Ita-nia pasta hanorin nian
1. Tanbasá mak haklaken-naʼin hanesan ho badain?
1 Badain sira iha ekipamentu oioin. Ekipamentu balu, uza deʼit ba serbisu ida, kuandu presiza mak foin uza. Balu uza ba loroloron, serbisu kiʼik ka boot sempre uza ekipamentu sira-neʼe. Badain neʼebé halo sira-nia serbisu ba tinan barak ona sempre lori ekipamentu atu uza ba loroloron nian iha pasta, no sira matenek tebes atu uza ekipamentu sira-neʼe. Bíblia fó anima ba ema kristaun atu hakaʼas an haklaken no sai “nuʼudar serbisu-naʼin neʼebé la moe kona-ba buat ida”. (2 Timóteo 2:15) Saida mak ekipamentu importante liu neʼebé ita lori iha ita-nia pasta? Neʼe mak Bíblia, ekipamentu neʼebé ita uza atu ajuda ema sai Jesus nia dixípulu. (Mateus 28:19, 20) Tan neʼe mak ita presiza “uza ho didiʼak liafuan lia-loos nian” ho matenek. Iha ita-nia pasta, ita mós iha ekipamentu barak neʼebé ita presiza uza loroloron. Ita hotu tenke aprende oinsá atu uza ho matenek ekipamentu sira-neʼe hodi hanorin lia-loos ba ema.—Provérbios (Amsal) 22:29.
2. Ita iha ekipamentu saida deʼit hodi hanorin ema?
2 Ekipamentu hanorin nian: Ita sempre uza Bíblia atu hanorin, maibé ita mós uza ekipamentu saida tan? Ekipamentu importante ida tan hodi uza ba hanorin lia-loos husi Bíblia mak livru Tuir Loloos, Saida mak Bíblia Hanorin? Bainhira ita uza livru neʼe estuda tiha ho ema, ita uza tan livru “Hela Nafatin iha Maromak nia Domin” atu hanorin sira oinsá mak sira bele uza Bíblia nia prinsípiu iha moris loroloron nian. Tan neʼe mak ita tenke hatene uza didiʼak livru rua neʼe. Iha ita-nia pasta hanorin nian ita mós presiza lori broxura sira. Broxura ida neʼebé ita tenke lori atu hahú estuda Bíblia ho ema mak Liafuan Diʼak Husi Maromak. Se ita hasoru ema iha fatin haklaken neʼebé ladún komprende atu lee, ka koʼalia língua seluk no ita laiha livru iha sira-nia lian, karik ita bele uza Rona ba Maromak ka Rona ba Maromak hodi Hetan Moris ba Nafatin. Kuandu atu fó koñese estudante Bíblia kona-ba Maromak nia organizasaun, ita bele uza broxura Sé mak Halo Jeová nia Hakarak Ohin Loron? Atu ajuda ema sai Jesus nia dixípulu, ita tenke aprende atu hatene uza vídeo sira hanesan Tanbasá Estuda Bíblia?, Oinsá mak ami halaʼo reuniaun sira?, no Maromak iha naran ka lae?
3. Iha futuru, Ita-nia Serbisu Kristaun sei ajuda ita atu halo saida?
3 Iha futuru, Ita-nia Serbisu Kristaun sei ajuda ita oinsá ita bele hatene uza ita-nia ekipamentu seluk tan ho didiʼak. Ita hakarak hakaʼas an hodi uza ekipamentu sira-neʼe ho matenek, no halo tuir konsellu neʼebé hatete: “Haree didiʼak ó-nia an no ó-nia hanorin. Kaer metin ba buat sira-neʼe, tanba hodi halo ida-neʼe mak ó sei salva ó-nia an rasik no mós sira neʼebé rona ba ó.”—1 Timóteo 4:16.