Inan-aman, hanorin imi-nia oan saida mak sira presiza hatene

Ita hela iha mundu neʼebé koko atu halo ita hanoin katak buat neʼebé aat mak diʼak no buat neʼebé diʼak mak aat. (Isa 5:20) Triste mak ema balu halo buat neʼebé Jeová odi, inklui hahalok omoseksuál. Joven no labarik sira iha eskola karik koko dada Ita-nia oan atu halo tuir sira-nia hahalok neʼebé la diʼak. Oinsá mak Ita bele prepara Ita-nia oan atu hasoru situasaun sira-neʼe no situasaun seluk ho susesu?

Hanorin Ita-nia oan kona-ba Jeová nia matadalan sira. (Lev 18:3) Hanorin sira hakat ba hakat saida mak Bíblia hatete kona-ba hahalok seksuál. (Deu 6:7) Husu Ita-nia an: ‘Haʼu hanorin ona haʼu-nia oan hahalok neʼebé loos kona-ba oinsá ema hatudu domin ba nia ka nia hatudu domin ba ema seluk, tansá importante atu uza roupa neʼebé hatudu respeitu, no ema seluk presiza respeitu ninia privasidade? Haʼu-nia oan hatene saida mak sira tenke halo se ema ruma koko hatudu pornografia ka husu sira atu halo buat neʼebé Jeová la gosta?’ Se sira hatene ona saida mak sira presiza halo, neʼe sei ajuda sira atu sees husi problema. (Prv 27:12; Ecl 7:12) Hodi hanorin Ita-nia oan, Ita hatudu katak Ita hadomi Ita-nia oan neʼebé nuʼudar prezente furak husi Jeová.—Sal 127:3.

HAREE VÍDEO HARII UMA NEʼEBÉ SEI TAHAN—PROTEJE ITA-NIA OAN HUSI “BUAT NEʼEBÉ AAT”, DEPOIS HATÁN BA PERGUNTA TUIRMAI:

• 

  Tanbasá ema balu sente susar atu koʼalia ba sira-nia oan kona-ba buat seksuál nian?

• 

  Tanbasá inan-aman presiza treinu sira-nia oan “ho dixiplina no ho hanorin neʼebé tuir Jeová nia hakarak”?—Éf 6:4

• 

  Saida mak Jeová nia organizasaun prepara ona atu ajuda inan-aman esplika ba sira-nia oan kona-ba hahalok seksuál?—w19.05 p. 12, kaixa

• Tanbasá mak Ita presiza koʼalia beibeik ho Ita-nia oan kona-ba buat sira-neʼe antes sira hasoru problema neʼebé sériu?