Tanbasá mak Maromak la hatán ba orasaun balu?
Ita-nia Aman iha lalehan, Maromak Jeová, prontu no kontente atu rona ita-nia orasaun neʼebé ita hatoʼo husi laran. Maibé tanbasá mak Maromak la hatán ba orasaun balu? No saida mak ita presiza hanoin-hetan bainhira ita reza? Haree toʼok buat neʼebé Bíblia hatete.
“Kuandu ó halo orasaun, keta repete beibeik liafuan neʼebé hanesan.”—Mateus 6:7.
Maromak Jeová lakohi ita atu repete deʼit orasaun sira neʼebé ita dekór, ka lee husi livru ruma. Nia hakarak ita atu koʼalia husi laran. Ita sei la sente kontente se Ita-nia belun repete liafuan neʼebé hanesan deʼit ba Ita loron-loron, loos ka lae? Belun sira koʼalia nakloke ba malu, no husi laran. Bainhira ita uza ita-nia liafuan rasik atu halo orasaun ba ita-nia Aman iha lalehan, neʼe hatudu katak ita haree nia nuʼudar ita-nia Belun.
“Kuandu imi husu, imi la simu tanba imi husu ho objetivu neʼebé sala.”—Tiago 4:3.
Ita labele hanoin katak Maromak sei hatán ita-nia orasaun se ita husu buat neʼebé ita hatene katak Maromak la gosta ka lakohi ita atu hetan. Porezemplu, se ema ruma joga osan no husu sorte diʼak, Maromak Jeová sei la hatán nia, tanba Maromak hatete ona ho klaru katak ita labele kaan-teen no labele fiar buat neʼebé la loos, hanesan sorte. (Isaias 65:11; Lucas 12:15) Atu Maromak bele hatán ita-nia orasaun, ita tenke husu buat neʼebé la kontra ninia Liafuan iha Bíblia.
“Ema neʼebé lakohi rona ba lei sira, Maromak sei hakribi mós ninia orasaun.”—Provérbios 28:9.
Iha Bíblia nia tempu, Maromak la hatán ema neʼebé la halo tuir ninia ukun-fuan sira. (Isaias 1:15, 16) Ohin loron Maromak la troka ninia hanoin kona-ba neʼe. (Malaquias 3:6) Se ita hakarak Maromak hatán ita-nia orasaun, ita presiza hakaʼas an atu halo tuir ninia ukun-fuan sira. Maibé oinsá se uluk ita halo sala? Neʼe katak Jeová sei la rona ita ka lae? Lae. Maromak Jeová sei fó perdua ita ho domin se ita arrepende an no hakaʼas an atu halo buat neʼebé loos.—Apóstolu 3:19.