“Rai loke ninia ibun no tolan mota”

Durante tinan barak nia laran, autoridade sira dala ruma ajuda Jeová nia povu. (Ezr 6:1-12; Est 8:10-13) Iha tempu modernu, ita bele haree “rai” neʼebé reprezenta ema ka grupu balu husi mundu neʼe neʼebé iha podér no la ulun-toos, tolan “mota”, ka terus neʼebé mai husi “samea boot”, Diabu Satanás. (Apk 12:16) Jeová, Maromak neʼebé “salva ita”, dala ruma bele book ukun-naʼin sira atu fó kmaan ba Ninia povu.—Sal 68:20; Prv 21:1.

Maibé oinsá se Ita tama komarka tanba Ita-nia fiar? Keta duvida katak Jeová nafatin tau matan Ita. (Gén 39:21-23; Sal 105:17-20) Ita sei hetan bensaun tanba fiar neʼebé Ita hatudu, no Ita-nia laran-metin sei fó aten-brani ba irmaun-irmán sira iha mundu tomak.—Flp 1:12-14; Apk 2:10.

HAREE VÍDEO IRMAUN SIRA IHA KOREIA LIVRE HUSI KOMARKA, DEPOIS HATÁN BA PERGUNTA SIRA TUIRMAI NEʼE:

• Tanbasá mak uluk ita-nia irmaun rihun ba rihun iha Koreia Súl tama komarka?

• Tribunál sira halo desizaun saida deʼit hodi ikusmai sira husik ita-nia irmaun balu livre?

• Oinsá mak ita bele ajuda ita-nia irmaun sira iha mundu tomak neʼebé tama komarka tanba sira-nia fiar?

• Oinsá mak ita bele uza didiʼak ita-nia liberdade agora?

• Sé mak hetan glória kuandu ita manán iha tribunál?