Hanorin Lia-loos

Komesa husi fulan-Setembru, Moris Kristaun no Haklaken Programa no nota sei aumenta tan ezemplu atu haklaken foun ida, ho naran “Hanorin Lia-loos”. Ita-nia objetivu mak atu fahe lia-loos ida husi Bíblia iha dalan neʼebé simples hodi uza pergunta no eskritura ida.

Se ema hatudu interese, ita bele fahe livru ruma ka hatudu vídeo husi jw.org ba nia hodi loron seluk ita bele bá vizita fali nia atu koʼalia liután. Ita tenke hakaʼas an atu vizita fali nia iha semana ida nia laran. Ezemplu haklaken foun neʼe no estudante nia knaar iha reuniaun sei foti husi kaixa rezumu husi livru Ita bele komprende Bíblia! (Lia-tetun seidauk iha.) Husi kaixa neʼe ita bele hetan pergunta no eskritura seluk tan atu ajuda ita bainhira atu halo vizita fali, ka halaʼo estuda hodi uza deʼit Bíblia.

Dalan atu bá moris mak ida deʼit. (Mt 7:13, 14) Maibé tanba ema ida-idak nia relijiaun no moris la hanesan, tan neʼe ita tenke koʼalia kona-ba Bíblia nia lia-loos neʼebé kona ema ida-idak nia situasaun. (1Ti 2:4) Bainhira ita hatene ona oinsá atu koʼalia barak liután kona-ba tópiku oioin husi Bíblia no aumenta ita-nia matenek atu “uza ho didiʼak liafuan lia-loos nian”, ita-nia ksolok sei aumenta liután, no ita mós sei hanorin lia-loos ba ema seluk ho susesu.—2Ti 2:15.