Pergunta husi lee-naʼin

Hahalok neʼebé mai husi espíritu santu mak inklui deʼit hahalok sira neʼebé temi iha Galásia 5:22, 23 ka lae?

Eskritura neʼe temi hahalok sia neʼebé mai husi espíritu santu: “Domin, ksolok, dame, pasiénsia, laran-diʼak, hahalok diʼak, fiar, laran-maus no kontrola an.” Maibé iha mós hahalok seluk neʼebé Maromak nia espíritu santu ajuda ita atu haburas.

Antes Paulo temi kona-ba hahalok neʼebé mai husi espíritu santu, nia hakerek: “Hahalok sira neʼebé husi isin . . . mak sala seksuál, hahalok la moos, halo hahalok aat toʼo la sente moe, adora estátua, halo espiritizmu, odi malu, istori malu, laran-moras malu, hirus toʼo la kontrola an, buka atu manán deʼit, haketak malu, forma grupu relijiaun oioin, laran-moras ba buat neʼebé ema seluk nian, lanu-teen, festa arbiru, no buat sira seluk neʼebé hanesan neʼe.” (Gal 5:19-21) Entaun iha hahalok seluk neʼebé Paulo bele temi nuʼudar hahalok “husi isin”, hanesan hakerek iha Koloso 3:5. Nuneʼe mós, depois temi tiha hahalok diʼak sia, nia hatete: “La iha ukun-fuan ida mak kontra buat sira-neʼe.” Iha lian orijinál, fraze “buat sira-neʼe” mós bele tradús nuʼudar “buat sira neʼebé hanesan neʼe”. Paulo la temi hahalok diʼak hotu neʼebé espíritu santu ajuda ita haburas.

Ita komprende ida-neʼe bainhira ita kompara hahalok neʼebé mai husi espíritu santu ho hahalok neʼebé mai husi naroman, neʼebé Paulo temi bainhira nia hakerek ba kongregasaun Éfeso: “Naroman hamosu hahalok diʼak oioin, hahalok loos no lia-loos.” (Éf 5:8, 9) Sin, “hahalok diʼak”, hahalok loos no lia-loos mak parte ba hahalok neʼebé mai husi naroman, maibé hahalok diʼak mós parte ba “hahalok sira neʼebé mai husi Maromak nia espíritu”.

Ita mós komprende ida-neʼe bainhira ita kompara hahalok neʼebé mai husi espíritu ho hahalok neen neʼebé Paulo anima Timóteo atu haburas: “Hahalok loos, laran-metin ba Maromak, fiar, domin, tahan no laran-maus.” (1 Tim 6:11) Paulo temi deʼit hahalok tolu neʼebé mai husi espíritu, neʼe mak fiar, domin no laran-maus. Maibé Timóteo mós presiza espíritu santu nia ajuda atu haburas hahalok seluk: Hahalok loos, laran-metin ba Maromak, no tahan.—Kompara ho Koloso 3:12; 2 Pedro 1:5-7.

Entaun, Galásia 5:22, 23 la temi kona-ba hahalok hotu neʼebé ema Kristaun presiza haburas. Maromak nia espíritu bele ajuda ita haburas hahalok sia neʼebé Paulo temi nuʼudar “hahalok sira neʼebé mai husi Maromak nia espíritu”. Maibé iha mós hahalok seluk neʼebé ema Kristaun presiza haburas atu sai maduru no ‘tau hahalok foun nuʼudar ita-nia roupa, katak hahalok foun neʼebé Maromak kria tuir ninia hakarak. Hahalok neʼe mak hahalok loos no laran-metin’.—Éf 4:24.