Domin no agradese book Ita atu hetan batizmu

1-2. Tuir Apóstolu 8:27-31, 35-38, saida mak book ema-boot husi Etiópia atu hetan batizmu?

ITA hakarak hetan batizmu hodi sai Kristu nia dixípulu ka lae? Domin no agradese book ona ema barak atu halo desizaun neʼe. Haree toʼok ezemplu husi ema-boot ida neʼebé serbí liurai-feto Etiópia.

² Ema-boot neʼe halo tuir kedas buat neʼebé nia aprende husi Eskritura. (Lee Apóstolu 8:27-31, 35-38.) Saida mak book nia atu halo nuneʼe? Klaru katak nia hafolin Maromak nia Liafuan tanba iha ninia kuda-karreta nia lee daudaun versíkulu balu husi livru Isaias. No bainhira Filipe koʼalia ho nia, nia sente agradese tebes ba buat neʼebé Jesus halo ona ba nia. Maibé tanbasá mak ema-boot neʼe halo viajen ba Jeruzalein? Tanba nia haburas ona domin ba Jeová. Oinsá ita hatene? Nia bá Jeruzalein atu adora Jeová. Mane neʼe troka ona ninia relijiaun no sai parte ba nasaun neʼebé dedika ona ba Maromak loos. No domin ba Jeová mós book nia atu halo hakat importante seluk, neʼe mak hetan batizmu no sai Kristu nia dixípulu.—Mt 28:19.

3. Saida mak bele hanetik Ita atu hetan batizmu? (Haree kaixa “Ita-nia laran mak hanesan rai ida-neʼebé?”)

³ Domin ba Jeová bele book Ita atu hetan batizmu. Maibé domin mós bele hanetik Ita atu halo nuneʼe. Oinsá? Hanoin toʼok ezemplu balu. Ita hadomi tebes Ita-nia família no belun neʼebé laʼós Testemuña no karik Ita hanoin barak katak sira sei odi Ita se Ita hetan batizmu. (Mt 10:37) Ka karik Ita gosta atu halo buat neʼebé Ita hatene katak Maromak odi, no Ita sente susar atu sees husi buat sira-neʼe. (Sal 97:10) Ka karik Ita toman ona atu selebra loron-boot balu neʼebé liga ho relijiaun falsu. Karik Ita gosta tebes atividade oioin neʼebé halaʼo durante loron-boot sira-neʼe. Rezultadu mak Ita sente susar atu la selebra tan loron-boot sira neʼebé Jeová la gosta. (1 Kor 10:20, 21) Entaun Ita tenke husu ba Ita-nia an: “Iha haʼu-nia laran, saida mak importante liu?”

DOMIN NEʼEBÉ IMPORTANTE LIU

4. Saida mak razaun importante liu atu hetan batizmu?

⁴ Antes estuda ho Testemuña ba Jeová, karik Ita hafolin ona Bíblia no hadomi ona Jesus. No tanba agora Ita estuda Bíblia ho Testemuña ba Jeová, karik Ita gosta atu ransu ho sira. Klaru katak Ita hadomi no hafolin buat sira-neʼe. Maibé karik buat sira-neʼe la book Ita atu dedika an ba Jeová no hetan batizmu. Razaun importante liu atu hetan batizmu mak domin ba Maromak Jeová. Bainhira Ita hadomi Jeová liu fali buat seluk, Ita sei la husik buat ida ka ema ida atu hanetik Ita serbí nia. Domin ba Jeová sei book Ita atu hetan batizmu no sei ajuda Ita atu laran-metin nafatin ba Jeová depois hetan batizmu.

5. Ita sei aprende kona-ba saida iha lisaun neʼe?

⁵ Jesus hatete katak ita tenke hadomi Jeová ho ita-nia laran tomak, moris tomak, neon tomak no kbiit tomak. (Mc 12:30) Oinsá Ita bele haburas domin no respeitu neʼebé kleʼan ba Jeová? Se ita medita kona-ba Jeová nia domin boot ba ita, neʼe sei book ita atu hadomi fali nia. (1 João 4:19) Tan neʼe, iha lisaun neʼe, ita sei aprende kona-ba buat neʼebé ita presiza halo atu haburas domin ba Jeová no hetan batizmu.b

6. Tuir Roma 1:20, saida mak dalan ida atu aprende kona-ba Jeová?

⁶ Aprende kona-ba Jeová liuhusi ninia kriasaun. (Lee Roma 1:20; Apok 4:11) Medita kona-ba ai-horis no animál neʼebé Jeová kria ona no hanoin kona-ba oinsá buat sira-neʼe hatudu sai Jeová nia matenek. Aprende kona-ba dalan furak neʼebé Jeová kria Ita-nia isin-lolon. (Sal 139:14) No hanoin kona-ba oinsá Jeová kria loro-matan neʼebé iha kbiit boot. Ita-nia loro-matan mak fitun ida husi fitun biliaun ba biliaun.c (Isa 40:26) Bainhira Ita halo nuneʼe, Ita sei respeitu Jeová liután. Importante atu hatene katak Jeová mak matenek no iha kbiit boot. Maibé atu hametin Ita-nia domin ba Jeová no atu sai ninia belun, Ita presiza koñese nia liután.

7. Ita presiza fiar saida atu Ita-nia domin ba Jeová sai boot liután?

⁷ Ita presiza fiar katak Jeová hadomi tebes Ita. Ita sente susar atu fiar katak Kriadór ba lalehan no rai haree no hadomi Ita ka lae? Se nuneʼe, hanoin-hetan katak Jeová “la dook husi ita ida-idak”. (Após 17:26-28) Nia “buka-hatene ema nia laran hotu” no nia promete katak ‘se Ita buka nia, Ita sei hetan nia’. (1 Krón 28:9) Tuir loloos, Ita estuda Bíblia tanba Jeová ‘dada Ita besik’ ba nia. (Jer 31:3) Bainhira Ita hafolin liután buat hotu neʼebé Jeová halo ona ba Ita, Ita-nia domin ba nia sei sai boot liután.

8. Oinsá mak Ita bele hatudu fali Ita-nia domin ba Jeová?

⁸ Dalan ida atu hatudu fali Ita-nia domin ba Jeová mak hodi koʼalia ho nia liuhusi orasaun. Ita-nia domin ba Maromak sei aumenta bainhira Ita konta ba nia kona-ba Ita-nia laran-taridu no fó agradese ba nia kona-ba buat hotu neʼebé nia halo ona ba Ita. Ita-nia relasaun diʼak ho Jeová sei metin liután bainhira Ita haree nia hatán ba Ita-nia orasaun. (Sal 116:1) Ita sei fiar metin liután katak nia komprende Ita. Maibé atu hakbesik liután ba Jeová, Ita presiza komprende ninia dalan atu hanoin. Ita mós presiza hatene saida mak nia hakarak husi Ita. Dalan ida deʼit atu hetan koñesimentu mak liuhusi estuda ninia Liafuan Bíblia.

9. Oinsá mak Ita bele hatudu katak Ita hafolin Bíblia?

⁹ Aprende atu hafolin Maromak nia Liafuan Bíblia. Só Bíblia deʼit mak fó sai lia-loos kona-ba Jeová no ninia hakarak mai Ita. Ita hatudu katak Ita hafolin Bíblia liuhusi lee Bíblia loroloron, prepara livru neʼebé Ita sei estuda ho Ita-nia mestre Bíblia, no aplika buat neʼebé Ita aprende. (Sal 119:97, 99; João 17:17) Ita iha programa atu lee Bíblia ka lae? Ita lee Bíblia loroloron ka lae?

10. Saida mak buat ida neʼebé halo Bíblia espesiál tebes?

¹⁰ Buat ida neʼebé halo Bíblia espesiál tebes mak Bíblia fó sai istória husi ema sira neʼebé haree ona Jesus. Bíblia deʼit mak esplika ho loloos saida mak Jesus halo ona ba Ita. Bainhira Ita aprende buat neʼebé Jesus hatete no halo, neʼe sei book duni Ita atu habelun ho nia.

11. Saida mak bele ajuda Ita atu hadomi Jeová?

¹¹ Haburas domin ba Jesus sei ajuda Ita hadomi Jeová liután. Tanbasá? Tanba Jesus haleno ninia Aman nia hahalok ho perfeitu. (João 14:9) Tan neʼe, bainhira Ita aprende liután kona-ba Jesus, Ita sei komprende no hafolin Jeová liután. Hanoin kona-ba dalan neʼebé Jesus hatudu laran-sadiʼa ba sira neʼebé ema seluk hakribi, hanesan ema kiak, moras, ka fraku. Hanoin mós kona-ba konsellu diʼak neʼebé Jesus fó ba Ita no oinsá Ita-nia moris sai diʼak liu tanba halo tuir konsellu sira-neʼe.—Mt 5:1-11; 7:24-27.

12. Bainhira Ita aprende kona-ba Jesus, neʼe sei book Ita atu halo saida?

¹² Ita-nia domin ba Jesus sei sai boot liután bainhira Ita hanoin kleʼan kona-ba sakrifísiu neʼebé Jesus halo ona atu ita bele hetan perdua ba ita-nia sala. (Mt 20:28) Bainhira Ita komprende katak Jesus prontu atu mate ba Ita, neʼe bele book Ita atu arrepende an no husu perdua ba Jeová. (Após 3:19, 20; 1 João 1:9) Bainhira Ita hadomi Jesus no Jeová, neʼe sei book Ita atu hakarak halibur hamutuk ho ema neʼebé hadomi mós sira.

13. Jeová fó saida ba Ita?

¹³ Haburas domin ba Jeová nia família. Ita-nia família no belun neʼebé laʼós Testemuña karik la komprende tanbasá Ita hakarak dedika an ba Jeová. Karik sira mós kontra Ita. Maibé Jeová sei ajuda Ita liuhusi fó irmaun-irmán sira atu sai nuʼudar Ita-nia família. Se Ita hakbesik nafatin ba irmaun-irmán sira, Ita sei hetan domin no apoia. (Mc 10:29, 30; Ebr 10:24, 25) Ikusmai karik Ita-nia família balu sei serbí Jeová no moris tuir Jeová nia matadalan sira.—1 Ped 2:12.

14. Oinsá Ita rasik sente ona katak liafuan iha 1 João 5:3 mak loos?

¹⁴ Aprende atu hafolin no aplika Jeová nia matadalan sira. Antes koñese Jeová, karik Ita deside rasik saida mak loos ka sala, maibé agora Ita komprende katak Jeová nia matadalan sira mak diʼak liu. (Sal 1:1-3; lee 1 João 5:3.) Hanoin kona-ba Bíblia nia konsellu ba laʼen, feen, inan-aman no oan sira. (Éf 5:22–6:4) Ita sente ona katak Ita-nia família sai kontente liu tanba aplika konsellu sira-neʼe ka lae? Bainhira Ita halo tuir Jeová nia matadalan kona-ba hili didiʼak belun sira, neʼe ajuda Ita atu hatudu hahalok diʼak ka lae? Ita sente kontente liu ka lae? (Prov 13:20; 1 Kor 15:33) Karik Ita-nia resposta ba pergunta sira-neʼe mak sin.

15. Se Ita la hatene oinsá atu aplika Bíblia nia prinsípiu ruma, saida mak Ita bele halo?

¹⁵ Dala ruma, Ita aprende Bíblia nia prinsípiu ruma no karik la hatene oinsá atu aplika ida-neʼe. Tan neʼe mak Jeová uza ninia organizasaun atu fó publikasaun sira neʼebé bele ajuda Ita komprende saida mak loos ka sala. (Ebr 5:13, 14) Bainhira Ita lee no estuda publikasaun sira-neʼe, Ita sei nota katak informasaun sira-neʼe mak diʼak no espesífiku, no karik neʼe book Ita atu hakbesik liután ba Jeová nia organizasaun.

16. Oinsá mak Jeová organiza ninia povu?

¹⁶ Aprende atu hafolin no apoia Jeová nia organizasaun. Jeová organiza ona ninia povu nuʼudar kongregasaun. No ninia Oan-Mane Jesus mak ulun ba kongregasaun. (Éf 1:22; 5:23) Jesus hili ona grupu kiʼik ida husi ema sira neʼebé iha esperansa atu bá lalehan hodi dirije serbisu neʼebé Jesus hakarak kumpre ohin loron. Jesus dehan katak grupu neʼe mak “atan laran-metin no matenek”, no atan neʼe halaʼo didiʼak ninia responsabilidade atu fó ai-han no mós proteje Ita iha dalan espirituál. (Mt 24:45-47) Dalan ida atan laran-metin tau matan ba Ita mak liuhusi halo arranju atu hili mane sira neʼebé kumpre kritéria atu sai katuas kongregasaun. Katuas sira-neʼe bele dirije no proteje Ita. (Isa 32:1, 2; Ebr 13:17; 1 Ped 5:2, 3) Katuas sira ho hakarak rasik hakaʼas an atu fó kmaan ba Ita no ajuda Ita atu hakbesik liután ba Jeová. Maibé buat importante liu neʼebé katuas sira halo mak ajuda Ita atu hanorin ema seluk kona-ba Jeová.—Éf 4:11-13.

17. Tuir Roma 10:10, 13, 14, tanbasá ita haklaken ba ema seluk kona-ba Jeová?

¹⁷ Ajuda ema seluk atu haburas domin ba Jeová. Jesus haruka ninia dixípulu sira atu hanorin ema seluk kona-ba Jeová. (Mt 28:19, 20) Karik Ita halo tuir mandamentu neʼe tanba neʼe mak Ita-nia responsabilidade. Maibé bainhira Ita-nia domin ba Jeová sai buras liután, Ita sei sente hanesan apóstolu Pedro no João neʼebé dehan: “Ami labele para atu koʼalia kona-ba buat neʼebé ami haree no rona ona.” (Após 4:20) Ita sei sente kontente tebes se Ita bele ajuda ema ida hadomi Jeová. Imajina toʼok ksolok neʼebé Filipe sente bainhira nia ajuda ema-boot husi Etiópia aprende lia-loos iha Eskritura sira no hetan batizmu. Bainhira Ita banati-tuir Filipe no halo tuir Jesus nia mandamentu atu haklaken, Ita hatudu katak Ita hakarak sai Testemuña ba Jeová. (Lee Roma 10:10, 13, 14.) No karik Ita sei husu pergunta hanesan ho ema-boot husi Etiópia: “Saida mak hanetik haʼu atu hetan batizmu?”—Após 8:36.

18. Iha lisaun tuirmai, ita sei hetan resposta ba pergunta saida deʼit?

¹⁸ Ita halo desizaun neʼebé importante liu iha Ita-nia moris bainhira deside atu hetan batizmu. Tanba neʼe mak desizaun neʼebé importante, Ita presiza hanoin didiʼak kona-ba neʼe. Saida mak Ita presiza hatene kona-ba batizmu? Saida mak Ita presiza halo antes no depois hetan batizmu? Iha lisaun tuirmai, ita sei hetan resposta ba pergunta sira-neʼe.