Oinsá mak Kriadór fó sai ninia promesa sira

Husi tempu uluk kedas, ita-nia Kriadór komunika ho ema liuhusi anju no profeta sira. No mós nia hakarak atu hakerek ninia liafuan no promesa sira atu ema bele lee. Maromak nia promesa sira-neʼe kona ita-nia moris iha futuru. Entaun, iha neʼebé mak ita bele hetan Maromak nia promesa sira ohin loron?

Maromak nia liafuan sira hakerek iha Eskritura Sagrada. (2 Timóteo 3:16) Oinsá mak Maromak uza profeta sira atu hakerek ninia mensajen? (2 Pedro 1:21) Maromak tau ninia hanoin iha hakerek-naʼin sira-nia neon atu hakerek ninia liafuan. Hanoin toʼok ezemplu neʼe. Maski patraun ida husu ninia sekretáriu mak hakerek ninia mensajen iha karta ida, liafuan iha karta neʼe nia laran mak nafatin patraun neʼe nian. Nuneʼe mós, maski Maromak uza ema atu hakerek ninia liafuan sira, mensajen hotu neʼe mak mai husi Maromak.

EMA BARAK BELE HETAN MAROMAK NIA LIAFUAN

Maromak nia liafuan sira mak importante tebes, tan neʼe nia hakarak atu ema hotu bele lee no komprende. Ohin loron ema husi “nasaun, suku, língua, no povu hotu” bele hetan Maromak nia “liafuan diʼak neʼebé iha ba nafatin”. (Apokalipse 14:6) Ho Maromak nia bensaun ita bele hetan Bíblia kompletu ka la kompletu iha língua 3.000 liu, barak liu fali livru sira seluk.