Aumenta ita-nia matenek iha serbisu haklaken—Haklaken iha ema nia serbisu-fatin

Tanbasá importante: Ohin loron, susar atu buka-hetan ema iha sira-nia uma tanba barak mak serbisu oras naruk, tan neʼe mak diʼak atu haklaken ba sira iha sira-nia serbisu-fatin. Haklaken iha dalan hanesan neʼe sei lori solok no rezultadu neʼebé diʼak, tanba serbisu-fatin sempre iha ema no serbisu-naʼin baibain haree ema neʼebé tama hanesan kliente, entaun sira hatudu respeitu. Atu bele hetan rezultadu diʼak, haklaken-naʼin presiza iha matenek atu tetu didiʼak situasaun no iha hatais no hafutar an neʼebé diʼak. (2 Korinto 6:3) Tan neʼe mak katuas haklaken nian tenkesér tau matan didiʼak arranju neʼe atu hatene sesé mak haklaken iha ema-nia serbisu-fatin no halo dala hira.

Oinsá atu halo ida-neʼe:

Prepara liafuan badak deʼit atu koʼalia ho ema. Se ita uza serbisu-naʼin sira-nia tempu barak liu atu koʼalia ho sira, karik loron seluk sira sei la fó tan oportunidade ba ita atu koʼalia.
Buka tempu neʼebé kliente seidauk barak, hanesan sira foin tama serbisu.
Koko atu koʼalia uluk ho ema neʼebé tau matan ba serbisu-fatin. Hatudu oin-midar no hahalok diʼak. Karik ita bele dehan: “Ami mai atu koʼalia badak deʼit ho ema iha sira-nia serbisu-fatin tanba susar atu hetan sira iha uma.” Koʼalia badak deʼit, depois fó tratu ka livru ba sira. Diʼak liu lalika koʼalia kona-ba kontribuisaun tanba ema bele hanoin sala katak ita mai atu faʼan sasán ruma. Maibé se sira husu, ita bele esplika ba sira.
Se ema neʼebé tau matan ba serbisu-fatin mak laran-diʼak, ita bele husu lisensa ba nia atu koʼalia lalais deʼit ho serbisu-naʼin seluk. Iha fatin balu, antes atu rai livru balu iha meza, karik diʼak atu husu uluk bele ka lae atu halo nuneʼe.
Uza matenek, no pasiénsia. Porezemplu, se serbisu-naʼin ida mak koʼalia hela ho kliente ida ka nia okupadu hela, hein toʼo nia hotu mak foin koʼalia ho nia.

Koko ida-neʼe durante fulan neʼe:

Iha kalan Adorasaun Família nian tuirmai, pratika liafuan badak atu koʼalia ba ema se Ita haklaken iha serbisu-fatin.