Oinsá atu book ema nia laran?
1. Dalan neʼebé Jesus hanorin halo dixípulu sira sente oinsá?
1 Dalan neʼebé Jesus Kristu hanorin sempre book ema nia laran. Porezemplu, bainhira Jesus esplika tiha eskritura balu ba ninia dixípulu sira, sira-nia laran sai “manas tebes”. (Lucas 24:32) Tanba tenke husi laran mak ema ida bele halo tuir Jeová, entaun oinsá mak ita bele book ema neʼebé estuda nia laran atu nia halo mudansa ba ninia moris?—Roma 6:17.
2. Oinsá mak ita bele uza matenek atu book ema nia laran?
2 Uza matenek: Ba ema balu, susar atu bele book sira hodi bele halo buat ruma se ita mak hatete deʼit katak buat neʼe loos ka laloos. Liuliu se ita mak uza eskritura barabarak hodi ataka sira-nia fiar, neʼe sei halo sira lakohi rona ba ita. Atu bele book ema ida nia laran, ita tenkesér hatene uluk tanbasá mak nia fiar ka halo buat ida. Husu pergunta ho matenek hodi book nia fó sai ninia hanoin. (Provérbios [Amsal] 20:5) Liuhusi dalan neʼe mak ita bele hatene eskritura saida mak bele kona ninia laran. Tan neʼe mak ita presiza koñese didiʼak nia no hatudu pasiénsia ba nia. (Provérbios [Amsal] 25:15) Ita mós presiza hatene katak laʼós ema hotu laʼo ba oin ho lalais iha lia-loos. Fó tempu ba Jeová nia espíritu santu atu book ninia hanoin no halo mudansa sira.—Marcos 4:26-29.
3. Oinsá mak ita bele ajuda estudante atu haburas hahalok diʼak sira?
3 Ajuda sira haburas hahalok diʼak: Ita bele uza eskritura sira neʼebé koʼalia kona-ba Jeová nia laran-diʼak no domin atu ajuda estudante sira haburas hahalok neʼebé diʼak. Ita bele uza eskritura hanesan Salmo (Mazmur) 139:1-4 ka Lucas 12:6, 7 atu hatudu katak Maromak iha interese tebes ba ita ida-idak. Kuandu ema ida mak hafolin Jeová nia domin neʼebé ho laran-diʼak, ninia laran sei book nia atu haburas domin no laran-metin ba Jeová. (Roma 5:6-8; 1 João 4:19) Liután neʼe, se sira mak hatene katak sira-nia hahalok kona mós Jeová, karik neʼe sei book sira atu hatudu respeitu no halo mudansa ba sira-nia hahalok hodi halo kontente Jeová.—Salmo (Mazmur) 78:40, 41; Provérbios (Amsal) 23:15.
4. Oinsá mak ita bele hatudu respeitu ba ema ida-idak nia desizaun bainhira ita hanorin sira?
4 Jeová nunka obriga ema atu halo tuir ninia ukun-fuan sira. Maibé buat neʼebé nia halo mak atu ajuda ema haree katak halo tuir ninia ukun-fuan sira sei lori bensaun. (Isaías [Yesaya] 48:17, 18) Bainhira ita hanorin ema, ita mós hakarak banati-tuir Jeová hodi ajuda ema atu sira rasik mak foti desizaun. Se ema ida mak fiar ho laran no halo mudansa rasik ba sira-nia moris, neʼe sei lori bensaun duni. (Roma 12:2) Neʼe mós sei halo sira hakbesik liután ba Jeová, “ida neʼebé buka-hatene didiʼak ema nia laran”.—Provérbios (Amsal) 17:3.