MORIS NUʼUDAR EMA KRISTAUN
Hetan haksolok hodi haklaken liafuan diʼak
Dala ruma Ita sente susar atu haklaken ka lae? Karik ita barak sei hatán sin. Tanbasá? Karik tanba ema la interese ka la gosta bainhira ita haklaken ba sira. Ka karik tanba ita taʼuk atu koʼalia ba ema neʼebé ita la koñese. Buat sira hanesan neʼe bele halakon ita-nia ksolok. Maibé ita serbí Maromak neʼebé kontente no nia hakarak ita serbí nia ho haksolok. (Sal 100:2; 1Ti 1:11) Saida mak razaun tolu atu ita bele sente haksolok iha serbisu haklaken?
Primeiru, ita haklaken kona-ba esperansa. Ohin loron ema barak sente katak esperansa la iha ona, maibé ita “lori liafuan diʼak kona-ba buat neʼebé diʼak liu”. (Isa 52:7) Liafuan diʼak kona-ba Maromak nia Ukun mós bele halo ita rasik sente haksolok. Antes atu sai ba haklaken, uza tempu uitoan hodi medita kona-ba bensaun sira neʼebé Maromak nia Ukun sei lori ba mundu neʼe.
Segundu, liafuan diʼak neʼebé ita haklaken bele ajuda ema iha dalan espirituál, no mós ajuda iha sira-nia moris loroloron nian. Porezemplu, sira aprende atu husik toman aat neʼebé bele estraga sira, no sira iha oportunidade atu hetan moris rohan-laek iha futuru. (Isa 48:17, 18; Rom 1:16) Ita bele kompara ita-nia haklaken hanesan knaar atu bá buka ema neʼebé lakon hodi salva sira-nia moris. Maski ema balu lakohi ita-nia ajuda, maibé ita bá buka nafatin sira neʼebé hakarak ajuda.—Mt 10:11-14.
Terseiru, importante liu mak, ita-nia haklaken fó hahiʼi ba Jeová. Nia hafolin tebes ita-nia hakaʼas-an iha serbisu neʼe. (Isa 43:10; Ebr 6:10) Ho laran-luak, nia fó ninia espíritu santu atu ita bele kumpre ita-nia knaar. Tan neʼe, husu Jeová ho laran atu nia fó ksolok ba ita, tanba hahalok neʼe mai husi espíritu santu. (Gal 5:22) Ho ninia ajuda, ita bele manán ita-nia sentimentu taʼuk no haklaken ho aten-brani. (Aps 4:31) Se ita halo hanesan neʼe, maski ema simu ka la simu, ita sei sente haksolok iha ita-nia knaar atu haklaken.—Eze 3:3.
Ita hakarak hatudu hahalok saida bainhira Ita bá haklaken? Oinsá mak ita bele hatudu ita-nia ksolok?
HAREE VÍDEO HETAN FALI KSOLOK LIUHUSI ESTUDA NO HANOIN KLEʼAN, DEPOIS HATÁN BA PERGUNTA SIRA TUIRMAI NEʼE:
Tanbasá mak ita tenke fó tempu atu estuda Bíblia, maski ita uza ona tempu barak iha serbisu haklaken?
Oinsá mak ita bele banati-tuir Maria?
Iha tempu saida mak Ita gosta atu medita kona-ba Maromak nia Liafuan?
Saida mak lori ksolok ba Ita kona-ba haklaken liafuan diʼak?