos nian balu monu iha dalan ninin, ka fatuk leten, ka ai-tarak laran, maibé balu monu iha rai neʼebé diʼak no ikusmai fó fuan. (Mateus 13:18-23) Ita fiar metin katak Jeová sei kontinua fó bensaun ba ita-nia hakaʼas-an atu nafatin kari fini lia-loos nian kona-ba Ninia Ukun.—Salmo (Mazmur) 126:6.
4. Tanbasá mak ita presiza “hein nafatin ba Jeová”?
4 Ema barak iha nasaun Judá hanoin katak Jeová sei la halo buat ida. Maibé Maromak Jeová fó garantia katak loron neʼe sei toʼo daudauk mai. (Sofonias [Zefanya] 1:12, 14) Ema neʼebé buka protesaun ba Jeová deʼit mak bele hetan salvasaun. (Sofonias [Zefanya] 3:12, 17) Neʼe duni, nuʼudar ita “hein nafatin ba Jeová”, mai ita haksolok serbí ita-nia Maromak ho laran ida deʼit!—Sofonias (Zefanya) 3:8, 9.