Banati-tuir profeta sira—Habacuc
1. Tanbasá mak ita bele komprende kona-ba profeta Habacuc nia sentimentu?
1 Agora daudauk ita haree buat aat iha mundu aumenta barak tan deʼit, neʼe bele halo ita sente hanesan Habacuc, nia husu ba Jeová: “Tanbasá mak Ita halo haʼu haree buat neʼebé aat? No tanbasá mak Ita husik ema hetan terus?” (Habacuque [Habakuk] 1:3; 2 Timóteo 3:1, 13) Hanoin kona-ba Habacuc nia mensajen no ninia laran-metin bele ajuda ita tahan atu hein ba Jeová nia loron tesi-lia nian.—2 Pedro 3:7.
2. Oinsá mak ita bele hatudu katak ita moris ho laran-metin ohin loron?
2 Moris ho laran-metin: Duké husik situasaun aat halo taʼuk nia, Habacuc matan-moris nafatin no badinas liután atu halo Jeová nia serbisu. (Habacuque [Habakuk] 2:1) Jeová fó-hatene ba profeta neʼe katak Ninia liafuan sei la tarde atu sai loos no “ema neʼebé laran-loos nia laran-metin sei salva ninia moris”. (Habacuque [Habakuk] 2:2-4) Tanbasá mak liafuan sira-neʼe mós diʼak ba ema kristaun neʼebé moris hela iha loron-ikus sira-neʼe? Importante liu atu fiar katak mundu nia rohan sei mai, duké hanoin kona-ba bainhira. Fiar book duni ita atu matan-moris nafatin no tau uluk serbisu haklaken iha ita-nia moris.—Ebreu 10:38, 39.
3. Tanbasá mak ita tenke haksolok nafatin hodi serbí Jeová?
3 Solok iha Jeová: Bainhira Gog husi rai-Magog ataka Jeová nia povu, neʼe sei koko tebes ita-nia fiar. (Ezequiel [Yehezkiel] 38:2, 10-12) Konflitu ida sempre lori susar no terus ba ema hotu, inklui mós sira neʼebé manán. Karik hahán sei sai menus. Karik ema sei lakon uma, no presiza loroloron nian mós sei sai grave tebes. Ita sei halo saida iha situasaun susar neʼe? Uluk Habacuc mós hatene nia sei hasoru susar, maibé nia serbí nafatin Jeová ho solok. (Habacuque [Habakuk] 3:16-19) Solok iha Jeová bele ajuda ita atu tahan terus sira hanesan neʼe iha futuru.—Neemias 8:10; Ebreu 12:2.
4. Ohin loron no aban-bainrua ita bele hetan solok saida deʼit?
4 Ema sira neʼebé Jeová salva husi ninia loron boot, nia sei kontinua nafatin atu eduka sira kona-ba dalan moris nian. (Habacuque [Habakuk] 2:14) Ema neʼebé hetan moris-hiʼas mós sei aprende kona-ba Jeová. Tan neʼe mak ohin loron ita hakarak uza oportunidade neʼebé ita iha daudauk atu koʼalia kona-ba Jeová no buat furak sira neʼebé nia halo!—Salmo (Mazmur) 34:1; 71:17.