Buka dame no kontra hasoru laran-moras

1. Oinsá laran-moras afeta José nia família?

JACOB hadomi ninia oan-mane hotu, maibé nia hadomi liu José neʼebé idade 17. Neʼe halo José nia maun sira sente oinsá? Sira sai laran-moras, no sira komesa odi nia. José la halo sala ruma atu ninia maun sira odi nia. Maski nuneʼe, sira faʼan José nuʼudar atan no bosok sira-nia apá katak animál fuik han tiha ninia oan doben. Laran-moras halakon dame iha sira-nia família no hakanek sira-nia apá nia laran.—Gén 37:3, 4, 27-34.

2. Tuir Galásia 5:19-21, tanbasá mak laran-moras perigozu?

² Bíblia temi laran-morasb hamutuk ho “hahalok sira neʼebé husi isin” neʼebé bele hanetik ema atu simu Maromak nia Ukun nuʼudar liman-rohan. (Lee Galásia 5:19-21.) Dala barak laran-moras mak hun ba hahalok sira hanesan odi malu, istori malu no hirus toʼo la kontrola an.

3. Iha lisaun neʼe, ita sei aprende kona-ba saida?

³ José nia maun sira-nia ezemplu hatudu katak laran-moras bele estraga relasaun diʼak no halakon dame iha família. Maski ita sei nunka halo buat aat hanesan José nia maun sira, maibé ita hotu mak la perfeitu no ita-nia laran mak makerek. (Jer 17:9) Tan neʼe mak dala ruma ita sai laran-moras. Mai ita hanoin fali ezemplu balu iha Bíblia neʼebé ajuda ita atu hatene tanbasá laran-moras bele sai buras iha ita-nia laran. Depois neʼe ita sei aprende dalan balu atu kontra hasoru laran-moras no haburas dame.

SAIDA MAK HAMOSU LARAN-MORAS?

4. Tanbasá ema Filístia laran-moras ba Isaac?

⁴ Rikusoin. Isaac riku, no ema Filístia sira sai laran-moras ba Isaac tanba nia iha rikusoin barak. (Gén 26:12-14) Sira mós taka bee-posu sira atu Isaac labele fó-hemu ba ninia animál sira. (Gén 26:15, 16, 27) Hanesan ema Filístia, ohin loron ema balu sai laran-moras ba ema neʼebé riku liu sira. Sira hakarak buat neʼebé ema seluk nian no mós lakohi ema seluk atu iha buat sira-neʼe.

5. Tanbasá ulun-naʼin relijiaun sira laran-moras ba Jesus?

⁵ Bainhira ema barak gosta ema ida. Ulun-naʼin relijiaun Judeu sira laran-moras ba Jesus tanba povu baibain gosta tebes Jesus. (Mt 7:28, 29) Jesus mak Maromak nia reprezentante, no nia hanorin lia-loos. Maski nuneʼe, ulun-naʼin relijiaun sira habelar lia-bosok neʼebé aat no koʼalia aat hodi hafoʼer Jesus nia naran. (Mc 15:10; João 11:47, 48; 12:12, 13, 19) Lisaun saida mak ita bele aprende husi istória neʼe? Ita tenke hakaʼas an atu la sai laran-moras ba maluk sira neʼebé irmaun-irmán sira hadomi tanba sira-nia hahalok diʼak. Maibé ita presiza hakaʼas an atu banati-tuir sira-nia hahalok diʼak.—1 Kor 11:1; 3 João 11.

6. Laran-moras book Diótrefes atu halo saida?

⁶ Priviléjiu iha kongregasaun. Iha apóstolu sira-nia tempu, Diótrefes laran-moras ba irmaun sira neʼebé tau matan ba kongregasaun Kristaun. Nia hakarak “hetan pozisaun primeiru” iha kongregasaun, tan neʼe nia koʼalia aat apóstolu João no irmaun sira seluk hodi ema la respeitu tan sira. (3 João 9, 10) Maski ita sei nunka halo buat aat hanesan Diótrefes, maibé karik ita komesa laran-moras ba maluk Kristaun tanba nia hetan knaar neʼebé ita hein atu simu, liuliu se ita sente katak ita mós kumpre kritéria atu halaʼo knaar neʼe.

7. Laran-moras bele lori rezultadu aat saida mai ita?

⁷ Laran-moras mak hanesan duʼut aat. Bainhira ida-neʼe iha abut neʼebé metin ona iha ita-nia laran, susar tebes atu fokit sai. Sentimentu negativu hanesan foti an no hanoin an deʼit bele halo laran-moras sai buras liután. Hanesan duʼut aat bele hanetik ai-funan atu moris, laran-moras mós bele hanetik ita atu haburas hahalok diʼak sira hanesan domin, laran-sadiʼa no laran-diʼak. Bainhira laran-moras komesa moris, ita presiza fokit sai kedas husi ita-nia laran. Oinsá mak ita bele kontra hasoru laran-moras?

HABURAS HARAIK AN NO KONTENTE

8. Hahalok saida deʼit mak bele ajuda ita kontra hasoru laran-moras?

⁸ Ita bele kontra hasoru laran-moras liuhusi haburas hahalok haraik an no sente kontente ho buat neʼebé ita iha. Bainhira ita-nia laran nakonu ho hahalok diʼak sira-neʼe, la iha fatin ba laran-moras. Haraik an sei ajuda ita atu la hanoin katak ita mak diʼak liu. Ema neʼebé haraik an la sente katak nia merese atu hetan buat barak liu fali ema seluk. (Gal 6:3, 4) Ema neʼebé sente kontente ho buat neʼebé nia iha, la kompara ninia an ho ema seluk. (1 Tim 6:7, 8) Bainhira ema ida haraik an no sente kontente ho buat neʼebé nia iha, nia sei haksolok hamutuk ho ema neʼebé hetan buat diʼak.

9. Tuir Galásia 5:16 no Filipe 2:3, 4, espíritu santu ajuda ita atu halo saida?

⁹ Ita presiza Maromak nia espíritu santu atu bele ajuda ita hasees an husi laran-moras no haburas fali hahalok haraik an no sente kontente ho buat neʼebé ita iha. (Lee Galásia 5:16; Filipe 2:3, 4.) Jeová nia espíritu santu bele ajuda ita buka-hatene ita-nia hanoin no motivu. Ho Maromak nia ajuda, ita bele troka hanoin neʼebé aat ho hanoin neʼebé pozitivu. (Sal 26:2; 51:10) Agora mai ita koʼalia kona-ba Moisés no Paulo neʼebé hetan susesu atu kontra hasoru laran-moras.

10. Situasaun saida mak bele koko Moisés? (Haree dezeñu iha livru oin.)

¹⁰ Moisés iha priviléjiu boot iha Maromak nia povu nia leet, maibé nia la hanetik ema seluk atu hetan priviléjiu neʼe. Porezemplu, iha tempu ida Jeová foti espíritu santu balu husi Moisés no entrega ba Izraél nia katuas balu neʼebé hamriik besik tenda reuniaun nian. Depois neʼe, Moisés rona katak katuas rua neʼebé la mai halibur iha tenda reuniaun nian mós hetan espíritu santu no komesa hatudu hahalok hanesan profeta. Moisés halo saida bainhira Josué husu nia atu hapara katuas rua neʼe? Moisés la sai laran-moras tanba Jeová tau atensaun ba katuas rua neʼe. Moisés ho haraik an haksolok hamutuk ho sira tanba priviléjiu neʼe. (Núm 11:24-29) Lisaun saida mak ita bele aprende husi Moisés?

11. Oinsá katuas sira bele banati-tuir Moisés?

¹¹ Se Ita mak katuas kongregasaun, Ita hetan ona knaar atu treinu irmaun seluk iha kongregasaun atu halaʼo knaar neʼebé Ita gosta ka lae? Karik Ita gosta priviléjiu atu dirije Livru Haklaken semana-semana. Se Ita haraik an hanesan Moisés, Ita sei nunka hanoin katak Ita la iha folin se Ita hetan knaar atu treinu irmaun seluk atu halaʼo fali priviléjiu neʼe. Ita sei kontente atu ajuda irmaun neʼe.

12. Oinsá ema Kristaun barak ohin loron hatudu haraik an no kontente ho buat neʼebé sira iha?

¹² Hanoin toʼok situasaun seluk neʼebé irmaun idade sira hasoru. Ba tinan barak, karik sira serbí nuʼudar koordenadór ba grupu katuas nian. Maibé bainhira sira tinan 80, sira prontu atu entrega knaar neʼe ba ema seluk. Katuas área sira neʼebé idade 70 ona ho haraik an entrega knaar neʼe ba ema seluk no simu knaar seluk. Foin lalais neʼe, ema Betel barak iha mundu tomak simu knaar foun. Irmaun-irmán laran-metin sira-neʼe la rai odi ba ema seluk neʼebé halaʼo fali sira-nia knaar.

13. Situasaun saida mak bele tenta Paulo atu sai laran-moras ba apóstolu naʼin-12?

¹³ Apóstolu Paulo mós fó ezemplu diʼak kona-ba hatudu hahalok haraik an no kontente ho buat neʼebé nia iha. Paulo la husik laran-moras sai buras iha ninia laran. Maski badinas atu haklaken, maibé nia ho haraik an dehan: “Haʼu kiʼik liu fali apóstolu sira seluk, no haʼu la merese atu bolu nuʼudar apóstolu ida.” (1 Kor 15:9, 10) Apóstolu naʼin-12 laʼo tuir Jesus durante Jesus haklaken iha rai, maibé Paulo sai ema Kristaun depois Jesus mate no moris-hiʼas. Maski ikusmai Paulo simu knaar nuʼudar “apóstolu ba nasaun sira”, maibé nia la simu priviléjiu espesiál atu sai parte ba apóstolu naʼin-12. (Rom 11:13; Após 1:21-26) Paulo la laran-moras ba apóstolu naʼin-12 tanba sira iha relasaun besik ho Jesus, maibé nia kontente ho buat neʼebé nia iha.

14. Ita sei halo saida se ita haraik an no kontente ho buat neʼebé ita iha?

¹⁴ Se ita haraik an no kontente ho buat neʼebé ita iha, ita sei sai hanesan Paulo no hatudu respeitu ba ema sira neʼebé simu ona responsabilidade husi Jeová. (Após 21:20-26) Jeová arranja katuas sira atu dirije kongregasaun Kristaun. Maski sira la perfeitu, maibé Jeová haree sira nuʼudar “prezente”. (Éf 4:8, 11) Bainhira ita hatudu respeitu ba sira no ho haraik an halo tuir sira-nia matadalan, ita sei hakbesik nafatin ba Jeová no iha dame ho maluk Kristaun sira.

“BUKA ATU HALO BUAT NEʼEBÉ HABURAS DAME”

15. Ita presiza halo saida?

¹⁵ Se ita laran-moras ba malu, neʼe sei halakon dame. Ita presiza fokit sai tiha laran-moras husi ita-nia laran no mós kuidadu atu la halo ema seluk sai laran-moras. Ita presiza halo buat importante sira-neʼe atu ita bele halo tuir Jeová nia mandamentu hodi “buka atu halo buat neʼebé haburas dame no buat neʼebé hametin malu”. (Rom 14:19) Oinsá ita bele ajuda ema seluk kontra hasoru laran-moras, no oinsá ita bele haburas dame?

16. Oinsá mak ita bele ajuda ema seluk atu kontra hasoru laran-moras?

¹⁶ Ita-nia hanoin no hahalok bele fó influénsia ba ema seluk. Mundu hakarak ita atu gaba an kona-ba buat neʼebé ita iha. (1 João 2:16) Maibé hahalok neʼe haburas laran-moras. Ita bele ajuda ema seluk atu la sai laran-moras hodi la koʼalia beibeik kona-ba buat neʼebé ita iha ka ita-nia planu atu sosa buat ruma. Dalan seluk atu la halo ema seluk laran-moras mak hodi iha hanoin neʼebé loos kona-ba ita-nia priviléjiu iha kongregasaun. Se ita dada atensaun demais ba ita-nia priviléjiu, karik ita sei halo ema seluk sente laran-moras. Maibé hodi hatudu interese ba ema seluk no rekoñese buat diʼak neʼebé sira halo, ita sei ajuda sira sente kontente ho buat neʼebé sira iha no haburas unidade no dame iha kongregasaun.

17. José nia maun sira konsege halo saida, no tanbasá?

¹⁷ Ita bele hetan susesu hodi kontra hasoru laran-moras. Hanoin fali José nia maun sira-nia ezemplu. Tinan barak liutiha depois sira halo aat ba José, sira hasoru nia iha rai-Ejitu. Antes José fó sai ninia an ba sira, nia koko sira atu haree se sira halo ona mudansa ka lae. Nia han hamutuk ho sira, no tau atensaun liu ba ninia alin Benjamim duké ba ninia maun sira. (Gén 43:33, 34) Maibé sira la sai laran-moras ba Benjamim. Sira hatudu katak sira hanoin tebes sira-nia alin no sira-nia aman Jacob. (Gén 44:30-34) Tanba José nia maun sira la laran-moras tan, sira bele haburas fali dame iha família laran. (Gén 45:4, 15) Nuneʼe mós se ita fokit sai tiha laran-moras husi ita-nia laran, ita sei haburas dame iha família no kongregasaun.

18. Tuir Tiago 3:17, 18, saida mak sei akontese se ita buka dame?

¹⁸ Jeová hakarak ita atu kontra hasoru laran-moras no buka dame. Ita presiza hakaʼas an atu halo buat rua neʼe. Hanesan ita aprende ona iha lisaun neʼe, fasil ba ita atu sai laran-moras. (Tgo 4:5) No mundu neʼe habelar hahalok laran-moras. Maibé se ita haburas haraik an, kontente ho buat neʼebé ita iha no hatudu agradese, ita sei la hatudu laran-moras. Ita sei buka dame, no ida-neʼe bele ajuda ita atu haburas hahalok diʼak sira.—Lee Tiago 3:17, 18.